ນະຄອນຫຼວງວຽງຈັນ, ໃນຕອນບ່າຍ ວັນທີ 15 ກໍລະກົດ 2021ຜ່ານມາ. ກະຊວງອຸດສາຫະກໍາ ແລະ ການຄ້າ ໄດ້ຈັດກອງປະຊຸມທົບທວນການຈັດຕັ້ງປະຕິບັດໂຄງການສະໜັບສະໜູນ ສປປ ລາວ ໃນການເຊື່ອມໂຍງພາກພື້ນອາຊຽນ (ARISE Plus) ຄັ້ງທີ 04 ທີ່ໂຮງແຮມ ເມືອງແທັງ. ໂດຍໃຫ້ກຽດເປັນປະທານ ທ່ານ ສົມຈິດ ອິນທະມິດ, ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ແລະ ທ່ານ ນາງ Ina Marciulionyté, ເອກອັກຄະລັດຖະທູດ ສະຫະພາບເອີຣົບ ປະຈໍາ ສປປ ລາວ. ກອງປະຊຸມດັ່ງກ່າວໄດ້ໃຫ້ກຽດເຂົ້າຮ່ວມໂດຍຜູ້ຕາງໜ້າຈາກກົມກອງອ້ອມຂ້າງກະຊວງອຸດສາຫະກໍາ ແລະ ການຄ້າ, ຈາກກະຊວງຂະແໜງກ່ຽວຂ້ອງ, ສະພາການຄ້າ ແລະ ອຸດສາຫະກຳແຫ່ງຊາດ, ສະມາຄົມທຸລະກິດ ແລະ ຕາງໜ້າຈາກປະເທດຄູ່ຮ່ວມພັດທະນາ ລວມທັງໝົດ ມີ 50 ທ່ານ ເຂົ້າຮ່ວມໃນທີ່ປະຊຸມ ແລະ ຮ່ວມທາງໄກ.
ທ່ານ ສົມຈິດ ອິນທະມິດ, ປະທານກອງປະຊຸມ ໄດ້ເນັ້ນໜັກກ່ຽວກັບຈຸດປະສົງຫຼັກຂອງການຈັດກອງປະຊຸມດັ່ງກ່າວ ແມ່ນເປັນການທົບທວນການຈັດຕັ້ງປະຕິບັດໂຄງການ ໄລຍະ 6 ເດືອນຜ່ານມາ ຊຶ່ງເຫັນໄດ້ວ່າມີໝາກຜົນສຳເລັດໃນຫຼາຍກິດຈະກຳໂຄງການ ເຖິງວ່າຈະເປັນຊ່ວງວິກິດການແຜ່ລະບາດຂອງພະຍາດໂຄວິດ 19 ກໍ່ຕາມ ແລະ ກອງປະຊຸມຄັ້ງນີ້ຍັງຈະໄດ້ຜ່ານແຜນວຽກບູລິມະສິດຂອງ 6 ເດືອນທ້າຍປີ 2021 ແລະ ລາຍງານເພິ່ມຕື່ມ ກ່ຽວກັບການຍົກຍ້າຍກົມມາດຕະຖານ ແລະ ວັດແທກ ແລະ ກົມຊັບສິນທາງປັນຍາຈາກກະຊວງວິທະຍາສາດ ແລະ ເຕັກໂນໂລຊີ ມາສັງກັດຢູ່ກະຊວງອຸດສາຫະກໍາ ແລະ ການຄ້າ ຊຶ່ງຈະເປັນການຊ່ວຍໜູນວຽກງານການຢັ້ງຢືນ GI ໃນການຍົກລະດັບມາດຕະຖານ ກາເຟປາກຊ່ອງ ໃຫ້ສາມາດສົ່ງອອກໄປຕະຫຼາດອີຢູ ເພີ່ມຂຶ້ນ.
ທ່ານ ນາງ Ina Marciulionyté , ເປັນປະທານຮ່ວມກອງປະຊຸມທົບທວນຄືນການຈັດຕັ້ງປະຕິບັດໂຄງການ ໄດ້ເນັ້ນໜັກເຖິງໝາກຜົນສໍາເລັດໃນການຈັດຕັ້ງປະຕິບັດກິດຈະກຳທີ່ຜ່ານມາໃນ 06 ເດືອນ ຕົ້ນປີ 2021 ເຊັ່ນ: ໂຄງການຝຶກອົບຮົມນັກກວດກາຄຸນນະພາບໄດ້ຈັດຕັ້ງປະຕິບັດຕາມແຜນ, ສໍາເລັດແຜນພັດທະນາການສົ່ງອອກຂະແໜງອຸດສາຫະກຳປຸງແຕ່ງໄມ້ ແລະ ຂະແໜງກາເຟ ຂອງ ສປປ ລາວ, ການປະຕິບັດແຜນງານການເຈລະຈາດ້ານການຄ້າ, ສໍາເລັດວຽກງານປະເມີນຄຸນນະພາບ, ເປັນຕົ້ນ.
ກອງປະຊຸມໄດ້ດໍາເນີນໄປຕາມວາລະ ໂດຍມີການນຳສະເໜີລາຍງານຄວາມຄືບໜ້າການຈັດຕັ້ງປະຕິບັດໂຄງການ 6 ເດືອນຜ່ານມາ ຢ່າງລະອຽດ ໂດຍຜູ້ຕາງໜ້າຈາກສູນການຄ້າສາກົນຈາກປະເທດສະວິດເຊີແລນ ຜ່ານລະບົບອອນໄລ ແລະ ທັງນຳສະເໜີແຜນປີ 6 ເດືອນທ້າຍປີ 2021. ນອກຈາກນັ້ນ, ຍັງໄດ້ປຶກສາຫາລື ສິ່ງທ້າທາຍໃນການຈັດຕັ້ງປະຕິບັດໂຄງການ ໃນວຽກງານປຸງແຕ່ງໄມ້ ຂອງພາກທຸລະກິດ ແລະ ຂະແໜງການກາເຟ.
ໂຄງການສະໜັບສະໜູນ ສປປ ລາວ ໃນການເຊື່ອມໂຍງພາກພື້ນອາຊຽນ (ARISE Plus) ເປັນໂຄງການທີ່ຮ່ວມມືກັບກະຊວງອຸດສາຫະກໍາ ແລະ ການຄ້າ ໂດຍຜ່ານ ພະແນກຄຸ້ມຄອງການຈັດຕັ້ງປະຕິບັດໂຄງການຊ່ວຍເຫຼືອຂອງຕ່າງປະເທດ (NIU), ກົມແຜນການ ແລະ ການຮ່ວມມື. ໂຄງການດັ່ງກ່າວມີຈຸດປະສົງແນໃສ່ການສົ່ງເສີມການເຕີບໃຫຍ່ຂະຫຍາຍຕົວຂອງເສດຖະກິດແບບມີສ່ວນຮ່ວມ, ສົ່ງເສີມການຟື້ນຟູຈາກຜົນກະທົບຂອງການປ່ຽນແປງສະພາບອາກາດ, ຫຼຸດຜ່ອນຄວາມສ່ຽງ ແລະ ສ້າງວຽກເຮັດງານທໍາໃນ ສປປ ລາວ.
