ວັນທີ 25 ມີນາ 2021 ຜ່ານມາ, ທີ່ຫ້ອງປະຊຸມໂຮງແຮມ ທະວີສຸກ, ເມືອງວັງວຽງ ໄດ້ເປີດຊຸດຝຶກອົບຮົມພາຍໃຕ້ຫົວຂໍ້: “ການເຂົ້າໃຈດ້ານຫຼັກການ ແລະ ການນໍາໃຊ້ຂໍ້ຕົກລົງທາງການຄ້າໃນຂອບພາກພື້ນ ແລະ ສາກົນ” ຂຶ້ນຢ່າງເປັນທາງການ ໂດຍການເປັນປະທານ ຂອງທ່ານ ວຽງສະຫວ່າງ ທິບພະວົງ ຮອງຫົວໜ້າສະຖາບັນຄົ້ນຄວ້າເສດຖະກິດອຸດສາຫະກໍາ ແລະ ການຄ້າ ກະຊວງອຸດສາຫະກໍາ ແລະ ການຄ້າ, ມີຕາງໜ້າຈາກສະຫະພາບເອີຣົບ ປະຈຳລາວ, ຕາງໜ້າໂຄງການ ICT, ນັກວິທະຍາກອນຈາກຄະນະເສດຖະສາດ ແລະ ບໍລິຫານທຸລະກິດ ຂອງມະຫາວິທະຍາໄລແຫ່ງຊາດ, ກົມການນໍາເຂົ້າ-ສົ່ງອອກ, ກົມຈັດຕັ້ງ ແລະ ພະນັກງານ, ສະຖາບັນຄົ້ນຄວ້າເສດຖະກິດອຸດສາຫະກໍາ ແລະ ການຄ້າ ກະຊວງອຄ ແລະ ນັກສໍາມະນາກອນ ຈາກຫ້ອງການ ຂອງຂະແໜງການຕ່າງໆ ຂອງເມືອງ ວັງວຽງ ເຂົ້າຮ່ວມປະມານ 30 ທ່ານ.
ທ່ານປະທານໄດ້ກ່າວເຖິງຄວາມເປັນມາ ແລະ ຈຸດປະສົງຂອງໂຄງການ ຊຶ່ງໂຄງການດັ່ງກ່າວແມ່ນ ໂຄງການເຊື່ອມໂຍງພາກພື້ນອາຊຽນ ຂອງສປປ ລາວ (ASEAN Regional Integration Lao PDR project – ARISE PLUS Lao PDR ໄດ້ຮັບທຶນສະໜັບສະໜູນຈາກສະຫະພາບເອີຣົບ ຜ່ານທາງ ສູນການຄ້າສາກົນ (International trade Center- ITC) ມີເປົ້າໝາຍເພື່ອປັບປຸງສະພາບແວດລ້ອມທາງທຸລະກິດ ແລະ ອໍານວຍຄວາມສະດວກໃນການມີສ່ວນຮ່ວມຢູ່ໃນຕ່ອງໂສ້ການຜະລິດ;
ການຝຶກອົບຮົມຫົວຂໍ້: “ການສ້າງຄວາມເຂົ້າໃຈກ່ຽວກັບຫຼັກການ ແລະ ການນຳໃຊ້ຜົນໄດ້ຮັບຈາກຂໍ້ຕົກລົງການຄ້າຫລາຍຝ່າຍ ແລະ ພາກພື້ນ“ ເປັນການສືບຕໍ່ແຜນວຽກຂອງ ໂຄງການ ARISE Plus-Lao PDR ຊຶ່ງເປັນແຜນງານໄລຍະທີ່ 3 ຂອງໂຄງການ ເປັນການຝຶກອົບຮົມສ້າງຄວາມຮູ້ຄວາມເຂົ້າໃຈກ່ຽວກັບວຽກງານ ການສ້າງຄວາມເຂັ້່ມແຂງ ແລະ ອຳນວຍຄວາມສະດວກ ໃຫ້ແກ່ການເຊື່ອມໂຍງເສດຖະກິດໃນພາກພື້ນ.
ໃນການຝຶກອົບຮົມຄັ້ງນີ້ ແມ່ນດຳເນີນເປັນເວລາ 2 ວັນ ນັບແຕ່ວັນທີ 25-26/2/2021 ເວລາ 8:30 – 16:00 ຊຶ່ງບົດທີ່ນໍາມາສອນ ປະກອບມີ 04 ບົດຄື:
Session1: ເສັ້ນທາງສູ່ການຄ້າສາກົນຂອງ ສປປ ລາວ
Session2: ການເຂົ້າຮ່ວມປະຊາຄົມອາຊຽນ ຂອງ ສປປ ລາວ
Session3: ການຮ່ວມມືຂອງລາວພາຍໃຕ້ຂອບອາຊຽນ-ຄູ່ຮ່ວມເຈລະຈາ ແລະ ຂອບອະນຸພາກພື້ນ
Session4: ທິດທິພິເສດທາງດ້ານການຄ້າ (GSP) ຈາກປະເທດຄູ່ຄ້າ ຂອງ ສປປ ລາວ
ແຫຼ່ງຂ່າວ ແລະ ພາບໂດຍ: ສະຖາບັນຄົ້ນຄວ້າເສດຖະກິດອຸດສາຫະກໍາ ແລະ ການຄ້າ
ຂ່າວ ແລະ ຮຽບຮຽງໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
