ໃນວັນທີ 2 ກັນຍາ 2021, ທີ່ຫ້ອງປະຊຸມທາງໄກຊັ້ນ 3, ຫ້ອງການກະຊວງອຸດສາຫະກໍາ ແລະ ການຄ້າໄດ້ຈັດກອງປະຊຸມເຜີຍແຜ່ທາງໄກຂຶ້ນ ໂດຍຈຸດປະສົງຕົ້ນຕໍ ຂອງກອງປະຊຸມເພື່ອເຜີຍແຜ່ແນະນຳ ກ່ຽວກັບບັນດານິຕິກຳໃນຂົງເຂດວຽກງານຊັບສິນທາງປັນຍາ, ມາດຕະຖານ ແລະ ວັດແທກ, ເພື່ອສ້າງຄວາມເຂົ້າໃຈ ພາຍຫຼັງຍ້າຍມາຂຶ້ນກັບກະຊວງອຸດສາຫະກຳ ແລະ ການຄ້າແລ້ວ ຈະສືບຕໍ່ຈັດຕັ້ງປະຕິບັດຄືແນວໃດ; ພ້ອມນີ້ ກໍ່ແນະນຳກ່ຽວກັບ ຈັດຕັ້ງປະຕິບັດລັດຖະບັນຍັດ ຂອງປະທານປະເທດ ວ່າດ້ວຍຄ່າທຳນຽມ ແລະ ຄ່າບໍລິການ ສະບັບປັບປຸງໃໝ່ ໂດຍອີງໃສ່ແຈ້ງການຄື:
- ແຈ້ງການ ກ່ຽວກັບການຈັດຕັ້ງປະຕິບັດນິຕິກຳຂົງເຂດວຽກງານ ຊັບສິນທາງປັນຍາ, ມາດຕະຖານ ແລະ ວັດແທກ ສະບັບເລກທີ 0793/ອຄ.ຫອຄ, ລົງວັນທີ 25 ສິງຫາ 2021;
- ແຈ້ງການ ສະບັບເລກທີ 1321/ອຄ.ຫອຄ, ລົງວັນທີ 20 ສິງຫາ 2021 ກ່ຽວກັບການເລີ່ມຈັດຕັ້ງປະຕິບັດຄ່າທຳນຽມ ແລະ ຄ່າບໍລິການ ຂອງຂະແໜງ ອຸດສາຫະກຳ ແລະ ການຄ້າ ຕາມລັດຖະບັນຍັດ ວ່າດ້ວຍຄ່າທຳນຽມ ແລະ ຄ່າບໍລິການ ສະບັບປັບປຸງໃໝ່.
ກອງປະຊຸມ ເປັນປະທານໂດຍ ທ່ານ ປອ. ຄຳແພງ ໄຊສົມແພງ ລັດຖະມົນຕີ ກະຊວງອຸດສາຫະກຳ ແລະ ການຄ້າແລະ ຂຶ້ນອ່ານຜ່ານບົດສະຫຼຸບການຈັດຕັ້ງປະຕິບັດວຽກງານຊັບສິນທາງປັນຍາ ແລະ ວຽກງານມາດຕະຖານ-ວັດແທກ ໄລຍະຜ່ານມາ ໂດຍທ່ານຫົວໜ້າກົມຊັບສິນທາງປັນຍາ ແລະ ໃຫ້ການອະທິບາຍຊີ້ແຈງ, ແລກປ່ຽນຄຳຄິດເຫັນ ກັບບັນດາທ່ານຜູ້ເຂົ້າຮ່ວມ ໃນຂົງເຂດວຽກງານພາຍໃຕ້ຄວາມຮັບຜິດຊອບຂອງຕົນ ທີ່ໄດ້ເລີ່ມຈັດຕັ້ງປະຕິບັດແລ້ວ; ແຕ່ເພື່ອໃຫ້ບັນດາທ່ານ ຢູ່ກົມກອງພາຍໃນກະຊວງ ແລະ ພະແນກອຸດສາຫະກຳ ແລະ ການຄ້າ ແຂວງ, ນະຄອນຫຼວງ, ຫ້ອງການອຸດສາຫະກຳ ແລະ ການຄ້າ ເມືອງ, ນະຄອນ ໃນຂອບເຂດທົ່ວປະເທດ ເຂົ້າໃຈເນື້ອໃນຈິດໃຈຂອງແຈ້ງການ 2 ສະບັບນັ້ນ ຢ່າງຈະແຈ້ງ ແລະ ເປັນເອກະພາບກັນ; ການອະທິບາຍຊີ້ແຈງ ແລະ ແລກປ່ຽນຄຳຄິດເຫັນ ຢ່າງກົງໄປກົງມາ ກັບບັນດາທ່ານ ໃນຂົງເຂດວຽກງານພາຍໃຕ້ຄວາມຮັບຜິດຊອບຂອງຕົນແມ່ນໄດ້ດໍາເນີນໄປຢ່າງກະທັດຮັດ ຊຶ່ງເປັນການປັບຕົວເຂົ້າກັບວິຖີການດຳລົງຊີວິດແບບໃໝ່ ຫຼື New Normal,ທີ່ອາດມີຫຼາຍອັນສະດວກ, ຫຼາຍອັນທ້າທາຍ ບໍ່ວ່າຈະເປັນການເຊື່ອມຕໍ່ ໃນຮູບແບບອື່ນໆ.
ຕອນທ້າຍ ທ່ານ ລັດຖະມົນຕີ ໄດ້ອວຍພອນຕໍ່ກອງປະຊຸມ ຈົ່ງດຳເນີນໄປດ້ວຍບັນຍາກາດອັນຟົດຟຶ້ນ ແລະ ປະສົບຜົນສຳເລັດຕາມລະດັບຄາດໝາຍ ທີ່ວາງໄວ້. ຂໍອວຍພອນໄຊ ໃຫ້ແກ່ບັນດາທ່ານທີ່ເຂົ້າຮ່ວມກອງປະຊຸມ ຈົ່ງມີສຸຂະພາບເຂັ້ມແຂງ, ພາລະນາໄມສົມບູນ, ຫ່າງໄກຈາກພະຍາດ ໂຄວິດ 19 ແລະ ພະຍາດໂລຄາອື່ນໆ, ໃຫ້ມີຜົນສຳເລັດໃນໜ້າທີ່ວຽກງານ ທັງມີຄວາມສຸກໃນຊີວິດ ສ່ວນຕົວ ແລະ ຄອບຄົວ.
ພາບ-ຂ່າວ ໂດຍ: ໄພຄຳອີ ວິໄລຄຳ ສູນສະຖິຕິ ແລະ ຂໍ້ມູນຂ່າວສານ. ກຜຮ, ກະຊວງ ອຄ.
