ຕອນເຊົ້າ 9:00 ໂມງ ຂອງວັນທີ 22 ກໍລະກົດ 2021 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ, ທ່ານ ປອ ຄໍາແພງ ໄຊສົມແພງ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບການ ເຂົ້າຢ້ຽມຂໍ່ານັບຂອງ ທ່ານ ນາງ Leow Siu Lin, ເອກອັກຄະລັດຖະທູດ ແຫ່ງ ສາທາລະນະລັດ ສິງກະໂປ ປະຈຳສປປ ລາວ ແລະ ເລຂານຸການໂທ(ທີ່ປຶກສາການເມືອງ ແລະ ເສດຖະກິດ), ໂດຍມີຈຸດປະສົງສະແດງຄວາມຍິນດີ ຕໍ່ທ່ານ ປອ ຄຳແພງ ໄຊສົມແພງ ທີ່ໄດ້ຮັບໜ້າທີ່ເປັນລັດຖະມົນຕີກະຊວງ ອຄ ຜູ້ໃໝ່ ແລະ ປຶກສາຫາລືແຜນການຮ່ວມມືໃນຕໍ່ໜ້າ ຊຶ່ງມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 9 ທ່ານ.
ໂອກາດນີ້ ທ່ານ ປອ ຄໍາແພງ ໄຊສົມແພງ ກໍ່ແດງຄວາມຍິນດີຕ້ອນຮັບຕໍ່ ທ່ານ ນາງ Leow Siu Lin, ທີ່ໄດ້ມາພົບປະຄັ້ງນີ້ ຊຶ່ງສອງປະເທດ ລາວ-ສິງກະໂປ ໄດ້ມີການພົວພັນທີ່ດີຕໍ່ກັນ ແລະ ສປປ ລາວໄດ້ຮັບການຊ່ວຍເຫຼືອດ້ານເສດຖະກິດ-ສັງຄົມຈາກສິງກະໂປ ເປັນຕົ້ນ ດ້ານໄພພິບັດທາງທໍາມະຊາດ, ການສ້າງຊັບພະຍາກອນມະນຸດ(ດ້ານການສຶກສາ), ຊ່ວງໄລຍະສອງປີມານີ້ ການແຜ່ລະບາດພະຍາດໂຄວິດ-19 ເຮັດໃຫ້ການໄປມາຫາສູ່ກັນບໍ່ຄ່ອຍມີ ແຕ່ການແລກປ່ຽນຂໍ້ມູນຂ່າວສານໂດຍຜ່ານການປະຊຸມທາງໄກ ໄດ້ເຮັດເປັນສ່ວນໃຫຍ່; ການຮ່ວມມືພັດທະນາບຸກຄະລາກອນໄລຍະສັ້ນ-ກາງ-ຍາວໃນຕໍ່ໜ້າ ສະເໜີໃຫ້ການຊ່ວຍເຫຼືອໃນຮູບແບບຕ່າງໆເປັນຕົ້ນການຝຶກອົບຮົມ ໃນໄລຍະແຜ່ລະບາດພະຍາດໂຄວິດ-19 ບໍ່ວ່າດ້ານທັກສະການເຈລະຈາ, ການເປັນຜູ້ປະກອບການໃຫມ່, ການຄ້າເອເລັກໂຕຼນິກ, ການປົກປ້ອງຜູ້ຊົມໃຊ້: ການແຂ່ງຂັນດ້ານການຄ້າ, ການພັດທະນາອຸດສາຫະກຳ 4.0, ການສົ່ງເສີມການຄ້າ ແລະ ທຸລະກິດຂະໜາດນ້ອຍ-ກາງ, ການຝຶກຄູສອນພາສາອັງກິດ, ສືບຕໍ່ແລກປ່ຽນການປະຊຸມພາກທຸລະກິດຂອງສອງປະເທດໃຫ້ຫຼາຍຂຶ້ນ ໂດຍອີງຕາມບົດບັນທຶກຄວາມເຂົ້າໃຈຮ່ວມກັນ ທີ່ສະພາອຸດສາຫະກໍາ ແລະ ການຄ້າຂອງສອງປະເທດໄດ້ເຊັນກັນ; ການອໍານວຍຄວາມສະດວກ ຫຼື ສ້າງພື້ນຖານໂຄງລ່າງໃນການດໍາເນີນທຸລະກິດ ໃນເຂດເສດຖະກິດພິເສດ, ເຂດເສດຖະກິດສະເພາະ, ນິຄົມອຸດສາຫະກໍາ ແລະ ສົ່ງເສີມດຶງດູດການລົງທຶນຂອງສິງກະໂປ ໃຫ້ທຸລະກິດລາວຮັບຮູ້ ແລະ ເຂົ້າໃຈເພີ່ມຕື່ມ; ບົດຮຽນຂອງປະເທດສິງກະໂປໃນການພັດທະນາອຸດສາຫະກໍາ, ການທ່ອງທ່ຽວ, ການຮັກສາສິ່ງແວດລ້ອມ ໂດຍສະເພາະການພັດທະນາເຂດການຄ້າເສລີ ຢາກຖອດຖອນບົດຮຽນໃນການດໍາເນີນງານ ແລະ ຮຽນຮູ້ໃນການພັດທະນາ; ສະເໜີໃຫ້ທ່ານເອກອັກຄະລັດຖະທູດຊ່ວຍຜັກດັນ ໃນການສະໜັບສະໜູນຂໍ້ສະເໜີ ສປປ ລາວ ໃນຂອບອົງການການຄ້າໂລກ (WTO) ກ່ຽວກັບ ຄວາມໝັ້ນຄົງດ້ານສະບຽງອາຫານ ແລະ ຂໍ້ລິເລີ່ມ ການອໍານວຍຄວາມສະດວກໃນການລົງທຶນ ເພື່ອການພັດທະນາ ຊຶ່ງໄດ້ນໍາສະເໜີໃນກອງປະຊຸມເຈລະຈາ “Negotiating Meeting” ທີ່ ອຄລ ໃນລະຫວ່າງ 12–13 ກໍລະກົດ 2021; ໃນຖານະທີ່ສິງກະໂປເປັນປະເທດສະມາຊິກອາຊຽນເກົ່າ ສະເໜີໃຫ້ສິງກະໂປສືບຕໍ່ໃຫ້ການຊ່ວຍເຫຼືອ ແລະ ສະໜັບສະໜູນ ສປປ ລາວ ທີ່ເປັນສະມາຊິກອາຊຽນໃໝ່ ໂດຍສະເພາະໃນວຽກງານຫຼຸດຜ່ອນຄວາມແຕກໂຕນທາງດ້ານການພັດທະນາລະຫວ່າງຕົວເມືອງ ແລະ ຊົນນະບົດ; ສະເໜີໃຫ້ທ່ານເອກອັກຄະລັດຖະທູດຊ່ວຍຜັກດັນ ໃນການສະໜັບສະໜູນການເຂົ້າເປັນພາຄີຂອງສັນຍາວ່າດ້ວຍ ເຕັກໂນໂລຊີຂໍ້ມູນຂ່າວສານ (Information Technology Agreement: ITA) ຂອງ ສປປ ລາວ ພາຍໃຕ້ຂອບ WTO; ອີກຢ່າງໜຶ່ງ ໃຫ້ມີການພົບປະແລກປ່ຽນຊຶ່ງກັນ ແລະ ກັນ ບໍ່ວ່າຈະເປັນການຢ້ຽມຢາມແລກປ່ຽນບົດຮຽນ ຫລື ດ້ານຂໍ້ມູນຂ່າວສານທາງດ້ານອຸດສາຫະກຳ ແລະ ການຄ້າ. ນອກນັ້ນຍັງໄດ້ປຶກສາຫາລືກັນໃນວຽກງານ ການເປີດຕະຫຼາດທຸລະກິດການຜະລິດສິນຄ້າຫຸ້ມຫໍ່ ເພື່ອສົ່ງອອກ; ໃນໂອກາດທີ່ທາງລົດໄຟລາວ-ຈີນຈະເປີດນໍາໃຊ້ຢ່າງເປັນທາງໃນມໍ່ໆນີ້ ຢາກໃຫ້ຝ່າຍສິງກະໂປຊ່ວຍຊຸກຍູ້ສົ່ງເສີມ ໃຫ້ນັກທຸລະກິດມາລົງທຶນດ້ານກະສິກໍາປູກຝັງ, ລ້ຽງສັດໃນລາວ ແລະ ທ່ານ ນາງ Leow Siu Lin ເອກອັກຄະລັດຖະທູດ ໄດ້ລາຍງານກ່ຽວກັບ ການຮ່ວມມືໄລຍະຜ່ານມາເປັນຕົ້ນ ຄວາມມຸ່ງໝັ້ນທີ່ຈະສ້າງຄວາມສາມາດໃນການພັດທະນາຊັບພະຍາກອນມະນຸດ ໂດຍການຝຶກອົບຮົມສ້າງຄວາມເຂັ້ມແຂງດ້ານວິຊາການ ໃຫ້ແກ່ພະນັກງານວິຊາການຂອງລາວ ໃນດ້ານຕ່າງໆ ໂດຍສະເພາະການຍົກລະດັບພາສາອັງກິດ, ການຄ້າເອເລັກໂຕນິກ ແລະ ການຮຽນຮູ້ອື່ນໆ ຊຶ່ງໄດ້ຮ່ວມເຮັດວຽກກັບກະຊວງການຕ່າງປະເທດຂອງລາວ ໃນການສິດສອນພະນັກງານ; ນັບຕັ້ງແຕ່ປີ 1993 ປະມານ 15,000ຄົນ ທີ່ເປັນພະນັກງານລັດຖະບານລາວໄດ້ຮັບຜົນປະໂຫຍດ. ໃນເດືອນມັງກອນ 2019, ອາຄານໃໝ່ໄດ້ສໍາເລັດ ແລະ ເປີດໃຫ້ການຝຶກອົບຮົມ ຊຶ່ງເອີ້ນວ່າ “ສູນການຮ່ວມມື ລາວ-ສິງກະໂປ” ຢູ່ນະຄອນຫຼວງວຽງຈັນ; ຝ່າຍສິງກະໂປໄດ້ຊ່ວຍປະຊາສໍາພັນໃຫ້ນັັກທຸລະກິດຕົນ ເຫັນໄດ້ໂອກາດໃນການລົງທຶນໃນລາວ ບໍ່ວ່າຈະເປັນດ້ານໂລຈິດຕິກ, ການບໍລິການ, ການຂົນສົ່ງ, ການສົ່ງເສີມຫັດຖະກໍາລາວ; ພ້ອມທັງມີບາງບໍລິສັດຂອງສິງກະໂປມີຄວາມສົນໃຈ ໃນດ້ານການສຶກສາຂອງລາວ ໃນຕໍ່ໜ້າຢາກມາສຶກສາພາກປະຕິບັດຕົວຈິງຢູ່ລາວ; ໃນຕໍ່ໜ້າທ່ານລັດຖະມົນຕີກະຊວງການຄ້າຂອງສິງກະ
ໂປຄົນໃໝ່ ຈະມາຮ່ວມເຮັດວຽກນໍາທ່ານລັດຖະມົນຕີກະຊວງ ອຄ ໃນຂອບການຮ່ວມມືບັນດາປະເທດອາຊຽນ ແລະ ຕອບຮັບການສະເໜີຂອງທ່ານ ລັດຖະມົນຕີ ໃນຕໍ່ໜ້າຈະໃຫ້ການຮ່ວມມື, ຕິດຕາມຊຸກຍູ້ ວຽກງານຕ່າງໆ, ການໃຫ້ຄຳປຶກສາສິ່ງອຳນວຍຄວາມສະດວກໃນວຽກງານການຫັນເປັນຍຸກດີຈິຕອນ ບໍ່ວ່າດ້ານການແລກປ່ຽນຂໍ້ມູນຂ່າວສານດ້ານເຕັກໂນໂລຊີ ໃຫ້ແກ່ ກະຊວງ ອຄ ກໍ່ຄື ສປປ ລາວ.
ໃນຕອນທ້າຍ ທ່ານ ລັດຖະມົນຕີກະຊວງອຸດສາຫະກໍາ ແລະ ການຄ້າ ສະແດງຄວາມຂອບໃຈ ຕໍ່ ທ່ານ ເອກອັກຄະລັດຖະທູດ ໃນການຮ່ວມມືເປັນຢ່າງດີ ແລະ ການໃຫ້ຄໍາເຫັນທີ່ຈົບງາມ ໂດຍສະເພາະວຽກງານຂອງກະຊວງ ອຄ ແລະ ທ່ານ ເອກອັກຄະລັດຖະທູດ ກໍ່ສະແດງຄວາມຂອບໃຈ ມາຍັງ ທ່ານລັດຖະມົນຕີ ກະຊວງ ອຄ ທີ່ໃຫ້ການຕ້ອນຮັບຢ່າງອົບອຸ່ນ ແລະ ດ້ວຍໄມຕີຈິດມິດຕະພາບ.
ພາບ ແລະ ຂ່າວໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
