ຕອນບ່າຍ ເວລາ 14: 00 ໂມງ ຂອງວັນທີ 19 ກໍລະກົດ 2021 ຜ່ານມາ ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ ທ່ານ ປອ ຄຳແພງ ໄຊສົມແພງ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂໍ່ານັບ ຂອງ ທ່ານ ກອງມາລາ ພົມມາໄລ, ຊຶ່ງດຳລົງຕຳແໜ່ງເປັນປະທານ ສະມາຄົມເຟີນິເຈີ້ລາວ ສະໄໝທີ 4 ພ້ອມຄະນະ, ໂດຍມີຈຸດປະສົງສະແດງຄວາມຍິນດີ ຕໍ່ທ່ານ ປອ ຄຳແພງ ໄຊສົມແພງ ທີ່ໄດ້ຮັບໜ້າທີ່ເປັນລັດຖະມົນຕີກະຊວງ ອຄ ຜູ້ໃໝ່ ແລະ ສະເໜີຕົວ ຄະນະຮັບຜິດຊອບທີ່ໄດ້ຮັບການແຕ່ງຕັ້ງໃໝ່ ພ້ອມທັງປຶກສາຫາລືແລກປ່ຽນວຽກງານການດຳເນີນທຸລະກິດເຟີນິເຈີ້ລາວ; ການເຂົ້າຢ້ຽມຂໍ່ານັບຄັ້ງນີ້ ມີຜູ້ຕາງໜ້າທັງສອງຝ່າຍເຂົ້າຮ່ວມປະມານ 13 ທ່ານ.
ໂອກາດນີ້ ທ່ານ ປອ ຄຳແພງ ໄຊສົມແພງ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ແດງຄວາມຍ້ອງຍໍຊົມເຊີຍຕໍ່ ທ່ານ ກອງມາລາ ພົມມາໄລ, ໄດ້ນໍາພາຄະນະມາພົບປະປຶກສາຫາລືແລກປ່ຽນບົດຮຽນ ແລະ ລາຍງານຕໍ່ທ່ານຊາບກ່ຽວກັບການເຄື່ອນໄຫວວຽກງານ ຂອງສະມາຄົມເຟີນິເຈີ້ລາວໃນໄລຍະຜ່ານມາ ແລະ ສະເໜີຂໍ້ຄົງຄ້າງເພື່ອໃຫ້ທາງພາກລັດຊ່ວຍ ສົ່ງເສີມ ແລະ ແກ້ໄຂໃນຕໍ່ໜ້າເປັນຕົ້ນ: 1/ ການເຂົ້າເຖິງວັດຖຸດິບ ເພື່ອປ້ອນເຂົ້າໂຮງງານ ເນື່ອງຈາກໄລຍະການແຜ່ລະບາດພະຍາດໂຄວິດ-19 ເຮັດໃຫ້ສະພາບວັດຖຸດິບປ້ອນເຂົ້າໂຮງງານບໍ່ມີຄວາມຕໍ່ເນື່ອງ; 2/ ການເຂົ້າເຖິງແຫຼ່ງທຶນ ທີ່ມີອັດຕາດອກເບ້ຍຕໍ່າ; 3/ ສະຖານທີ່ ຈັດວາງສະແດງສິນຄ້າ ແລະ ຕະຫຼາດຈໍາໜ່າຍຜະລິດຕະພັນໄມ້(ເຟີນິເຈີ້)ສະເພາະ; 4/ ມາດຕະຖານຜະລິດຕະພັນໄມ້ ເພື່ອການສົ່ງອອກ; 5/ ການຕະຫຼາດ ທັງພາຍໃນ ແລະ ຕ່າງປະເທດ; 6/ ການສົ່ງເສີມພາຍໃນ ໃຫ້ມີການປະມູນໄມ້ແບບແຍກປະເພດ; 7/ ການໃຫ້ສິດທິພິເສດ ໃນການເຂົ້າເຖິງການປະມູນໄມ້ ແລະ ສົ່ງເສີມການຊົມໃຊ້ຜະລິດຕະພັນໄມ້(ເຟີນິເຈີ້)ພາຍໃນ ນໍາຜູ້ຜະລິດຕົວຈິງ.
ນອກຈາກນີ້, ບັນດາກົມກ່ຽວຂ້ອງ ແລະ ຫ້ອງການຂອງກະຊວງ ອຄ ໄດ້ໃຫ້ຄໍາຄິດເຫັນ ແລະ ສະເໜີແຜນການຮ່ວມມື ໃນຕໍ່ໜ້າ ເພື່ອແກ້ໄຂບັນຫາທີ່ຄົງຄ້າງ ໃຫ້ຄະນະສະມາຄົມເຟີນິເຈີ້ລາວໄດ້ຮັບຊາບ.
ຕອນທ້າຍ ທ່ານ ລັດຖະມົນຕີ ສະແດງຄວາມຍິນດີຕໍ່ທ່ານ ກອງມາລາ ພົມມາໄລ ພ້ອມຄະນະ ທີ່ໄດ້ຮັບການແຕ່ງຕັ້ງຄະນະຊຸດໃໝ່ ແລະ ຂອບໃຈ ມາລາຍງານສະພາບການເຄື່ອນໄຫວວຽກງານໃຫ້ຮັບຊາບ ພ້ອມທັງສະເໜີຂໍ້ຄົງຄ້າງ ເພື່ອແກ້ໄຂວຽກງານການຜະລິດເຟີນິເຈີ້ ຂອງລາວໃຫ້ໄດ້ຮັບການພັດທະນາດີຂຶ້ນໃນຕໍ່ໜ້າ ແລະ ໃຫ້ຮັກສາການພົວພັນຕິດຕໍ່ຊຶ່ງກັນ ແລະ ກັນ.
ພາບ-ຂ່າວໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ
