ນະຄອນຫຼວງວຽງຈັນ, ວັນທີ 30 ທັນວາ 2020, ທ່ານນາງ ເຂັມມະນີ ພົນເສນາ, ລັດຖະມົນຕີ ກະຊວງ ອຸດສາຫະກໍາ ແລະ ການຄ້າ ພ້ອມດ້ວຍ ຄະນະນໍາກະຊວງ ລົງຢ້ຽມຢາມ ປາຫວານຟາມ ແລະ ບໍລິສັດ ຈໍາປາຫອມ ການຄ້າ ຂາອອກ-ຂາເຂົ້າ ຈໍາກັດ, ເຊິ່ງທັງສອງບໍລິສັດນີ້ໄດ້ຮັບການສະໜັບສະໜູນຈາກທຶນສົມທົບເພື່ອສົ່ງເສີມທຸລະກິດ ໄລຍະສອງ (BAF II) ແມ່ນໜຶ່ງໃນອົງປະກອບຂອງໂຄງການສົ່ງເສີມຄວາມສາມາດໃນການແຂ່ງຈັນ ແລະ ການຄ້າ ຂອງ ສປປ ລາວ (LCT). ໃນການລົງຢ້ຽມຢາມໃນຄັ້ງນີ້, ມີບັນດາຄະນະກົມ, ຄະນະພະແນກແລະ ວິຊາການຈາກ ກະຊວງ ອຸດສາຫະກໍາ ແລະ ການຄ້າ, ຮອງຫົວໜ້າພະແນກ ອຸດສາຫະກໍາ ແລະ ການຄ້າແຂວງແຂວງ ວຽງຈັນ ແລະ ວິຊາການຈາກ ພະແນກ ອຸດສາຫະກໍາ ແລະ ການຄ້າແຂວງ ນະຄອນຫລວງວຽງຈັນ ແລະ ອຸດົມໄຊ ເຂົ້າຮ່ວມຫຼາຍກວ່າ 30 ທ່ານ.

    ຈຸດປະສົງໃນການລົງຢ້ຽມຢາມໃນຄັ້ງນີ້ແມ່ນເພື່ອລາຍງານ ກ່ຽວກັບພາບລວມຂອງທຸລະກິດ, ຜົນທີ່ໄດ້ຮັບຂອງບໍລິສັດພາຍຫຼັງໄດ້ຮັບທຶນສົມທົບ BAF II ໃຫ້ຄະນະນໍາກະຊວງຮັບຊາບ, ເປັນໂອກາດຢ້ຽມຢາມການພັດທະນາຂອງທັງສອງບໍລິສັດ ແລະ ເປັນການລາຍງານກ່ຽວກັບວິໄສທັດຂອງລັດຖະບານກ່ຽວກັບການສະໜັບສະໜູນການພັດທະນາທຸລະກິດຂະໜາດນ້ອຍ ແລະ ກາງ ໃນ ສປປ ລາວ. ການລົງຢ້ຽມຢາມໃນຄັ້ງນີ້, ຜູ້ເຂົ້າຮ່ວມທຸກທ່ານໄດ້ເຂົ້າຢ້ຽມຢາມ ປາຫວານຟາມ ໃນຕອນເຊົ້າ ແລະ ໄປຢ້ຽມຢາມ ບໍລິສັດ ຈໍາປາຫອມ ການຄ້າ ຂາອອກ-ຂາເຂົ້າ ຈໍາກັດ ໃນຕອນບ່າຍ.

      ທ່ານນາງ ເຂັມມະນີ ພົນເສນາ, ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ສະແດງຄວາມຂອບໃຈມາຍັງທັງສອງບໍລິສັດທີ່ໃຫ້ການຕ້ອນຮັບທ່ານພ້ອມດ້ວຍຄະນະຢ່າງອົບອຸ່ນ ແລະ ໄດ້ເນັ້ນໜັກເຖິງການສະໜັບສະໜູນຂອງລັດຖະບານທີ່ມີໃນປະຈຸບັນນີ້ ໂດຍສະເພາະແມ່ນຈາກໂຄງການ ທຶນສົມທົບ BAF II, ເຊິ່ງບໍລິສັດທີ່ສົນໃຈສາມາດເຂົ້າທີ່ເວັບໄຊຂອງທຶນສົມທົບດັ່ງກ່າວ ຫຼື ເຂົ້າໄປທີ່ ຫ້ອງການທຶນສົມທົບ BAF II, ເຊິ່ງຕັ້ງຢູ່ທີ່ ການຄ້າ ແລະ ສະພາອຸດສາຫະກໍາແຫ່ງຊາດ; ແລະ ກໍຍັງມີທຶນກູ້ຢືມສໍາລັບວິສາຫະກິດ ຂະໜາດນ້ອຍ ແລະ ກາງ ດ້ວຍດອກເບ້ຍຕໍ່າ ປະມານ 3-5%, ເຊິ່ງທຸລະກິດທີ່ສົນໃຈສາມາດຕິດຕໍ່ໄດ້ທີ່ທະນາຄານທີ່ຈັດຕັ້ງປະຕິບັດກອງທຶນດັ່ງກ່າວ. ກອງທຶນທັງສອງນີ້ແມ່ນຢູ່ພາຍໃຕ້ການຊີ້ນໍາໂດຍກົງຂອງກະຊວງ ອຸດສາຫະກໍາ ແລະ ການຄ້າ. ນອກຈາກນີ້, ທ່ານນາງ ເຂັມມະນີ ຍັງໄດ້ໃຫ້ໂອກາດໃຫ້ຜູ້ເຂົ້າຮ່ວມ, ໂດຍສະເພາະຄະນະນໍາກະຊວງຜູ້ທີ່ເຮັດວຽກໃກ້ຊິດ ແລະ ຕິດພັນກັບຂະແໜງການທີ່ທັງສອງບໍລິສັດດໍາເນີນທຸລະກິດໄດ້ ແລກປ່ຽນຄໍາຄິດເຫັນ, ເຊິ່ງເປັນປະໂຫຍດໃຫ້ແກ່ທຸລະກິດໃນການຮຽນຮູ້ນະໂຍບາຍຂອງລັດຖະບານໃນການສົ່ງເສີມການພັດທະນາທຸລະກິດ.

     ທ່ານ ນາງ ວຽງສະຫວັນ ຄໍາມະນີວົງ, ເຈົ້າຂອງ ປາຫວານຟາມ, ໄດ້ກ່າວກ່ຽວກັບພາບລວມຂອງ ປາຫວານຟາມ ວ່າ: “ປາຫວານຟາມ ໄດ້ສ້າງຕັ້ງຂຶ້ນໃນປີ 2016 ໃນເນື້ອທີ່ 4,800 ຕາແມັດ ເພື່ອເປັນສະຖານທີ່ໃຫ້ຄວາມຮູ້ດ້ານກະສິກໍາອິນຊີ. ເນື່ອງຈາກຄວາມຕ້ອງການຂອງຜັກ ແລະ ໝາກໄມ້ປອດສານພິດເພີ່ມຂຶ້ນ, ຂ້າພະເຈົ້າຈຶ່ງຕັດສິນໃຈຍ້າຍຟາມໄປທີ່ສະຖານທີ່ທີ່ກວ້າງກວ່າເກົ່າໃນປີ 2017, ເຊິ່ງເຮັດໃຫ້ຂ້າພະເຈົ້າສາມາດຂະຫຍາຍການຜະລິດ. ຜົນຜະລິດຂອງຟາມແມ່ນເພື່ອສະໜອງໃຫ້ຮ້ານ ວິວມໍ, ຮ້ານ ປາກຊັນ ແລະ ຮ້ານ ຊຸບເປີມາເກັດອື່ນໆໃນ ນະຄອນຫຼວງວຽງຈັນ”. ທ່ານນາງ ວຽງສະຫວັນ ຍັງໄດ້ແລກປ່ຽນປະສົບການໃນຕອນທີ່ເພິ່ນຍື່ນສະໝັກຂໍທຶນສົມທົບ BAF II ວ່າ: “ຂ້າພະເຈົ້າຮູ້ສຶກປະທັບໃຈໃນການບໍລິການຂອງທີມງານ BAF II ທຸກທ່ານ, ພວກເພິ່ນໃຫ້ການຊ່ວຍເຫຼືອເປັນຢ່າງດີ”. ພວກເພິ່ນຊ່ວຍຂ້າພະເຈົ້າຕັ້ງແຕ່ຂັ້ນຕອນທໍາອິດທີ່ຂ້າພະເຈົ້າກ້າວເຂົ້າໄປທີ່ຫ້ອງການເພິ່ນຈົນຮອດຂັ້ນຕອນທີ່ເອກະສານຂອງຂ້າພະເຈົ້າໄດ້ຮັບອະນຸມັດ. ທີມງານ BAF II ຍັງໄດ້ຕິດຕາມການຈັດຕັ້ງປະຕິບັດກິດຈະກໍາທີ່ຂ້າພະເຈົ້າໄດ້ສະເໜີຢ່າງເປັນປະຈໍາ”. ເພິ່ນຍັງສະແດງຄວາມຮູ້ບຸນຄຸນມາຍັງ ກະຊວງອຸດສາຫະກໍາ ແລະ ການຄ້າ ທີ່ໃຫ້ການສະໜັບສະໜູນການພັດທະນາທຸລະກິດ ເປັນ​ຕົ້ນ​ແມ່ນ ໂຄງ​ການທຶນສົມທົບ BAF II ກໍ່​ຄືໂຄງ​ການ​ອື່ນໆ ​ພາຍ​ໃຕ້​ການ​ຄຸ້ມ​ຄອງ​ຂອງກະ​ຊວງ.

     ທ່ານນາງ ບຸນຮຽງ ພົມມີໄຊ, ເຈົ້າຂອງບໍລິສັດ ຈໍາປາຫອມ ການຄ້າ ຂາອອກ-ຂາເຂົ້າ ຈໍາກັດ ໄດ້ນຳສະເໜີກ່ຽວກັບພາບລວມຂອງບໍລິສັດ ວ່າ: “ໂຮງສີເຂົ້າຂອງຂ້າພະເຈົ້າໄດ້ເຮັດວຽກຮ່ວມກັບຊາວນາຈາກ 6 ບ້ານໃນນະຄອນຫຼວງວຽງຈັນ. ຊາວນາກຸ່ມດັ່ງກ່າວໄດ້ສະໜອງເຂົ້າເປືອກໃຫ້ກັບໂຮງສີ ເພື່ອດໍາເນີນການສີເຂົ້າ, ອົບເຂົ້າ ແລະ ບັນຈຸໃນເປົາເຂົ້າ ແລະ ຖົງຢາງສູນຍາກາດ ເພື່ອສາມາດເກັບຮັກສາຄຸນນະພາບເຂົ້າໄວ້ໄດ້ດົນ. ນີ້ກໍເພື່ອຮັບປະກັນວ່າລູກຄ້າຈະໄດ້ຮັບເຂົ້າທີ່ມີຄຸນນະພາບດີທີ່ສຸດ. ຂ້າພະເຈົ້າວາງແຜນຈະສົ່ງອອກເຂົ້າລາວໄປສູ່ຕະຫຼາດຕ່າງປະເທດ, ໂດຍສະເພາະບັນດາປະເທດໃນສະຫະພາບ ເອີຣົບ”. ແລະ ທ່ານຍັງໄດ້ແລກປ່ຽນປະສົບການໃນການຍື່ນສະໝັກຂໍທຶນສົມທົບ BAF II ວ່າ: “ຂ້າພະເຈົ້າຮູ້ສຶກປະທັບໃຈໃນການບໍລິການຂອງທີມງານ BAF II ທຸກທ່ານທີ່ໃຫ້ການຊ່ວຍເຫຼືອຂ້າພະເຈົ້າໃນການຍື່ນຂໍທຶນ. ທີມງານໄດ້ຊ່ວຍຂ້າພະເຈົ້າຕັ້ງແຕ່ຂັ້ນຕອນການຂຽນແບບຟອມສະໝັກຂໍທຶນ ຈົນເຖິງ ໃຫ້ຄໍາແນະນໍາໃນການຂະຫຍາຍທຸລະກິດຂອງຂ້າພະເຈົ້າ. ດັ່ງນັ້ນ, ເມື່ອຂ້າພະເຈົ້າສໍາເລັດການຈັດຕັ້ງປະຕິບັດກິດຈະກໍາຕາມທີ່ໄດ້ລະບຸໄວ້ໃນສັນຍາສະບັບທໍາອິດ ແລະ ເມື່ອຂ້າພະເຈົ້າກໍມີແນວຄວາມຄິດຈະພັດທະນາຜະລິດຕະພັນເຂົ້າເພີ່ມຕື່ມ, ຂ້າພະເຈົ້າກໍບໍ່ລັງເລໃຈທີ່ຈະເຂົ້າໄປຫາທີມງານ BAF II ເພື່ອຍື່ນສະໝັກຂໍທຶນຄັ້ງທີສອງ”. ທ່ານຍັງໄດ້ສະແດງຄວາມຂອບໃຈມາຍັງບັນດາກົມ ​ຂອງກະຊວງ ທີ່ໃຫ້ການສະໜັບສະໜູນໃນການພັດທະນາທຸລະກິດມາໂດຍຕະຫຼອດ ໂດຍ​ທ່ານ​ໄດ້ກ່າວວ່າ: “ຂ້າພະເຈົ້າຮູ້ສຶກອົບອຸ່ນ ແລະ ໄດ້​ຮັບ​ການ​ຮ່ວມ​ມືໃນທຸກໆຄັ້ງທີ່​ຂ້າ​ພະ​ເຈົ້າກ້າວເຂົ້າໄປທີ່ກະຊວງ ອຸດສາຫະກໍາ ແລະ ການຄ້າ ເພື່ອຂໍຄໍາແນະນໍາກັບບັນດາກົມທີ່ຂ້າພະເຈົ້າເຂົ້າ​ໄປ​ຫາ​ເປັນ​ຢ່າງ​ດີ”.

     ໃນຕອນທ້າຍຂອງການລົງຢ້ຽມຢາມໃນແຕ່ລະບໍລິສັດ, ທັງສອງບໍລິສັດກໍສະແດງຄວາມຮູ້ບຸນຄຸນມາຍັງທັງສອງບໍລິສັດທີ່ໄດ້ຮັບກຽດຕ້ອນຮັບ ທ່ານລັດຖະມົນຕີ ພ້ອມດ້ວຍ ຄະນະນໍາກະຊວງ ແລະ ຕໍ່ກັບວຽກງານຕ່າງໆທີ່ບັນດາທ່ານໄດ້ເອົາໃຈໃສ່ເພື່ອພັດທະນາທຸລະກິດ, ໂດຍສະເພາະແມ່ນທຸລະກິດຂະໜາດນ້ອຍ ແລະ ກາງ. ໃນຂະນະດຽວກັນ, ທ່ານນາງ ເຂັມມະນີ ພົນເສນາ, ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ສະແດງຄວາມຂອບໃຈມາຍັງບໍລິສັດອີກຄັ້ງໃນການຕ້ອນຮັບຢ່າງອົບອຸ່ນ ແລະ ໄດ້ຖືໂອກາດອວຍພອນໃຫ້ກັບທັງສອງບໍລິສັດໃຫ້ປະສົບຜົນສໍາເລັດໃນການດໍາເນີນທຸລະກິດຕໍ່ໄປ.

     ປາຫວານຟາມ ແມ່ນ ສວນປູກຜັກ ແລະ ໝາກໄມ້ ປອດສານພິດ. ປາຫວານຟາມໄດ້ຍື່ນສະໝັກຂໍທຶນສົມທົບ BAF II ໃນເດືອນສິງຫາ 2020 ເພື່ອສົມທົບທຶນສໍາລັບການບໍລິການດ້ານການປຶກສາສໍາລັບການສໍາຫຼວດ ແລະ ອອກແບບຟາມ ແລະ ການຝຶກອົບຮົບຫຼັກສູດ “Keiei-Juku Program” ທີ່ສະຖາບັນພັດທະນາຊັບພະຍາກອນມະນຸດ ລາວ-ຍີ່ປຸ່ນ. ເນື່ອງຈາກການຈໍາກັດການເດີນທາງຍ້ອນການລະບາດ COVID-19, ຈຶ່ງເຮັດໃຫ້ຊ່ຽວຊານຍີ່ປຸ່ນຜູ້ທີ່ຈະນໍາພາການຝຶກອົບຮົມບໍ່ສາມາດເດີນທາງມາທີ່ ສປປ ລາວໄດ້. ໃນຂະນະດຽວກັນ, ສູນດັ່ງກ່າວຍັງໄດ້ຈັດການຝຶກອົບຮົມອອນລາຍ, ແຕ່ກໍບໍ່ປະສົບຜົນສໍາເລັດ. ດັ່ງນັ້ນ, ເຈົ້າຂອງຟາມຈຶ່ງຕັດສິນໃຈຍົກເລີກກິດຈະກໍາທີສອງ. ໃນປະຈຸບັນນີ້, ເຈົ້າຂອງຟາມກໍາລັງທ້ອນໂຮມເອກະສານທີ່ກ່ຽວຂ້ອງກັບກິດຈະກໍາທີໜຶ່ງທັງໝົດເພື່ອຂໍເບີກຈ່າຍໃນໄວໆນີ້. ສ່ວນກິດຈະກໍາທີສອງ, ຖ້າສະຖານະການລະບາດຂອງ COVID-19 ດີຂຶ້ນ, ຊ່ຽວຊານສາມາດເດີນທາງມາທີ່ ສປປ ລາວ ໄດ້, ເຈົ້າຂອງຟາມຈຶ່ງຈະຍື່ນສະໝັກຂໍທຶນ BAF II ໃໝ່.

ບໍລິສັດ ຈໍາປາຫອມ ການຄ້າ ຂາອອກ-ຂາເຂົ້າ ຈໍາກັດ ເປັນບໍລິສັດທີ່ຮັບເຂົ້າຈາກຊາວນາເຂົ້າມາສີທີ່ໂຮງສີເຂົ້າຂອງບໍລິສັດ, ນອກຈາກນີ້, ຍັງອົບ ແລະ ບັນຈຸເຂົ້າລົງໃນຫໍ່ ແລະ ຖົງສູນຍາກາດ. ບໍລິສັດໄດ້ຍື່ນສະໝັກຂໍທຶນສົມທົບ BAF II ຄັ້ງທໍາອິດແມ່ນເພື່ອສົມທົບທຶນສໍາລັບການບໍລິການດ້ານການປຶກສາດ້ານການພັດທະນາໂຮງສີເຂົ້າ, ເຊິ່ງລວມທັງການປຶກສາດ້ານການຂໍໃບຢັ້ງຢືນ GMP, ແຜນພັດທະນາທຸລະກິດ ແລະ ການອອກແບບໂຮງສີເຂົ້າ. ການຍື່ນຂໍຄັ້ງທີສອງນີ້ແມ່ນເພື່ອສົມທົບທຶນສໍາລັບການອອກແບບການຫຸ້ມຫໍ່ເຂົ້າໃຫ້ສາມາດຮັກສາຄຸນນະພາບຂອງເຂົ້າ. ທັງສອງກິດຈະກໍານີ້ໄດ້ຈັດຕັ້ງປະຕິບັດສໍາເລັດແລ້ວ, ແລະ ໄດ້ຮັບການເບີກຈ່າຍແລ້ວ. ໃນປະຈຸບັດ, ເຈົ້າຂອງບໍລິສັດກໍາລັງວາງແຜນທີ່ຈະຍື່ນສະໝັກຂໍທຶນສົມທົບ BAF II ໃນການອອກແບບການຂະຫຍາຍໂຮງສີເຂົ້າ.

      ທຶນສົມທົບເພື່ອສົ່ງເສີມທຸລະກິດ ໄລຍະສອງ (BAF II) ແມ່ນໜຶ່ງໃນອົງປະກອບຂອງໂຄງການສົ່ງເສີມຄວາມສາມາດໃນການແຂ່ງຈັນ ແລະ ການຄ້າ ຂອງ ສປປ ລາວ (LCT). ຈຸດປະສົງຂອງທຶນສົມທົບ BAF II ແມ່ນເພື່ອສະໜັບສະໜູນບັນດາບໍລິສັດ ເອກະຊົນ ແລະ ວິສາຫະກິດຂະໜາດນ້ອຍ ແລະ ກາງ ໃນການພັດທະນາທັກສະ ແລະ ວິຊາການ ເພື່ອໃຫ້ກາຍເປັນບໍລິສັດທີ່ມີຄວາມອາດສາມາດໃນການແຂ່ງຂັນທັງພາຍໃນ, ພາກພື້ນ ແລະ ສາກົນ. ຈຸດປະສົງດັ່ງກ່າວກໍສອດຄ່ອງກັບຈຸດປະສົງຂອງໂຄງການ LCT, ເຊິ່ງໄດ້ຮັບການປະກອບທຶນຮ່ວມເຂົ້າກອງທຶນສົບທົບຫຼາຍຝ່າຍໂດຍທະນາຄານໂລກ, ລັດຖະບານອົດສະຕຣາລີ, ລັດຖະບານ ໄອແລນ ແລະ ລັດຖະບານ ອາເມຣິກາ, ເຊິ່ງເປົ້າໝາຍຫຼັກແມ່ນການຫຼຸດຜ່ອນ ແລະ ລົບລ້າງອຸປະສັກທີ່ມີຕໍ່ການເຕີບໃຫຍ່ຂະຫຍາຍຕົວຂອງທຸລະກິດໂດຍການປັບປຸງສະພາບແວດລ້ອມດ້ານລະບຽບກົດໝາຍ, ຫຼຸດຜ່ອນຕົ້ນທຶນການຄ້າ ແລະ ຍົກລະດັບຄວາມສາມາດການແຂ່ງຂັນຂອງພາກທຸລະກິດ. ສໍາລັບຂໍ້ມູນເພີ່ມຕື່ມກ່ຽວກັບ ທຶນສົມທົບ BAF II, ສາມາດເຂົ້າທີ່ເວັບໄຊ https://www.baflaos.com/en/home

ພາບ-ຂ່າວ: ໄພ​ຄຳ​ອີ ວິ​ໄລ​ຄຳ

ສູນ​ສະ​ຖິ​ຕິ ແລະ ຂໍ້​ມູນ​ຂ່າວ​ສານ