ໃນຕອນບ່າຍຂອງວັນທີ 16 ກຸມພາ 2021, ຢູ່ຫ້ອງປະຊຸມໃຫຍ່ຊັ້ນ 01 ຂອງກະຊວງອຸດສາຫະກຳ ແລະ ການຄ້າ ໄດ້ເປີດກອງປະຊຸມ ຕີລາຄາ, ປະເມີນຜົນການຈັດຕັ້ງປະຕິບັດການກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ຂອງ 12 ໜ່ວຍພັກປະຈໍາປີ 2020 ແລະ ແຜນການທິດທາງປະຈໍາປີ 2021 ກະຊວງອຸດສາຫະກຳ ແລະ ການຄ້າ ຢ່າງເປັນທາງການ ໂດຍການເປັນປະທານ ຂອງ ທ່ານ ນາງ ເຂັມມະນີ ພົນເສນາ ກໍາມະການສູນກາງພັກ, ເລຂາຄະນະພັກກະຊວງ, ລັດຖະມົນຕີ ກະຊວງອຸດສາຫະກຳ ແລະ ການຄ້າ ແລະ ມີຄະນະບໍລິຫານງານພັກກະຊວງ, ບັນດາສະຫາຍຄະນະພັກຮາກຖານ, ຄະນະໜ່ວຍພັກ ແລະ ບັນດາສະຫາຍ ສະມາຊິກພັກສົມບູນ ທີ່ມີຕໍາແໜ່ງຫົວໜ້າພະແນກຂຶ້ນໄປ ທີ່ສັງກັດຢູ່ 12 ໜ່ວຍພັກລັດບໍລິຫານ ກະຊວງ ອຄ ເຂົ້າຮ່ວມປະມານ 121 ສະຫາຍ.
ຈຸດປະສົງຂອງກອງປະຊຸມ ແມ່ນປະຕິບັດຕາມຄໍາສັ່ງຂອງກົມການເມືອງສູນກາງພັກ ວ່າດ້ວຍການເພີ່ມທະວີການກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ກໍ່ຄືຄໍາແນະນໍາຂອງຄະນະຈັດຕັ້ງສູນກາງພັກ ກ່ຽວກັບການຈັດຕັ້ງປະຕິບັດຄໍາສັ່ງຂອງກົມການເມືອງສູນກາງພັກ ວ່າດ້ວຍການເພີ່ມທະວີ ການກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ; ຊຶ່ງປີນີ້ເປັນປີທີສາມ ທີ່ການຈັດຕັ້ງຮາກຖານພັກທົ່ວປະເທດເວົ້າລວມ, ເວົ້າສະເພາະແມ່ນບັນດາຮາກຖານທົ່ວອົງຄະນະພັກກະຊວງ ອຄ ໄດ້ເປັນເຈົ້າການໃນການຈັດຕັ້ງປະຕິບັດແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນຢ່າງມີຜົນສໍາເລັດ ໂດຍປະຕິບັດຕາມ 5 ເນື້ອໃນເຊັ່ນ: 1/ ການກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ທາງດ້ານການເມືອງ; 2/ ທາງດ້ານແນວຄິດ; 3/ ທາງດ້ານການຈັດຕັ້ງ; 4/ ທາງດ້ານແບບແຜນການນໍາພາ; 5/ ທາງດ້ານການນໍາພາປະຕິບັດໜ້າທີ່ການເມືອງ.
ກອງປະຊຸມໄດ້ຜ່ານບົດປະເມີນຜົນໂດຍຫຍໍ້ ຊຶ່ງໄດ້ສະຫລຸບຜົນງານ ທັງດ້ານດີ ແລະ ດ້ານອ່ອນ-ຂໍ້ຄົງຄ້າງ, ຂໍ້ສະເໜີແນະ ເພື່ອປັບປຸງແກ້ໄຂ ຂອງ 12 ໜ່ວຍພັກ, ພ້ອມດຽວກັນນີ້ ກໍ່ໄດ້ມີການປະກອບຄໍາຄິດເຫັນ ຂອງບັນດາເລຂາໜ່ວຍພັກຮາກຖານ ແລະ ສະມາຊິກໃນບັນຫາຕ່າງໆ ທີ່ຈະຕ້ອງເອົາໃຈໃສ່, ແກ້ໄຂ ແລະ ນຳໄປຈັດຕັ້ງປະຕິບັດຢ່າງເປັນເອກະພາບກັນ ໃນຕໍ່ໜ້າ;
ຕອນທ້າຍ, ທ່ານປະທານໄດ້ໃຫ້ການໂອ້ລົມ ແກ່ບັນດາສະມາຊິກພັກໃຫ້ເອົາໃຈໃສ່ຕໍ່ກົນໄກປະສານງານກັບຂະແໜງກະສິກໍາ ແລະ ປ່າໄມ້ ໃຫ້ໃກ້ຊິດກວ່າເກົ່າ ເປັນຕົ້ນວຽກງານສົ່ງເສີມການພັດທະນາ ແລະ ການຜະລິດເປັນສິນຄ້າ ຕິດພັນກັບຕະຫຼາດ; ພ້ອມທັງ, ທ່ານຫົວໜ້າກົມຈັດຕັ້ງ ແລະ ພະນັກງານ ປະກາດການຈັດຕັ້ງແຕ່ງຕັ້ງຮອງຫົວໜ້າກົມ 1 ທ່ານ ແລະ ປະກາດຂໍ້ຕົກລົງ ວ່າດ້ວຍການອະນຸມັດໃຫ້ລັດຖະກອນ ຮັບອຸດໜູນບໍານານຈໍານວນໜຶ່ງ.
ພາບ-ຂ່າວໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ, ກຜຮ
