ຕອນເຊົ້າ ເວລາ 9:00 ໂມງ ຂອງວັນ 3 ກຸມພາ 2021 ທີ່ຫ້ອງປະຊຸມໃຫຍ່ຊັ້ນ I ກະຊວງອຸດສາຫະກໍາ ແລະ ການຄ້າ ໄດ້ມີການຮັບຟັງປາຖະກະຖາ ເລົ່າມູນເຊື້ອ ວັນສ້າງຕັ້ງສະຫະພັນກຳມະບານລາວ ຄົບຮອບ 65 ປີ (1/2/ 1956-1/2/ 2021) ມີ ພະນັກງານ-ລັດຖະກອນທີ່ເປັນສະມາຊິກກໍາມະບານ ອ້ອມຂ້າງກະຊວງອຸດສາຫະກໍາ ແລະ ການຄ້າ ເຂົ້າຮ່ວມຈໍານວນ 183 ທ່ານ.
ກອງປະຊຸມໂດຍການເປັນປະທານ ຂອງ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກຳ ແລະ ການຄ້າ ແລະ ປະທານຮ່ວມ ຂອງ ທ່ານ ນາງ ອາລີ ວົງໜໍ່ບຸນທຳ ປະທານຄະນະບໍລິຫານງານສູນກາງສະຫະພັນກຳມະບານລາວ, ພ້ອມທັງຮັບຟັງການຂຶ້ນສະເໜີບັນຍາຍຂອງທ່ານ ຈຸດປະສົງເພື່ອເປັນການໂຄສະນາອົບຮົມເຊື່ອມຊຶມເຂົ້າໃຈໄດ້ເຖິງການເຕີບໃຫຍ່ຂະຫຍາຍຕົວຂອງຊົນຊັ້ນກຳມະກອນ ແລະ ຊາວຜູ້ອອກແຮງງານລາວ ເພື່ອເສີມຂະຫຍາຍທາດແທ້, ມູນເຊື້ອປະຕິວັດຂອງສະມາຊິກກຳມະບານ.
ພາຍໃຕ້ການນຳພາຂອງພັກ ປະຊາຊົນປະຕິວັດລາວ, ແນໃສ່ປຸກລະດົມ ຈິດສຳນຶກໃຫ້ແກ່ສະມາຊິກກຳມະບານທົ່ວກະຊວງອຸດສາຫະກໍາ ແລະ ການຄ້າ ແລະ ຊາວຜູ້ອອກແຮງງານໃຫ້ມີຄວາມບຸກບືນ, ຕັ້ງໜ້າປະກອບສ່ວນເຂົ້າໃນການເຄື່ອນໄຫວວຽກງານກຳມະບານແຕ່ລະໄລຍະ ນັບແຕ່ມູນເຊື້ອຕົ້ນກຳເນີດ ແລະ ການເຕີບໃຫຍ່ຂະຫຍາຍຕົວຂອງສະຫະພັນກຳມະບານລາວ ຈົນເຖິງປັດຈຸບັນ;
ສະມາຊິກທຸກຄົນໃຫ້ມີລະບຽບວິໄນໃນການອອກແຮງງານ ແລະ ເອົາໃຈໃສ່ຕັ້ງໜ້າປະຕິບັດຂໍ້ແຂ່ງຂັນຮັກຊາດ ແລະ ພັດທະນາໃຫ້ເປັນຂະບວນກ້ວາງຂວາງ ແລະ ຟົດຟື້ນກວ່າເກົ່າ.
ພາບ-ຂ່າວ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
