ຕອນເຊົ້າ ເວລາ 9: 00ໂມງ ຂອງໃນວັນທີ 21-22 ທັນວາ 2020 ທີ່ຫ້ອງສ່ອງແສງຊັ້ນ III ກະຊວງອຸດສາຫະກຳ ແລະ ການຄ້າ ໄດ້ເປີດກອງປະຊຸມຄົບຄະນະບໍລິຫານງານພັກເປີດກວ້າງ ທ້າຍສະໄໝ ຂອງຄະນະບໍລິຫານງານພັກກະຊວງອຸດສາຫະກໍາ ແລະ ການຄ້າ ສະໄໝທີ lV ຂຶ້ນຢ່າງເປັນທາງການ.
ພາຍໃຕ້ການເປັນປະທານຂອງ ສະຫາຍ ນາງ ເຂັມມະນີ ພົນເສນາ ກໍາມະການສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງອຸດສາຫະກໍາ ແລະ ການຄ້າ, ມີບັນດາສະຫາຍໃນຄະນະບໍລິຫານງານພັກກະຊວງ, ບັນດາສະຫາຍເລຂາຄະນະພັກຮາກຖານ ແລະ ບັນດາສະຫາຍເລຂາໜ່ວຍພັກອ້ອມຂ້າງອົງຄະນະພັກກະຊວງອຸດສາຫະກຳ ແລະ ການຄ້າ ເຂົ້າຮ່ວມ. ກອງປະຊຸມດັ່ງກ່າວ ໄດ້ທົບທວນຄືນການຊີ້ນໍາ-ນໍາພາຂອງຄະນະບໍລິຫານງານພັກກະຊວງອຸດສາຫະກຳ ແລະ ການຄ້າ ສະໄໝທີ IV ຕໍ່ບັນດາຮາກຖານພັກ ທົ່ວອົງຄະນະພັກກະຊວງອຸດສາຫະກຳ ແລະ ການຄ້າ ໃນໄລຍະ 5 ປີຜ່ານມາ.
ພ້ອມທັງຜ່ານບົດສໍາຫຼວດ ສະຫາຍ ເລຂາ ແລະ ຄະນະບໍລິຫານງານພັກກະຊວງ ແລະ ປະກອບຄໍາຄິດ-ຄໍາເຫັນຕໍ່ບົດສຳຫຼວດຕາມລະບຽບຂອງພັກຈາກບັນດາ ສະຫາຍ ທີ່ເຂົ້າຮ່ວມກອງປະຊຸມຢ່າງກົງໄປກົງມາດ້ວຍບັນຍາກາດທີ່ເຕັມໄປດ້ວຍເນື້ອໃນ ແລະ ເປັນກັນເອງ ເພື່ອກໍໍ່ສ້າງຊ່ວຍເຫຼືອຊຶ່ງກັນ ແລະ ກັນ, ທັງເປັນທິດທາງໃນການປັບປຸງວຽກງານຂອງຂະແໜງອຸດສາຫະກຳ ແລະ ການຄ້າ ໃຫ້ມີຄວາມພ້ອມໃນການກະກຽມແກ່ການຈັດຕັ້ງປະຕິບັດແຜນພັດທະນາ ພັດທະນາອຸດສາຫະກຳປຸງແຕ່ງ ແລະ ການຄ້າ ໃນປີ 2021-2025 ແລະ ຕ້ອນຮັບກອງປະຊຸມໃຫຍ່ ຄັ້ງທີ XI ຂອງພັກປະຊາຊົນປະຕິວັດລາວທີ່ຈະຈັດຂຶ້ນໃນມໍ່ໆນີ້.
ພາບ-ຂ່າວໂດຍ: ໄພຄຳອີ ວິໄລຄຳ
ແຫຼງຂ່າວ: ຈາກກົມຈັດຕັ້ງ ແລະ ພະນັກງານ ກະຊວງ ອຄ.
