ຕອນເຊົ້າ ເວລາ 09: 00 ໂມງ ຂອງວັນທີ 18 ມິຖຸນາ 2021 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ, ທ່ານ ປອ. ຄຳແພງ ໄຊສົມແພງ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ແລະ ພົບປະຂອງ ທ່ານ ໂຕສິໂອະ ນາກະເຊະ ຫົວໜ້າຫ້ອງການ ອົງການຮ່ວມມືສາກົນ JICA ປະຈຳ ສປປ ລາວ ພ້ອມຄະນະ, ມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 15 ທ່ານ.
ໂອກາດນີ້ ທ່ານ ປອ. ຄຳແພງ ໄຊສົມແພງ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ແດງຄວາມຍິນດີຕ້ອນຮັບຕໍ່ ທ່ານຫົວໜ້າຫ້ອງການອົງການ JICA ປະຈໍາ ສປປ ລາວ ເພື່ອເຮັດໃຫ້ ສອງຝ່າຍໄດ້ເສີມຂະຫຍາຍການພົວພັນທີ່ດີ ຊຶ່ງກັນ ແລະ ກັນ, ທັງສອງຝ່າຍໄດ້ປຶກສາຫາລືທົບທວນຄືນຄວາມເຂົ້າໃຈຮ່ວມກັນຫຼາຍດ້ານ ເປັນຕົ້ນ ການຮ່ວມມືດ້ານການຄ້າ, ການພັດທະນາ SME, ການຜະລິດອຸດສາຫະກໍາປຸງແຕ່ງໄມ້, ຜະລິດເຟີນິເຈີ້, ວຽກງານສົ່ງເສີມ ໜຶ່ງເມືອງໜຶ່ງຜະລິດຕະພັນ(ODOP), ຍຸດທະສາດສົ່ງເສີມການສົ່ງອອກ ແລະ ການພັດທະນາການຕະຫຼາດ, ການພັດທະນາສີມືແຮງງານ, ການພັດທະນາຊຸມຊົນ ແລະ ວຽກງານການທ່ອງທ່ຽວ ຂອງລາວ. ນອກນັ້ນຍັງໄດ້ປຶກສາຫາລືກັນໃນດ້ານວິຊາການ ທີ່ລັດຖະບານຍີ່ປຸ່ນໄດ້ໃຫ້ການຊ່ວຍເຫຼືອລາວຜ່ານມາເປັນຕົ້ນ ການເສີມສ້າງຄວາມເຂັ້ມແຂງ ແລະ ການອໍານວຍຄວາມສະດວກທາງດ້ານການຄ້າໃນຂົງເຂດພາສີ, ການພັດທະນາການທ່ອງທ່ຽວ ເພື່ອໃຫ້ສອດຄອ່ງກັບໜ່ວຍງານການຄຸ້ມຄອງມໍລະດົກໂລກ ຢູ່ແຂວງຫຼວງພະບາງ, ການພັດທະນາສີມືແຮງງານເວດສະພົງ ເພື່ອພັດທະນາສີມືແຮງງານໃນດ້ານການປຸງແຕ່ງໄມ້ ໂດຍໃຊ້ບົດຮຽນຍີ່ປຸ່ນ ຊຶ່ງປະຈຸບັນມີຫ້ອງວາງສະແດງສິນຄ້າຢູ່ປະເທດຍີ່ປຸ່ນ; ການພັດທະນາການຂົນສົ່ງ ໂລຈິດຕິກ ໃນຊ່ວງແຜ່ລະບາດໂຄວິດ-19 ບໍ່ໃຫ້ຢຸດສະຫງັດ ຊຶ່ງໄດ້ມີແຜນແມ່ບົດ ໃນການສໍາຫຼວດທ່າບົກ( Dry Pot) ທີ່ກໍາລັງດໍາເນີນງານ ບົນພື້ນຖານການສຶກສາ, ການສ້າງຖານຂໍ້ມູນໂຮງງານອຸດສາຫະກໍາ ເພື່ອເຊື່ອມຕໍ່ກັບຖານຂໍ້ມູນຂອງທະບຽນວິສາຫະກິດ ໃນການຈົດທະບຽນທາງອອນລາຍ, ການປັບປຸງຂີດຄວາມສາມາດຂອງສະໜາມບິນວັດໄຕ ທີ່ໄດ້ມອບ-ຮັບໃນຊ່ວງຜ່ານມາ, ການພັດທະນາເຂດເສດຖະກິດພິເສດ ແລະ ນິຄົມອຸດສາຫະກໍາ ເພື່ອສົ່ງເສີມການລົງທຶນຈາກຕ່າງປະເທດ, ການພັດທະນາແຮງງານລາວທີ່ເປັນໄວໜຸ່ມ ໃຫ້ມີວຽກເຮັດງານທໍາ; ການເກັບກູ້ລະເບີດບໍ່ທັນແຕກ ຢູ່ບັນດາແຂວງທີ່ມີຊາຍແດນຕິດກັບປະເທດຫວຽດນາມ, ອົງການໄຈກ້າ ໄດ້ສົ່ງອາສາສະໝັກຍີ່ປຸ່ນໄປຮ່ວມເຮັດວຽກກັບພະແນກອຸດສາຫະກໍາ ແລະ ການຄ້າໃນບັນດາແຂວງຂອງລາວ ເພື່ອຮ່ວມກັນພັດທະນາຊຸມຊົນໃຫ້ດີຂຶ້ນ ພ້ອມນີ້ຍັງມີອາສາສະໝັກໃຫ້ການສິດສອນພາສາຍີ່ປຸ່ນ ທາງອອນລາຍໃຫ້ແກ່ນັກສຶກສາລາວ; ການປູກຕົ້ນສາກຸລະ ຢູ່ເມືອງວຽງໄຊ ແຂວງຫົວພັນ ຊຶ່ງເປັນການສະແດງເຖິງສາຍພົວພັນທີ່ດີຂອງສອງລັດຖະບານ ແລະ ປະຊາຊົນຂອງສອງປະເທດ; ໃນນີ້: ທ່ານຫົວໜ້າຫ້ອງການອົງການ JICA ໄດ້ສະເໜີໃນຕໍ່ໜ້າ ຂໍການສະໜັບສະໜູນໃນວຽກງານຕ່າງໆທີ່ຕິດພັນກັບກະຊວງ ອຄ, ຈະສືບຕໍ່ໃຫ້ການຮ່ວມມື ແລະ ຊ່ວຍເຫຼືອວຽກງານຕ່າງໆທີ່ມີຄວາມຕ້ອງການພັດທະນາ ຂອງສປປ ລາວ ພ້ອມດຽວກັນນີ້ ກໍ່ສະແດງຄວາມຍິນດີທີ່ທ່ານ ລັດຖະມົນຕີ ມາຮັບຕໍາແໜ່ງໜ້າທີ່ໃໝ່ ພ້ອມທັງຂອບໃຈມາຍັງທ່ານລັດຖະມົນຕີກະຊວງ ອຄ ທີ່ໄດ້ໃຫ້ການຕ້ອນຮັບເປັນຢ່າງດີ ແລະ ໃຫ້ຄຳປຶກສາສິ່ງອຳນວຍຄວາມສະດວກໃນວຽກງານຫຼາຍດ້ານແກ່ ຂ້າພະເຈົ້າ.
ນອກນີ້, ທ່ານ ລັດຖະມົນຕີ ຍັງໝັ້ນໃຈວ່າ ກະຊວງອຸດສາຫະກໍາ ແລະ ການຄ້າ ມີຄວາມຍິນດີເປັນຢ່າງຍິ່ງທີ່ຈະສືບຕໍ່ຮ່ວມເຮັດວຽກກັບທີມງານອົງການ JICA ເພື່ອສືບຕໍ່ຈັດຕັ້ງປະຕິບັດໂຄງການຕ່າງໆໃຫ້ສໍາເລັດຕາມເປົ້າໝາຍທີ່ໄດ້ວາງໄວ້, ຊຶ່ງສຸມໃສ່ສ້າງພື້ນຖານໂຄງລ່າງ ເພື່ອສົ່ງເສີມນັກທຸລະກິດຍີ່ປຸ່ນມາລົງທຶນໃນລາວໃຫ້ນັບມື້ນັບຫຼາຍຂຶ້ນ ໃນໄລຍະການແຜ່ລະບາດຂອງພະຍາດ COVID-19, ພ້ອມນີ້ ຍັງໄດ້ສະເໜີລັດຖະບານຍີ່ປຸ່ນໃຫ້ການຊ່ວຍເຫຼືອ ສ້າງລະບົບບໍາບັດສິ່ງເສດເຫຼືອຈາກໂຮງງານອຸດສາຫະກໍາ;ການສ້າງເສດຖະກິດພິເສດ, ເສດຖະກິດສະເພາະ, ເຂດເສດຖະກິດເສລີ ຊຶ່ງເປັນການລົງທຶນໂດຍກົງຂອງລັດຖະບານຍີ່ປຸ່ນ ຈະເປັນການດີ; ການໃຫ້ຄວາມຊ່ວຍເຫຼືອປະຊາຊົນຢູ່ 4 ແຂວງພາກເໜືອ ໃນຕໍ່ໜ້າຄື: ແຂວງໄຊຍະບູລີ, ຫຼວງນໍ້າທາ, ບໍ່ແກ້ວ, ຊຽງຂວາງ ທີ່ປະສົບໄພພິບັດທໍາມະຊາດ ຝົກຕົກໜັກໄພນໍ້າຖ້ວມ; ພື້ນຖານການຄົມມະນາຄົມ ຊຶ່ງລັດຖະບານລາວມີແຜນສ້າງທາງລົດໄຟ ປະຈຸບັນທາງລົດໄຟລາວ-ຈີນກໍາລັງຈະສໍາເລັດ ຊຶ່ງເລີ່ມຈາກຄຸນໝິງ-ວຽງຈັນ, ທາງລົດໄຟລາວ-ອິນໂດເນເຊຍ ເລີ່ມຈາກຄໍາມ່ວນ-ວຸງອ່າງ, ທາງລົດໄຟລາວ-ຫວຽດນາມ ເລີ່ມຈາກຮ່າໂນ້ຍ-ວຽງຈັນ, ທາງລົດໄຟລາວ-ກໍາປູເຈຍ, ທາງລົດໄຟລາວ-ໄທ ເລີ່ມຈາກຄໍາມ່ວນ-ຊຽງໃໝ່-ພະມ້າ ເພື່ອເປັນຂໍ້ມູນເບື້ອງຕົ້ນ ໃຫ້ອົງການໄຈກ້າ ສຶກສາການຂົນສົ່ງທ່າບົກໃຫ້ມີຄວາມສະດວກຂຶ້ນ.
ຕອນທ້າຍ, ທ່ານລັດຖະມົນຕີ ກໍ່ສະແດງຄວາມຍິນດີທີ່ທ່ານຫົວໜ້າຫ້ອງການໄຈກ້າ ມາຮັບຕໍາແໜ່ງໜ້າທີ່ໃໝ່ໃນລາວ ແລະ ຂອບໃຈທີ່ມີຄໍາເຫັນຢ່າງອົບອຸ່ນ ພ້ອມທັງອວຍພອນໄຊ ໃຫ້ທ່ານຫົວໜ້າຫ້ອງການອົງການໄຈກ້າ ແລະ ຄະນະ ປະຕິບັດໜ້າທີ່ວຽກງານຢູ່ລາວ ໄດ້ຮັບຜົນສໍາເລັດຢ່າງຈົບງາມ ສືບຕໍ່ໃຫ້ການຊ່ວຍເຫຼືອລາວຕໍ່ໄປ.
ພາບ-ຂ່າວໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
