ຕອນບ່າຍ ເວລາ 2: 00 ໂມງ ຂອງວັນທີ່ 18 ມັງກອນ 2021 ທີ່ກະຊວງປ້ອງກັນປະເທດ ທ່ານ ນາງເຂັມມະນີ ພົນເສນາ ລັດຖະມົນຕີກະຊວງ ອຸດສາຫະກໍາ ແລະ ການຄ້າ ພ້ອມຄະນະກົມ, ຄະນະຫ້ອງການ, ຕາງໜ້າບໍລິສັດເບຍລາວ, ລັດວິສາຫະກິດນໍ້າມັນເຊື້ອໄຟລາວ ແລະ ສະພາການຄ້າ ແລະ ອຸດສາຫະກໍາແຫ່ງຊາດລາວ(ສຄອຊ) ເຂົ້າອວຍພອນການນໍາກະຊວງປ້ອງກັນປະເທດ ເນື່ອງໃນໂອກາດສະເຫລີມສະຫລອງ ວັນສ້າງຕັ້ງກອງທັບປະຊາຊົນລາວ ຄົບຮອບ 72 ປີ; ຕ້ອນຮັບຄະນະໃນຄັ້ງນີ້ ໂດຍ ທ່ານ ພົນໂທ ທອງລອຍ ສີລິວົງ ຮອງລັດຖະມົນຕີ ກະຊວງປ້ອງກັນປະເທດ ພ້ອມຄະນະ ເຂົ້າຮ່ວມ.
ໂອກາດດັ່ງກ່າວ ທ່ານ ນາງ ເຂັມມະນີ ພົນເສນາ ໄດ້ຕາງຫນ້າກະຊວງ ອຄ, ບໍລິສັດ ລັດວິສາຫະກິດອ້ອມຂ້າງ ແລະ ສຄອຊ ອວຍພອນ ວັນສ້າງຕັ້ງກອງທັບ ວັນທີ 20 ມັງກອນ 2021 ຄົບຮອບ 72 ປີ ພ້ອມທັງສະແດງຄວາມຍ້ອງຍໍຊົມເຊີຍ ຕໍ່ຄຸນງາມຄວາມດີ ຂອງກະຊວງປ້ອງກັນປະເທດ ຕະຫລອດໄລຍະ 72 ປີ ຜ່ານມາ ທີ່ໄດ້ປະກອບສ່ວນຢ່າງໃຫຍ່ຫຼວງ ໃນການປົກປັກຮັກສາປະເທດຊາດ ແລະ ການຮ່ວມມືຂອງສອງກະຊວງ ໂດຍສະເພາະການຍົກລະດັບພະນັກງານ ວິຊາການຮ່ວມກັນໃນໄລຍະຜ່ານມາ ແລະ ພ້ອມຈະສືບຕໍ່ສາຍພົວພັນ ໃຫ້ເລິກເຊິ່ງຂຶ້ນກວ່າເກົ່າ; ໃນໂອກາດດັ່ງກ່າວກໍ່ປະກອບສ່ວນມອບເງິນ ໃຫ້ກະຊວງປ້ອງກັນປະເທດ ລວມມູນຄ່າ 20 ລ້ານກີບ ເພື່ອປະກອບສ່ວນສ້າງຂະບວນການຕ້ອນຮັບວັນສໍາຄັນຂອງຊາດ.
ທ່ານ ພົນໂທ ທອງລອຍ ສີລິວົງ ກໍ່ໄດ້ສະແດງຄວາມຊົມເຊີຍ ທີ່ຄະນະນໍາກະຊວງ ອຸດສາຫະກໍາ ແລະ ການຄ້າ ຍາມໃດກໍ່ມີສາຍພົວພັນທີ່ດີ ພ້ອມສະຫນັບສະຫນູນ ອ້າຍນ້ອງກະຊວງປ້ອງກັນປະເທດ ເພື່ອເຮັດສໍາເລັດຫລ້ອນຫນ້າທີ່ຍຸດທະສາດ ປົກປັກຮັກສາ ແລະ ສ້າງສາພັດທະນາປະເທດຊາດ ເຊິ່ງກະຊວງຍາມໃດກໍ່ຖືສໍາຄັນປະກອບສ່ວນ ຮັກສາສະຖຽນລະພາບທາງການເມືອງ, ແກ້ໄຂຄວາມບໍ່ສະຫງົບໃນທົ່ວສັງຄົມ ເຊິ່ງຜ່ານມາໄດ້ຮັບການປະກອບສ່ວນດ້ານວັດຖຸປັດໄຈຈາກສັງຄົມ ກໍ່ຄືກະຊວງ ອຄ ເພື່ອໃຫ້ອ້າຍນ້ອງທະຫານໃນແຕ່ລະບ່ອນ ແຕ່ລະທ້ອງຖິ່ນປະຕິບັດສໍາເລັດຫລ້ອນຫນ້າທີ່ຂອງຕົນ ພ້ອມຮຽກຮ້ອງໃຫ້ມີການຮ່ວມມືເພີ່ມຂຶ້ນໃນຕໍ່ໜ້າ.
ພາບ-ຂ່າວ ໂດຍ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
