ຕອນບ່າຍ ເວລາ 14: 00 ໂມງ ຂອງວັນທີ 17 ກຸມພາ 2021ຜ່ານມາ, ທີ່ຫ້ອງປະຊຸມທາງໄກ ຊັ້ນ 3 ກະຊວງອຸດສາຫະກຳ ແລະ ການຄ້າ ທ່ານ ນ ເຂັມມະນີ ພົນເສນາ, ລັດຖະມົນຕີກະຊວງອຸດສາຫະກຳ ແລະ ການຄ້າ ແຫ່ງ ສປປ ລາວ ພ້ອມດ້ວຍຄະນະ ໄດ້ຈັດກອງປະຊຸມ “Lao Competitiveness and Trade Project Mid-Term Review (MTR) Mission” ໂດຍການເປັນປະທານຂອງທ່ານ ນ ເຂັມມະນີ ພົນເສນາ ແລະ ປະທານຮ່ວມ Mr. Nicola Pontara, World Bank Country Manager ແລະ Ms. Jane Chandler, Deputy Ambassador, Australian Embassy ຊຶ່ງມີຜູ້ຕາງໜ້າຈາກ ທີມງານຂອງທະນາຄານໂລກ, ນັກເສດຖະສາດອາວຸໂສ ແລະ ຝ່າຍລາວຈາກກົມແຜນການ ແລະ ການຮ່ວມມື, ກົມທະບຽນ ແລະ ຄຸ້ມຄອງວິສາຫະກິດ, ກົມການນໍາເຂົ້າ ແລະ ສົ່ງອອກ ກະຊວງ ອຄ ແລະ ວິຊາການກ່ຽວຂ້ອງເຂົ້າຮ່ວມ ປະມານ 30 ທ່ານ.
ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອສະຫຼຸບທົບທວນຄືນການຈັດຕັ້ງປະຕິບັດໂຄງການ “Lao Competitiveness and Trade Project ” ໃນກາງສະໄໝ ແລະ ການນໍາສະເໜີສິ່ງທ້າທາຍໃນການຈັດຕັ້ງປະຕິບັດບັນດາແຜນກິດຈະກໍາ ໃຫ້ສໍາເລັດຕາມແຜນການ ທີ່ວາງໄວ້ ໃນຊ່ວງທີ່ຍັງສືບຕໍ່ການແຜ່ລະບາດໂລກພະຍາດ ໂຄວິດ-19; ພ້ອມທັງ ການປຶກສາຫາລື ແລະ ຕົກລົງເຫັນດີໃນດ້ານຫຼັກການ ທີ່ຈໍາເປັນຕ້ອງມີການປ່ຽນແປງ ເພື່ອໃຫ້ບັນລຸໄດ້ຕາມຜົນໄດ້ຮັບຂອງໂຄງການ ລວມເຖິງຄວາມເປັນໄປໄດ້ໃນການຂະຫຍາຍເວລາ ຂອງການຈັດຕັ້ງປະຕິບັດ ແລະ ການຈັດຫາເງິນທຶນເພີ່ມເຕີມໃສ່ໂຄງການ;
ໂຄງການ LCT ໄດ້ຮັບການອອກແບບມາເພື່ອສະໜັບສະໜູນການພັດທະນາດ້ານການຄ້າ ຂອງລັດຖະບານ ແລະ ພາກເອກະຊົນ ຊຶ່ງເນັ້ນໃສ່ການປັບປຸງສະພາບແວດລ້ອມທາງທຸລະກິດ ໂດຍປະຕິບັດຕາມຄໍາສັ່ງເລກທີ 02/ນຍ ແລະ ບູລິມະສິດ ຂອງຄໍາສັ່ງເລກທີ 03/ນຍ ໃນການຈັດຕັ້ງສະຖາບັນ ເພື່ອສົນທະນາກັບພາກເອກະຊົນ ແລະ ເພີ່ມຂີດຄວາມສາມາດໃນການແຂ່ງຂັນຂອງທຸລະກິດ, ຕະຫຼອດເຖິງການວິເຄາະນະໂຍບາຍທີ່ດີຂຶ້ນ ສໍາລັບການກໍານົດນະໂຍບາຍຕາມພື້ນຖານຂອງຫຼັກຖານ; ໂດຍໂຄງການດັ່ງກ່າວໄດ້ຮັບການສະໜັບສະໜູນທຶນ ຈາກທະນາຄານໂລກ, ລັດຖະບານອົດສະຕາລີ, ສະຫະລັດອາເມລິກາ ແລະ ສາທາລະນະລັດໄອແລນ.
ນອກຈາກນີ້, ກອງປະຊຸມຍັງໄດ້ປຶກສາຫາລື ໃນບັນຫາຕ່າງໆທີ່ຈະຕ້ອງໄດ້ເອົາໃຈໃສ່ເປັນພິເສດ ເປັນຕົ້ນສິ່ງທ້າທາຍ ແລະ ຂໍ້ສະເໜີແກ້ໄຂ ເພື່ອໃຫ້ແນ່ໃຈວ່າການດໍາເນີນການແມ່ນຖືກຕ້ອງຕາມເປົ້າໝາຍຂອງໂຄງການ ຢ່າງມີປະສິດທິຜົນ.
ແຫຼ່ງຂ່າວໂດຍ: ຫ້ອງການ ກະຊວງອຸດສາຫະກໍາ ແລະ ການຄ້າ
ຂ່າວໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
