ໃນລະຫວ່າງວັນທີ 1-2 ກໍລະກົດ 2021, ທ່ານ ປອ. ຄຳ​ແພງ ໄຊ​ສົມ​ແພງ, ກຳມະການສູນກາງພັກ, ລັດ​ຖະ​ມົນ​ຕີ​ກະ​ຊວງ​ອຸດ​ສາ​ຫະ​ກຳ ແລະ ການ​ຄ້າ ໄດ້ນຳພາ​ຄະນະ ໂດຍມີບັນ​ດາ​ຫົວ​ໜ້າ​ກົມ, ຜູ້ຮັກສາ ການຫົວໜ້າຫ້ອງການ, ຮອງຫົວໜ້າຫ້ອງການ, ຮອງ​ກົມ ພ້ອມດ້ວຍຄະນະ ໄດ້​ລົງ​ໄປ​ເຄື່ອນໄຫວເຮັດວຽກ ຢູ່ແຂວງ​ເຊກອງ. ຊຶ່ງໃນ​ຕອນ​ບ່າຍ​ຂອງວັນ​ທີ 1 ກໍລະກົດ 2021, ກໍໄດ້​ພົບ​ປະ​​ໂອ້​ລົມກັບ ທ່ານ ເຫຼັກໄຫຼ  ສີວິໄລ ກໍາມະການສູນກາງພັກ, ເລຂາພັກແຂວງ, ເຈົ້າແຂວງເຊກອງ, ຊຶ່ງ ທ່ານ ປອ ຄຳ​ແພງ ໄຊ​ສົມ​ແພງ ໄດ້ສະແດງຄວາມດີໃຈ ແລະ ເປັນກຽດ ທີ່ໄດ້ມີໂອກາດ ມາເຄື່ອນໄຫວຢ້ຽມຢາມ ແລະ ສະແດງຄວາມຂອບໃຈ ການນຳແຂວງ ໂດຍສະເພາະ ທ່ານ ເລຂາພັກແຂວງ, ເຈົ້າແຂວງ ແລະ ການນຳພະແນກ ທີ່ໃຫ້ການຕ້ອນຮັບຢ່າງອົບອຸ່ນ. ໃນເວ​ລາ​ຕໍ່​ມາ ທ່ານ ປອ ຄຳ​ແພງ ໄຊ​ສົມ​ແພງ ພ້ອມ​ດ້ວຍການນຳຂັ້ນສູງຂອງແຂວງ, ພະແນກການກ່ຽວຂ້ອງຂອງແຂວງ ກໍ​ໄດ້​ເດີນ​ທາງ​ໄປ​ຢ້ຽມ​ຢາມ​ເບິ່ງ ບໍ່ຖ່ານຫີນ ຂອງບໍລິສັດ ພອນສັກກຣຸບ ທີ່ຕັ້ງ​ຢູ່​ເຂດເມືອງກະລຶມເກົ່າ ຂອງແຂວງເຊກອງ  ໂດຍແມ່ນທ່ານ ພອນສັກ ວິໄລສັກ ປະ​ທານ​ກຸ່ມບໍ​ລິ​ສັດພອນສັກ ໃຫ້​ກຽດ​ຕ້ອນ​ຮັບ ຈາກນັ້ນກໍ່ໃຫ້ທ່ານປະທານກຸ່ມບໍລິສັດພອນສັກ ຂື້ນລາຍງານການຈັດຕັ້ງປະຕິບັດ ແລະ ສະພາບລວມ ຂອງບໍ່ຖານຫີນ ຊຶ່ງມາຮອດປະຈຸບັນການຂຸດຄົ້ນບໍ່ຖ່ານ ສາມາດຂຸດຄົ້ນໄດ້ 2 ລ້ານກວ່າໂຕນ, ​ຈຸດປະສົງຫຼັກໃນການຂຸດຄົ້ນນີ້ ກໍແມ່ນເພື່ອສ້າງຕັ້ງໂຮງງານພະລັງງານໄຟ້າຄວາມຮ້ອນຖ່ານຫິນ 1.800 ເມກາວັດ  ເພື່ອຈະຂາຍໄປຍັງປະເທດກຳປູເຈຍ ຕາມການຕົກລົງຂອງລັດຖະບານ  ແລະ ມີຕະຫຼາດ​ຈຳ​ໜ່າຍ​ສົ່ງອອກໄປຍັງປະເທດຫວຽດນາມ.   ຈາກນັ້ນໃນຕອນເຊົ້າວັນທີ 2 ກໍລະກົດ 2021 ນີ້ ທ່ານ ປອ ສົມແພງ ໄຊສົມແພງ ລັດຖະມົນຕີກະຊວງອຸດສະຫະກຳ ແລະ ການຄ້າ ພ້ອມຄະນະ ລົງຢ້ຽມຢາມພົບປະ ຢູ່ພະອຸດສະຫະກຳ ແລະ ການຄ້າ ແຂວງເຊກອງ, ຊື່ຶງໄດ້ຮັບການຕ້ອນຮັບຢ່າງອົບອຸ່ນຂອງ ທ່ານ ດາວວີ ສວຍທະລັງສີ ກຳມະການພັກແຂວງ, ຫົວໜ້າພະແນກ ແລະ ບັນດາຮອງພະແນກອຸດສາຫະກໍາ ແລະ ການຄ້າແຂວງເຊກອງ ພ້ອມດ້ວຍພະນັກງານລັດຖະກອນພາຍໃນພະແນກເຂົ້າຮ່ວມ. ຊື່ງຄະນະນໍາ ກະຊວງ ອຄ ໄດ້ຮັບຟັງການຜ່ານບົດລາຍງານໂດຍຫຍໍ້ກ່ຽວກັບການຈັດຕັ້ງປະຕິບັດວຽກງານການພັດທະນາຂະແໜງອຸດສະຫະກຳ ແລະ ການຄ້າ ແຂວງເຊກອງ ໄລຍະ 6 ເດືອນຕົ້ນປີຜ່ານມາ ດ້ານອຸດສະຫະກຳປຸງແຕ່ງ ແລະ ຫັດຖະກຳແມ່ນສາມາດປະຕິບັດໄດ້ 115,31 ຕື້ກີບ ເຊິ່ງປະຕິບັດໄດ້ 84,16% ຂອງແຜນການປີທີ່ວ່າງໄວ້ ໃນນັ້ນໝວດປະເພດການຜະລິດອຸດສະຫະກຳປຸງແຕ່ງຈາກຜົນຜະລິດກະສິກຳກວມເອົາ 83,99% ເປັນຕົ້ນແມ່ນ ມັນຕົ້ນ, ກາເຟ ແລະ ຢາງພາລາ, ຮອງລົງມາແມ່ນຜະລິດຕະພັນໄມ້, ຫັດຖະກຳ ແລະ ເຄື່ອງດື່ມສະບຽງອາຫານອື່ນໆ, ທົ່ວແຂວງເຊກອງມີໂຮງງານອຸດສະຫະກຳປຸງແຕ່ງໄມ້ທັງໝົດ 30 ຫົວໜ່ວຍ, ໃນນັ້ນໂຮງງານອຸດສະຫະກຳປຸງແຕ່ງໄມ້ປະເພດ 2 (ໂຮງງານຂະໜາດກາງ) ມີ 8 ຫົວໜ່ວຍ, ໂຮງງານປຸງແຕ່ງໄມ້ປະເພດ 3 (ໂຮງງານເຟີນີເຈີ) ມີ 22 ຫົວໜ່ວຍ, ມາຮອດປະຈຸບັນ ໂຮງງານອຸດສະຫະກຳປຸງແຕ່ງ ແລະ ຫັດຖະກຳຢູ່ແຂວງມີຈຳນວນທັງໝົດ 463 ຫົວໜ່ວຍ, ດ້ານການຄ້າພາຍໃນ ແມ່ນສາມາດປະຕິບັດໄດ້ 122,15 ຕື້ກີບ ເທົ່າກັບ 98,69%, ຂອງແຜນການປີທີ່ວ່າງໄວ້, ມູນຄ່າຂາຍຍົກ-ຂາຍຍ່ອຍ 33,20 ຕື້ກີບ, ມູນຄ່າເຄື່ອນຍ້າຍພາຍໃນ 88,94 ຕື້ກີບ, ໝວດສິນຄ້າທີ່ມີມູນຄ່າກວມເອົາເປີເຊັນສູງ ແມ່ນໝວດສິນຄ້າຜະລິດຕະພັນດ້ານກະສິກຳ, ເຄື່ອງກໍ່ສ້າງ, ສະບຽງອາຫານ ແລະ ສິນຄ້າເພື່ອຮັບໃຊ້ການຜະລິດກະສິກຳອື່ນໆ.

ດ້ານວຽກງານສົ່ງເສີມວິສາຫະກິດຂະໜາດນ້ອຍ ແລະ ກາງ ແລະ ການຄ້າ ແມ່ນໄດ້ຈັດຕັ້ງປະຕິບັດໄປຕາມ 7 ຂົງເຂດນະໂຍບາຍ ຄື: ວຽກງານສົ່ງເສີມວິສະຫະກິດຂະໜາດນ້ອຍ ແລະ ກາງມີທັງໝົດ 278 ຫົວໜ່ວຍ (ຈຸນລະວິສາຫະກິດ 49 ຫົວໜ່ວຍ, ວິສາຫະກິດຂະໜາດນ້ອຍ 170 ຫົວໜ່ວຍ, ວິສາຫະກິດຂະໜາດກາງ 59 ຫົວໜ່ວຍ) ນອກນີ້ ກຳລັງສະເໜີ ຮັບຮອງເອົາຫັດຖະກຳຕ່ຳແຜ່ນແພ ພື້ນເມືອງຊົນເຜົ່າກະຕູ ບ້ານ ກັນດອນ,  ແລະ ຊົນເຜົ່າກຣຽງ ບ້ານຫ້ວຍຊາຍ ໃຫ້ເປັນໜຶງເມືອງ ໜຶ່ງຜະລິດຕະພັນ (ODOP).

        ພາຍຫຼັງໄດ້ຮັບຟັງການລາຍງານສະພາບການຈັດຕັ້ງປະຕິບັດວຽກງານອຸດສະຫະກຳ ແລະ ການຄ້າ ແຂວງເຊກອງໂດຍຫຍໍ້ແລ້ວ  ທ່ານ ປອ ຄຳແພງ ໄຊສົມແພງ ລັດຖະມົນຕີ ກະຊວງອຸດສາຫະກຳ ແລະ ການຄ້າ ກໍໄດ້ສະແດງຄວາມຍ້ອງຍໍຊົມເຊີຍຕໍ່ກັບການປະຕິບັດໜ້າທີ່ວຽກງານ ຂອງຄະນະພັກ-ຄະນະພະແນກ ກໍຄືພະນັກງານລັດຖະກອນພະແນກອຸດສະຫະກຳ ແລະ ການຄ້າແຂວງເຊກອງ. ຄຽງ​ຄູ່​ກັນນີ້,​ ທ່ານ​ຍັງໄດ້ຊີ້ນໍາໃຫ້ເອົາໃຈໃສ່ ແລະ ໄດ້ເນັ້ນໜັກຕື່ມບາງວຽກງານສະເພາະໜ້າ: ໃນນາມເປັນຂະແໜງການຮັບຜິດຊອບ ເສດຖະກິດ ພວມສຸມໃສ່ການສົ່ງເສີມການຜະລິດ-ບໍລິການ ເພື່ອຊົມໃຊ້ພາຍໃນ, ຫຼຸດຜ່ອນການນຳເຂົ້າ ແລະ ເປັນສິນຄ້າສົ່ງອອກ (ຫັນປ່ຽນໄປສູ່ສັງຄົມການຜະລິດ) ສ້າງສະພາບແວດລ້ອມທີ່ເອື້ອອຳນວຍແກ່ການດຳເນີນທຸລະກິດ, ຫຼຸດຜ່ອນຂັ້ນຂອດ ແລະ ໄລຍະເວລາໃນການອະນຸຍາດດໍາເນີນທຸລະກິດ ແລະ ສ້າງຄວາມສະດວກໃນຂອດການຈໍລະຈອນສິນຄ້າ ເຊິ່ງຕິດພັນກັບ ວາລະແຫ່ງຊາດ ວ່າດ້ວຍການແກ້ໄຂບັນຫາເສດຖະກິດ-ການເງິນ ທີ່ລັດຖະບານພວມຂຸ້ນຂ້ຽວ ຊີ້ນຳເພື່ອຈັດຕັ້ງປະຕິບັດ ໃນປັດຈຸບັນ. ເປັນຕົ້ນແມ່ນແຜນພັດທະນາອຸດສາຫະກຳປຸງແຕ່ງ ແລະ ການຄ້າ 05 ປີ (2021-2025) ເວົ້າລວມ, ເວົ້າສະເພາະ ກໍຄືແຜນພັດທະນາເສດຖະກິດ-ສັງຄົມແຫ່ງຊາດ 05 ປີ (2021-2025) ກໍແມ່ນວຽກງານການອຳນວຍຄວາມສະດວກໃນການດໍາເນີນທຸລະກິດ, ວຽກງານການ ອໍານວຍຄວາມສະດວກທາງດ້ານການຄ້າ ເຊິ່ງໄດ້ກໍານົດ ແລະ ວາງຄາດໝາຍສູ້ຊົນ ເຮັດໃຫ້ຕົວຊີ້ວັດ ຕ່າງໆໄດ້ຮັບການປັບປຸງດີຂື້ນ. ເພື່ອຮັບປະກັນໃຫ້ສາມາດບັນລຸບັນດາຄາດໝາຍທີ່ວາງໄວ້ ທາງກະຊວງ ໄດ້ກຳນົດບັນດາໜ້າວຽກທີ່ສຳຄັນໃນການປັບປຸງ-ແກ້ໄຂ ຂໍ້ຫຍຸ້ງຍາກ, ບັນຫາກົດໜ່ວງທ່ວງດຶງໂດຍສະ ເພາະໃນ: ວຽກງານອຳນວຍຄວາມສະດວກການເລີ່ມຕົ້ນທຸລະກິດ ແລະ ວຽກງານການອຳນວຍຄວາມສະດວກທາງດ້ານການຄ້າ. ນອກຈາກນັ້ນ, ໃນໄລຍະຕໍ່ໜ້ານີ້, ຂະແໜງອຸດສາຫະກໍາ ແລະ ການຄ້າ ຍັງຈະໄດ້ສຸມໃສ່ສົ່ງເສີມການຜະລິດເປັນສິນຄ້າ ໃຫ້ມີຄວາມຫຼາກຫຼາຍ, ມີການປັບປຸງ ແລະ ພັດທະນາການຜະລິດທັງທາງດ້ານປະລິມານແລະຄຸນນະພາບ ແລະ ກ້າວໄປສູ່ມາດຕະຖານ ພາກພື້ນ ແລະ ສາກົນ ທີ່ຫັນເອົານໍາໃຊ້ເຕັກໂນໂລຊີ, ນະວັດຕະກໍາໃໝ່ ແລະ ລະບົບໄອຊີທີ ເຂົ້າໃນຂະບວນການຜະລິດ ທັງໄປຕາມທິດສີຂຽວ ແລະ ຍືນຍົງ, ຫັນເປັນອຸດສາຫະກໍາ ແລະ ທັນສະໄໝ ເທື່ອລະກ້າວ ພ້ອມດຽວກັນ ກໍເພື່ອຮອງຮັບໃຫ້ ແລວທາງເສດຖະກິດລາວ-ຈີນ, ແລວທາງເສດຖະກິດອື່ນໆ ແລະ ຄວາມຕ້ອງການຂອງຕະຫຼາດທັງພາຍໃນ, ພາຍນອກໃນແຕ່ລະໄລຍະ.

          ທ່ານ ປອ ຄຳແພງ ໄຊສົມແພງ ລັດຖະມົນຕີ ກະຊວງອຸດສາຫະກຳ ແລະ ການຄ້າ ຍັງໄດ້ ເໜັ້ນຕື່ມວ່າ ດ້ານການຫັນວິກິດການແຜ່ລະບາດຂອງພະຍາດ ໂຄວິດ-19 ເປັນໂອກາດຍາດແຍ່ງຕະຫລາດ ໂດຍເພີ່ມທະວີການສົ່ງເສີມການຜະລິດສິນຄ້າກະສິກໍາ ແລະ ອຸດສາຫະກໍາທີ່ລາວເຮົາມີທ່າແຮງ ແລະ ເປັນທີ່ຕ້ອງການຂອງຕະຫລາດ.  ໂດຍສຸມໃສ່ສົ່ງເສີມແລະ ພັດທະນາກຸ່ມອຸດສາຫະກໍາທີ່ມີຢູ່ໃນປະຈຸບັນ ແລະ ອຸດສາຫະກໍາທີ່ມີທ່າແຮງໃໝ່; ອຸດສາຫະກຳທີ່ມີໃນປັດຈຸບັນ ຄື: 1) ອຸດສາຫະກໍາປຸງແຕ່ງອາຫານ ແລະ ເຄື່ອງດື່ມ; 2) ອຸດສາຫະກໍາແຜ່ນແພ, ເຄື່ອງນຸ່ງຫົ່ມ ແລະ ເກີບ; 3) ອຸດສາຫະກຳວັດສະດຸກໍ່ສ້າງ; 4) ອຸດສາຫະກຳປຸງແຕ່ງຜະລິດຕະພັນກະສິກຳ ແລະ ປ່າໄມ້; ສຳລັບອຸດສາຫະກຳທີ່ມີທ່າແຮງໃໝ່:ຄື: 1) ອຸດສາຫະກໍາປຸງແຕ່ງແຮ່ທາດໂລຫະ ແລະ ອະໂລຫະ; 2) ອຸດສາຫະກໍາເຄື່ອງໄຊ້ໄຟຟ້າ ແລະ ຊີ້ນສ່ວນເອເລັກໂຕຣນິກ; 3) ອຸດສາຫະກຳພາຫະນະ ແລະ ກົນຈັກຮັບໃຊ້ກະສິກຳ; 4) ອຸດສາຫະກຳສິ່ງພິມ ແລະ ເຄື່ອງຫຸ້ມຫໍ່.) ເຊິ່ງຈະໄດ້ຊຸກຍູ້ສົ່ງເສີມຍົກລະດັບຄວາມສາມາດໃນການແຂ່ງ ຂັນ ແລະ ເພີ່ມປະສິດຕິພາບການຜະລິດຂອງພາກອຸດສາຫະກຳປຸງແຕ່ງ ດ້ວຍການປັບປຸງ ແລະ ຍົກລະ ດັບເຕັກໂນໂລຊີ ເຂົາໃນຂະບວນການຜະລິດ.

         ພ້ອມກັນນັ້ນ, ກໍຈະໄດ້ສົ່ງເສີມການຜະລິດ ແລະ ນຳໃຊ້ຜະລິດຕະພັນອຸດສາຫະກຳພາຍໃນ ຄຶ: 1) ສ້າງນະໂຍບາຍ ແລະ ກົນໄກໃນການສົ່ງເສີມການຜະລິດ, ສົ່ງເສີມຫົວໜ່ວຍການຜະລິດທີ່ມີທ່າແຮງ ເພື່ອອໍານວຍສະໜັບສະໜູນດ້ານພາສີ-ອາກອນ ແລະ ການເຂົ້າຫາແຫຼ່ງທຶນ  ແລະ ສົ່ງເສີມການຕະຫຼາດ ແລະ ການເຂົ້າຫາຕະຫຼາດ ພາຍໃນ, ພາກພື້ນ ແລະ ສາກົນ; 2) ສົ່ງເສີມ ແລະ ພັດທະນາອຸດສາຫະກໍາ ທີ່ນໍາໃຊ້ວັດຖຸດິບພາຍໃນປະເທດ ໃຫ້ມີມູນຄ່າເພີ່ມສູງຂື້ນ ລວມທັງສົ່ງເສີມ ແລະ ສະໜັບສະໜູນການສະໜອງວັດຖຸດິບ ເພື່ອຮອງຮັບຄວາມຕ້ອງການໃນອຸດສາຫະກຳສະໜັບສະໜູນ; 3) ພ້ອມກັນສົ່ງເສີມ ແລະ ສ້າງຄ່ານິຍົມຂອງສັງຄົມໃນການຊື້ ແລະ ນໍາໃຊ້ສິນຄ້າພາຍໃນປະເທດ ໂດຍສ້າງຈິດສໍານຶກ ແລະ ໂຄສະນາເຜີຍແຜ່ນະໂຍບາຍ “ລາວເຮັດ ລາວໃຊ້ ລາວໄດ້ ລາວຈະເລີນ” ທົ່ວສັງຄົມ ດ້ວຍຫຼາຍຮູບການ ເປັນຕົ້ນ ທາງໂທລະທັດ ແລະ ສື່ສັງຄົມອອນລາຍ. 4) ຄຽງຄູ່ກັນ, ກໍຈະສົ່ງເສີມການຜະລິດພາຍໃນ ໂດຍການສ້າງຍີ່ຫໍ້ສິນຄ້າ ແລະ ເອົາໃຈໃສ່ສົ່ງເສີມການເຂົ້າເຖິງຕະຫຼາດ, ຄົ້ນຄ້ວາກໍານົດສິນຄ້າທີ່ມີທ່າແຮງສະເພາະ ທີ່ສາມາດສົ່ງອອກ ເປັນຕົ້ນ ຕະຫຼາດປະເທດໃກ້ຄຽງ ໂດຍສ້າງຂີດຄວາມສາມາດແບບມີຈຸດສຸມ ແລະ ຈັດຕັ້ງເປັນກຸ່ມຜະລິດທີ່ເຂັ້ມແຂງ ສາມາດແຂ່ງຂັນກັບພາກພື້ນໄດ້, ຂະຫຍາຍການຈັດງານວາງສະແດງອອກສູ່ທ້ອງຖິ່ນ ແລະ ຊາຍແດນ ເພື່ອໂຄສະນາສິນຄ້າ ແລະ ເພື່ອສ້າງຕະຫລາດໃຫ້ໄດ້ຫລາຍຮູບແບບ ພ້ອມທັງ ຊຸກຍູ້ວຽກງານການສົ່ງອອກສິນຄ້າກະສິກຳໃຫ້ຫລາຍຂຶ້ນ. ພ້ອມນີ້ ການພັດທະນານິຄົມອຸດສາຫະກຳ ກໍມີຄວາມສຳຄັນຫຼາຍ ເພື່ອອຳນວຍຄວາມສະດວກ ແລະ ດຶງດູດເອົານັກລົງທຶນ ທັງພາຍໃນ ແລະ ຕ່າງປະເທດ, ຈຶ່ງຈໍາເປັນໃນການຂະຫຍາຍນິຄົມອຸດສາຫະກໍາ, ການກຳນົດເຂດອຸດສາຫະກຳ ໃນແຕ່ລະແຂວງ ໂດຍສະເພາະແມ່ນ ການພັດທະນາເຂດນິຄົມອຸດສາຫະກໍາຕາມແລວທາງເສດຖະກິດ ລາວ-ຈີນ.

ບັນຫາຢາກເນັ້ນໜັກຕື່ມແມ່ນ ປະຈຸບັນສິນຄ້າທີ່ ສປປ ລາວ ກຳລັງຍື່ນສະເໜີຫາ ສປ ຈີນ ເພື່ອເຈລະຈາເປີດຕະຫຼາດເພີ່ມເຕີມ ມີທັງໝົດ ຈໍານວນ 36 ລາຍການຄື: ໃບຢາສູບ, ໝາກກຽ້ງຫວານ, ໝາກພຸກ, ໝາກນອດ, ໝາກນາວ, ສະໝຸນໄພພື້ນເມືອງ, ໝາກມີ້, ໝາກຖົ່ວລຽນ, ໝາກເດືອຍ, ໝາກເພັດສົດ, ໝາກເພັດແຫ້ງ, ຜັກບົ່ວ, ໝາກໂຕ່ນ, ຖົ່ວຂຽວ, ຖົ່ວດໍາ, ຖົ່ວແດງ, ຖົ່ວໄຕ, ຖົ່ວຍາວ, ຫົວກະລົດ, ໝາກເລັ່ນ, ໝາກເຂືອ, ເຜືອກ, ໜໍ່ໄມ້, ໝາກແຕງ, ຜັກຕະກຸນກະລໍ່າ ແລະ ຊີ້ນສັດແຊ່ແຂງ ຈຳນວນ 10 ລາຍການ. ໃນບັນດາລາຍການພືດສະເຫນີເຈລະຈາ ດັ່ງກ່າວຂ້າງເທິງ ໄດ້ເຊັນສຳເລັດແລ້ວ 3 ລາຍການຄື:​ຖົ່ວເຫລືອງຟັກສົດ(ຖົ່ວຂົນ), ຖົ່ວຟັກຍາວ ແລະ ຖົ່ວເບີ. ຕະຫຼາດຈີນພວມເປີດຮັບ ສິນຄ້າກະສິກໍາເຫຼົ່ານີ້ ຈໍານວນຫຼາຍ ພວກເຮົາຄວນສົ່ງເສີມການຜະລິດ ບັນດາສິນຄ້າເຫຼົ່ານີ້ ແລະ ປະກອບການຄ້າຕາມຂັ້ນຕອນທີ່ຝ່າຍຈີນກຳນົດ (ລາຍລະອຽດໃຫ້ທາງພະແນກ ປະສານສົມທົບກັບ ກົມສົ່ງເສີມການຄ້າ).

          ປັດຈຸບັນ, ຂະແໜງການຂອງພວກເຮົາ ໄດ້ຮັບ 2​ ວຽກງານສໍາຄັນ ຄື ວຽກມາດຕະຖານ ແລະ ວັດແທກ, ວຽກງານຊັບສິນທາງປັນຍາ ເຊິ່ງຜ່ານມາ 2​ ຂົງເຂດກໍໄດ້ເຮັດວຽກຕິດພັນກັບຂະແໜງອຸດສາຫະກຳ ແລະ ການຄ້າ ຢ່າງກົມກຽວ​ ໂດຍສະເພາະ ການພັດທະນາມາດຕະຖານສິນຄ້າ, ການບໍລິການ ແລະ ສິ່ງແວດລ້ອມ, ການກວດສອບ ແລະ ຢັ້ງຢືນຄຸນນຸພາບ, ຈົດທະບຽນອອກເລກໝາຍບາໂຄດ, ການຈົດລິຂະສິດ, ສິດທິບັດ ແລະ ຢັ້ງຢືນຕົ້ນກຳເນີດຂອງສິນຄ້າ ແລະ ຫຼາຍວຽກງານປິ່ນອ້ອມ, ໄດ້ມາໂຮມເຂົ້າກັນ ຍິ່ງເຮັດໃຫ້ຂະແໜງການເຮົາມີຄວາມເຂັ້ມແຂງ ແລະ ມີໜ້າທີ່່ການເມືອງພາຍໃນຄວາມຮັບຜິດຊອບທີ່ກວ້າງຂວາງ ແລະ ໜັກໜ່ວງຂື້ນ.ຊຶ່ງທາງພະແນກ ອຄ ຂອງແຂວງພວກເຮົາ ກໍຄືກະຊວງ ກໍພວມຂຸ້ມຂ້ຽວປັບປຸງໃນການໂຮມເອົາວຽກງານເຂົ້າມາໃນ ພາລາບົດບາດ, ການເຄື່ອນໄຫວໜ້າທີ່ ໄປພ້ອມກັບການຮັບເອົາບຸກຄະລາກອນ ເຊິ່ງພວກເຮົາຈະໄດ້ມີການປະສານສົມທົບກັນໄປແຕ່ລະໄລຍະ.ຜ່ານການລາຍງານຂອງພະແນກ ອຄ, ເຫັນວ່າ SME ໃນແຂວງ ມີ 278 ຫົວຫນ່ວຍ (ລວມທັງ 2 ຫົວຫນ່ວຍທີ່ກຳລັງສະເຫນີຂໍຢັ້ງຢືນ ໂອດອບ ຊຶ່ງແມ່ນຫັດຖະກຳຕໍ່າແຜ່ນແພພື້ນເມືອງ ຢູ່ 2 ບ້ານ ຂອງເມືອງທ່າແຕງ) ແຕ່ຍັງບໍ່ທັນມີຫົວຫນ່ວຍໃດເຂົ້າເຖິງແຫລ່ງທຶນສົ່ງເສີມ SME ບ້ວງ 200 ຕື້. ໂດຍພື້ນຖານກະຊວງ ສະຫນັບສະຫນູນເພື່ອໃຫ້ຫົວຫນ່ວຍທຸລະກິດໄດ້ຂະຫຍາຍການຜະລິດ ຈາກການເຂົ້າເຖິງແຫລ່ງທຶນຫລາຍຂື້ນ ແຕ່ເນື່ອງຈາກວ່າເປັນນະໂຍບາຍພິເສດຂອງລັດຖະບານ ເພີ່ມເຕີມຈາກການປ່ອຍກູ້ທົ່ວໄປຂອງທະນາຄານທຸລະກິດ (ດອກເບ້ຍ 3% ຕໍ່ປີ ສົມທຽບກັບ 12%) ຈຶ່ງມີການກໍານົດບາງເງື່ອນໄຂ ເຊັ່ນ: 1) ຕ້ອງແມ່ນ SME; 2) ມີແຜນທຸລະກິດທີ່ຈະແຈ້ງ ແລະ ຊັດເຈນ, 3) ນອນໃນຂະແຫນງບູລິມະສິດ ຄື: ກະສິກໍາ, ອຸດສາຫະກຳປຸງແຕ່ງຜົນຜະລິດຈາກກະສິກຳ, ຫັດຖະກຳ ແລະ ທ່ອງທ່ຽວ; 4) ໄດ້ຮັບການຝຶກອົບຮົມສ້າງຄວາມເຂັ້ມແຂງດ້ານການຄຸ້ມຄອງການເງິນ; ແລະ 5) ບໍ່ມີຫນີ້ສິນທີ່ບໍ່ເກີດດອກອອກຜົນ (NPL). ຈຸດປະສົງເພື່ອໃຫ້ຜູ້ປະກອບການປັບປຸງຕົນເອງ ແລະ ກໍເພື່ອໃຫ້ກອງທຶນດັ່ງກ່າວມີຄວາມຍືນຍົງ.ການສະເໜີໃຫ້ຄົ້ນຄວ້າການຂະຫຍາຍ ຕາໜ່າງຂອງຫົວໜ່ວຍທຸລະກິດ ເກັບຊື້ຜົນຜະລິດກະສີກຳ ( ໂດຍສະເພາະ ແມ່ນການສ້າງຕັ້ງລານມັນຕົ້ນ  ການຂະຫຍາຍຕາໜ່າງຂອງຫົວໜ່ວຍທຸລະກິດ ເກັບຊື້ຜົນຜະລິດກະສິກຳ ກໍຖືເປັນການຊຸກຍູ້ສົ່ງເສີມທາງດ້ານຄ້າ ແລະ ຊ່ວຍໃຫ້ປະຊາຊົນ ທີ່ເຮັດການກະສິກຳມີຕະຫຼາດຮອງຮັບ ສິນຄ້າກະສິກຳຫຼາຍຂື້ນ ສົ່ງເສີມໃຫ້ມີການປູກ, ການລ້ຽງຫລາຍຂື້ນ. ສຳລັບການສ້າງຕັ້ງລານມັນຕົ້ນ ເປັນຫົວໜ່ວຍໜຶ່ງ ທີ່ເກັບຊື້ມັນຕົ້ນຈາກປະຊາຊົນ ເຊິ່ງຫັນມາປູກມັນຕົ້ນຫຼາຍຂື້ນ ເນື່ອງຈາກໄດ້ຮັບຜົນໄວ ແລະ ມີລາຄາດີ ເປັນທີ່ຕ້ອງການຂອງຕະຫຼາດໃນປັດຈຸບັນ ທັງປຸງແຕ່ງ ແລະ ສົ່ງອອກ ແຕ່ເຖິງຢ່າງໃດກໍຕາມ ຄວນມີການດັດສົມໃນດ້ານຈຳນວນ ຂອງຜູ້ເກັບຊື້ ກັບປະລິມັນຕົວຈິງ ເຖິງວ່າຈະສາມາດແກ່ງແຍ້ງເແຂ່ງຂັນ ໃນກົນໄກຂອງຕະຫຼາດ, ຖ້າຫາກການຄຸ້ມຄອງຂອງກົນໄກບໍ່ຮັດກຸມ ຈະເກີດບັນຫາຍາດແຍ່ງກັນຊື້, ການກັກຕຸນສິນຄ້າ ແລະ ກຳນົດລາຄາ ລວມໄປເຖິງ ການດັດສົມປະລິມານມັນຕົ້ນ ປ້ອນໃຫ້ໂຮງງານພາຍໃນ. ເຫັນວ່າຂະແໜງການກ່ຽວຂ້ອງພາຍໃນແຂວງ ຈະໄດ້ປຶກສາຫາລື ເກັບກຳສະພາບຕົວຈິງ ເພື່ອບໍ່ໃຫ້ເກີດບັນຫາ ແລະ ແຕ່ລະຝ່າຍໄດ້ຮັບປະໂຫຍດຮ່ວມກັນ. ນອກຈາກນີ້, ຄວນປະສານສົມທົບກັບຂະແໜງການກະສິກຳ ແລະ ປ່າໄມ້ ກ່ຽວກັບ ທິດທາງຂອງແຂວງ ໃນການສົ່ງເສີມການນຳໃຊ້ທີ່ດິນ ໃຫ້ປະຊາຊົນປູກ ເຊິ່ງຕິດພັນກັບປ່າຜະລິດ ແລະ ການບຸກເບີກທີ່ດິນ ໃນຂອບເຂດປ່າ ແບບສະຊາຍ.

        ໃນຕອນທ້າຍ ທ່ານ ປອ. ຄໍາແພງ ໄຊສົມແພງ ລັດຖະມົນຕີ ກະຊວງອຸດສາຫະກຳ ແລະ ການຄ້າ ກໍໄດ້ໃຫ້ການຊີ້ນໍາອີກວ່າ ຫຼາຍບັນຫາໃນຂະ       ແໜງການພວກເຮົາ ແມ່ນຂໍໃຫ້ສືບຕໍ່ມີການປຶກສາຫາລືກັນເປັນປົກກະຕິ ເພື່ອພັດທະນາ, ປັບປຸງແກ້ໄຂ ແລະ ຊອກຫາວິທີທາງ ໃຫ້ບັນລຸເປົ້າໝາຍໃນການພັດທະນາ ເສດຖະກິດ-ສັງຄົມຂອງແຂວງ  ສືບຕໍ່ຈັດຕັ້ງປະຕິບັດວຽກງານຂົງເຂດ ອຄ ຂອງພວກເຮົາໃຫ້ມີຜົນສຳເລັດໃໝ່ ໃຫ້ກ້າວຂື້ນບໍ່ຢຸດຢັ້ງ.

ແຫຼ່ງຂ່າວ-ພາບ ໄດ້​ມາ​ຈາກ​ຫ້ອງ​ການ​ກະ​ຊວງ ອ​ຄ.

ຮຽບ​ຮຽງໂດຍ: ໄພ​ຄຳ​ອີ ວິ​ໄລ​ຄຳ ສູນ​ສະ​ຖິ​ຕິ ແລະ ຂໍ້​ມູນ​ຂ່າວ​ສານ