ໃນຕອນເຊົ້າ, ວັນທີ 26 ມັງກອນ 2022, ທ່ານ ປອ. ຄຳແພງ ໄຊສົມແພງ, ກຳມະການສູນກາງພັກ, ລັດຖະມົນຕີ ກະຊວງອຸດສາຫະກຳ ແລະ ການຄ້າ ໄດ້ນຳພາຄະນະ ໂດຍປະກອບມີບັນດາຫົວໜ້າກົມ, ຮັກສາການຫົວໜ້າຫ້ອງການ, ຫົວໜ້າພະແນກ ພ້ອມດ້ວຍວິຊາການ ໄດ້ພົບປະຢ້ຽມຢາມ ກັບ ທ່ານ ຄໍາພັນ ສິດທິດໍາພາ, ກໍາມະການສູນກາງພັກ, ເລຂາພັກແຂວງ, ເຈົ້າແຂວງ ແຂວງວຽງຈັນ ພ້ອມດ້ວຍຄະນະ ໂດຍມີຫົວໜ້າຫ້ອງວ່າການປົກຄອງແຂວງ, ຫົວໜ້າພະແນກ ອຸດສາຫະກຳ ແລະ ການຄ້າ ແຂວງ ແລະ ຄະນະ ຢູ່ທີ່ຫ້ອງວ່າການປົກຄອງແຂວງ ແຂວງວຽງຈັນ, ໃນໂອກາດດັ່ງກ່າວນີ້ ທ່ານ ເຈົ້າແຂວງ ແຂວງວຽງຈັນ ກໍໄດ້ກ່າວສະແດງຄວາມຕ້ອນຮັບ ທ່ານ ປອ. ຄຳແພງ ໄຊສົມແພງ, ກຳມະການສູນກາງພັກ, ລັດຖະມົນຕີ ກະຊວງອຸດສາຫະກຳ ແລະ ການຄ້າ ພ້ອມດ້ວຍຄະນະ ດ້ວຍຄວາມອົບອຸ່ນໃນການລົງມາເຄື່ອນໄຫວເຮັດວຽກຢູ່ແຂວງວຽງຈັນ ໃນຄັ້ງນີ້, ທ່ານເຈົ້າແຂວງ ແຂວງວຽງຈັນ ໄດ້ລາຍງານສະພາບການພັດທະນາເສດຖະກິດ-ສັງຄົມຂອງແຂວງ, ຈຸດພິເສດ-ທີ່ຕັ້ງ, ທ່າແຮງບົ່ມຊ້ອນທີ່ສຳຄັນໃນການພັດທະນາແຂວງ ເປັນຕົ້ນແມ່ນ: ທ່າແຮງທາງດ້ານກະສິກຳ-ປ່າໄມ້, ແຫຼ່ງຊັບພະຍາກອນທຳມະຊາດ, ທ່າແຮງທາງດ້ານການເຊື່ອມໂຍງຕາມແລວເສດຖະກິດ ທີ່ທາງແຂວງເຫັນວ່າຈະເປັນ ປະຕູເຂົ້າ-ອອກ ທາງພາກເໜືອ ຂອງນະຄອນຫຼວງວຽງຈັນ ແລະ ທ່າແຮງທາງດ້ານການທ່ອງທ່ຽວ ໂດຍສະເພາະແມ່ນ ເມືອງວັງວຽງ ແລະ ເມືອງອ້ອມຂ້າງອື່ນໆ ທີ່ມີທ່າແຮງບົ່ມຊ້ອນໃນການປູກຝັງສິນຄ້າ ກະສິກໍາ ເພື່ອສົ່ງອອກ. ໃນໂອກາດດັ່ງກ່າວ, ທ່ານລັດຖະມົນຕີ ຍັງໄດ້ສົນທະນາກ່ຽວກັບການສົ່ງເສີມວຽກງານດ້ານການອໍານວຍຄວາມສະດວກທາງດ້ານການຄ້າ ເພື່ອສົ່ງອອກໃຫ້ບັນດາປະເທດອ້ອມຂ້າງ ໃຫ້ຫຼາຍຂື້ນ ແລະ ສົ່ງເສີມຜະລິດຕະພັນກະສິກໍາ ຫັນເປັນອຸດສາຫະກໍາ ໃຫ້ມີປະສິດທິຜົນສູງສຸດ.
ໃນຕອນເຊົ້າຂອງວັນດຽວກັນ, ທ່ານ ປອ. ຄຳແພງ ໄຊສົມແພງ, ໄດ້ລົງຢ້ຽມຢາມພົບປະ ແລະ ລົງເຮັດວຽກຊີ້ນໍາກັບ ພະແນກອຸດສາຫະກໍາ ແລະ ການຄ້າແຂວງ ວຽງຈັນ, ຊຶ່ງນໍາໂດຍ ທ່ານ ໄພວັນ ປະຖໍາມະວົງ, ຫົວໜ້າພະແນກ ອຸດສາຫະກຳ ແລະ ການຄ້າ ແຂວງ, ມີຄະນະພະແນກ, ອ້າຍເອື້ອຍນ້ອງພະນັກງານຫຼັກແຫຼ່ງຂອງພະແນກ ອຄ ແຂວງ ແລະ ສະພາການຄ້າ ແລະ ອຸດສາຫະກໍາ ແຂວງວຽງຈັນ ແລະ ແຂກທີ່ຖືກເຊີນ ເຂົ້າຮ່ວມລວມທັງໝົດຈຳນວນ 60 ທ່ານ, ທີ່ຫ້ອງປະຊຸມ ພະແນກ ອຸດສາຫະກຳແລະການຄ້າແຂວງ. ໃນນັ້ນ, ທ່ານຫົວໜ້າພະແນກ ອຸດສາຫະກໍາ ແລະ ການຄ້າແຂວງ ໄດ້ຂຶ້ນຜ່ານບົດສະຫຼຸບລາຍງານຜົນສຳເລັດການຈັດຕັ້ງປະຕິບັດການເຄື່ອນໄຫວວຽກງານ ປະຈໍາປີ 2021, ເປັນຕົ້ນແມ່ນ: ດ້ານການຈັດຕັ້ງ ແລະ ພະນັກງານ, ການປະຕິບັດນະໂຍບາຍດ້ານການນໍາເຂົ້າ ແລະ ສົ່ງອອກ, ດ້ານອຸດສາຫະກໍາ ແລະ ຫັດຖະກໍາ, ດ້ານການສົ່ງເສີມການຄ້າ, ດ້ານສົ່ງເສີມທຸລະກິດ ແລະ ດ້ານວຽກງງານຊັບສິນທາງປັນຍາ ແລະ ມາດຕະຖານ ແລະ ວັດແທກ; ແລະ ອື່ນໆ ໃນຕໍ່ໜ້າ.
ຊຶ່ງ ດ້ານການຈັດຕັ້ງ ແລະ ພະນັກງານ ປະກອບມີ 08 ຂະແໜງ, 01 ຫ້ອງການ ແລະ ມີ 11 ຫ້ອງການອຸດ ສາຫະກຳ ແລະ ການຄ້າ ຂຶ້ນກັບ; ມີພະນັກງານ – ລັດຖະກອນ ທັງໝົດ 166 ທ່ານ, ຍິງ 66 ແລະ ປະຈໍາການຢູ່ເມືອງ ມີ 108 ທ່ານ, ຍິງ 41. ດ້ານການສົ່ງເສີມການຄ້າ: ສິນຄ້າ ໜຶ່ງເມືອງໜຶ່ງຜະລິດຕະພັນແຫ່ງຊາດ ແຂວງວຽງຈັນ ມີຫົວໜ່ວຍ ໂອດ໋ອບ (ODOP) ທັງໝົດ 20 ຫົວໜ່ວຍ; ລວມມີ ສິນຄ້າທັງໝົດ 61 ສິນຄ້າ, ຫົວໜ່ວຍຜູ້ຜະລິດສິນຄ້າປະເພດ ຫັດຖະກໍາ ມີທັງໝົດ 7 ຫົວໜ່ວຍ; 30 ຜະລິດຕະພັນສິນຄ້າ, ຫົວໜ່ວຍຜູ້ຜະລິດສິນຄ້າປະເພດ ອາຫານ ແລະ ເຄື່ອງດື່ມ ມີທັງໝົດ 11 ຫົວໜ່ວຍ; 29 ຜະລິດຕະພັນສິນຄ້າ, ຫົວໜ່ວຍຜູ້ຜະລິດສິນຄ້າປະເພດ ຢາພື້ນເມືອງ ມີທັງໝົດ 2 ຫົວໜ່ວຍ; 2 ຜະລິດຕະພັນສິນຄ້າ, ກວມໃນ 12 ເມືອງ ພາຍໃນ 20 ບ້ານ, ກຸ່ມຜະລິດກ້ວຍອົບເນີຍ, ອົບແດດເມືອງຊະນະຄາມ ປະກອບມີສິນຄ້າ ຄື: ກ້ວຍອົບເນີຍ, ກ້ວຍຫອມທອງອົບເນີຍ, ກ້ວຍອົບແດດ, ກວນໝາກຂາມ, ກວນໝາກນັດ, ເຂົ້າຂຽບກໍ້ ແລະ ມັນທອດ; ສະຖານທີ່ ການຜະລິດ: ບ້ານ ປາກມີ້, ເມືອງ ຊະນະຄາມ; ພາຍໃນກຸ່ມ ໃນເມື່ອກ່ອນມີປະມານ 10 ກວ່າຄົນ. ສູນຫັດຖະກຳ ແຫ່ງທໍາອິດຂອງແຂວງ ໂຄງການ ກຸ່ມຜະລິດປາຫ້ວຍໝໍ້ ທີ່ທາງກົມລົງໄປສົ່ງເສີມ ປະກອບມີ ປັບປຸງ ຂັ້ນຕອນການຜະລິດ ເພື່ອໃຫ້ໄດ້ມາດຕະຖານ, ຄຸນນະພາບ ຖືກຕາມສຸຂະອານະໄມ ແລະ ເງື່ອນໄຂ ຈາກຂະແໜງ ສາທາລະນະສຸກ ເພື່ອໃຫ້ສາມາດໄດ້ຮັບການຢັ້ງຢືນ ອຢ ໄດ້, ພັດທະນາການອອກແບບສິນຄ້າ ໂດຍການປັບປຸງຮູບແບບຂອງຕົວສິນຄ້າທີ່ມີລັກສະນະດັ້ງເດີມ ມາເປັນການອອກແບບສິນຄ້າ ທີ່ມີຂໍ້ມູນ ດ້ານການຜະລິດ, ວັດຖຸດິບ ແລະ ໂພສະນາການທີ່ຄົບຖ້ວນ. ປັບປຸງການຫຸ້ມຫໍ່ຜະລິດຕະພັນສິນຄ້າ ແລະ ການເກັບຮັກສາສິນຄ້າ ເພື່ອໃຫ້ແທດເໝາະກັບຕະຫຼາດຈຳໜ່າຍ ແລະ ເປັນການສ້າງມູນຄ່າເພີ່ມໃຫ້ກັບຕົວຜະລິດຕະພັນ ພ້ອມທັງລົງສຶກສາພຶດຕິກຳການບໍລິໂພກ ຫຼື ການຊົມໃຊ້ສິນຄ້າ ກ່ຽວກັບ ຄວາມຕ້ອງການໃນການນຳໃຊ້ ຜະລິດຕະພັນສິນຄ້ານັ້ນ.
ໃນນັ້ນ: ດ້ານອຸດສາຫະກໍາ ມີໂຮງງານທັງໝົດ 1.708 ຫົວໜ່ວຍ; ຕົວເລກມູນຄ່າການຜະລິດ-ການຈຳໜ່າຍ ຜະລິດຕະພັນ ຂອງໂຮງງານອຸດສາຫະກໍາປຸງແຕ່ງ ແລະ ຫັດຖະກຳ ສາມາດຈັດຕັ້ງປະຕິບັດໄດ້ດັ່ງນີ້: ດ້ານການຜະລິດ ປະຕິບັດໄດ້2.116 ຕື້ກວ່າກີບ. ຖ້າທຽບໃສໄລຍະດຽວກັນຂອງປີ 2020 ປະຕິບັດໄດ້ 99% ແລະ ທຽບໃສ່ແຜນການປີ 2021 ແມ່ນປະຕິບັດໄດ້ 100% ແລະ ດ້ານການຈຳໜ່າຍປະຕິບັດໄດ້ 5.126 ຕື້ກວ່າກີບ ຖ້າທຽບໃສໄລຍະດຽວກັນຂອງປີ 2020 ປະຕິບັດໄດ້ 154,5% ແລະ ຖ້າທຽບໃສ່ແຜນການປີ 2021 ປະຕິບັດໄດ້ 101%. ມູນຄ່າການຈໍາໜ່າຍສິນຄ້າຂາຍຍ່ອຍ ແລະ ຄ່າບໍລິການ ປີ 2021 ຢູ່ພາຍໃນແຂວງ ມີມູນຄ່າທັງໝົດ 2.904 ຕື້ກວ່າກີບ. ຖ້າທຽບໃສ່ໄລຍະດຽວກັນຂອງປີ 2020 ແມ່ນປະຕິບັດໄດ້ 100 %, ທຽບໃສ່ແຜນການປີປະຕິບັດໄດ້ 85 %. ປັດຈຸບັນຕະຫຼາດຢູ່ພາຍໃນແຂວງວຽງຈັນ ມີ 54 ແຫ່ງ ມູນຄ່າການລົງທຶນ 99 ຕື້ກວ່າ ກີບ ໃນນັ້ນ: ຕະຫຼາດຂະໜາດກາງ 12 ແຫ່ງ ມູນຄ່າ 64 ຕື້ກວ່າ ກີບ, ຕະຫຼາດຂະໜາດນ້ອຍມີ 42 ແຫ່ງ ມູນຄ່າ 34 ຕື້ກວ່າກີບ; ລັດລົງທຶນ 5 ແຫ່ງ ມູນຄ່າ 787 ລ້ານກວ່າກີບ; ເອກະຊົນລົງທຶນ 43 ແຫ່ງ ມູນຄ່າ 97 ຕື້ກວ່າກີບ, ບ້ານລົງທຶນ 6 ແຫ່ງ ມູນຄ່າ 1 ຕື້ກວ່າກີບ.
ດ້ານວຽກງານການນຳເຂົ້າ ແລະ ສົ່ງອອກ: ສາມາດຈັດຕັ້ງປະຕິບັດໄດ້ 23 ລ້ານກວ່າ ໂດລາສະຫະລັດ ໃນນັ້ນ: ການສົ່ງ ອອກສິນຄ້າ ໄປຕ່າງປະເທດມີມູນຄ້າທັງໜົດ 21.675.237,70 ໂດລາສະຫະລັດ ທຽບໃສ່ແຜນການປີ 2021 ປະຕິບັດໄດ້ 120,43% ແລະ ທຽບໃສ່ໄລຍະດຽວກັນຂອງ ປີ 2020 ປະຕິບັດໄດ້ 190,28%. ໃນນັ້ນ: ມີບັນດາບໍລິສັດສົ່ງອອກທັງໜົດມີມູນຄ່າ 21.675.237,70 ໂດລາສະຫະລັດ ແລະ ການນໍາເຂົ້າສິນຄ້າ: ຈາກຕ່າງປະເທດ ມີມູນຄ່າທັງໜົດ 2.028.300 ໂດລາສະຫະລັດ, ທຽບໃສ່ແຜນການປີ 2021 ປະຕິບັດໄດ້ 4,72% ແລະ ທຽບໃສ່ໄລຍະດຽວກັນ ປີ 2020 ປະຕິບັດໄດ້ 52,48% ໃນນັ້ນ: ສິນຄ້ານໍາເຂົ້າໃນແຜນມີມູນຄ່າ 2 ລ້ານກວ່າ ໂດລາສະຫະລັດ ແລະ ສິນຄ້ານຳເຂົ້ານອກແຜນ ມີມູນຄ່າ 8.000 ໂດລາສະຫະລັດ, ການອອກໃບຢັ້ງຢືນແຫຼ່ງກຳເນີດສິນຄ້າ ມີທັງໝົດ ຈຳນວນ 237 ຊຸດມີມູນຄ່າ 3.166.050,59ໂດລາສະຫະລັດຊຶ່ງແມ່ນ FORM D.
ດ້ານວຽກງານຊັບສິນທາງປັນຍາ ແລະ ມາດຕະຖານ ແລະ ວັດແທກ ກໍໄດ້ເອົາໃຈໃສ່ ລົງກວດກາ ກວດສອບໝໍ້ແທກນໍ້າປະປາ ທີ່ຕິດຕັ້ງໄປແລ້ວ ພາຍໃນແຂວງ 100% ສາມາດກວດສອບໝໍ້ແທກນໍ້າ ໄດ້ທັງໝົດ 420 ໜ່ວຍ ໃນການສຸມກວດ 3% ຂອງໝໍ້ແທກນໍ້າທັງໝົດ 14.022 ໜ່ວຍ ແລະ ໄດ້ສະກັດກັ້ນການຜະລິດ ແລະ ຈໍາໜ່າຍສິນຄ້າປອມແປງ (ແປ້ງນົວກາຈອງປອມ) ຢູ່ 04 ຕົວເມືອງທົ່ງພຽງ ປະຈໍາປີ 2021; ພາຍຫຼັງໄດ້ຮັບຟັງການລາຍງານ, ທ່ານ ປອ. ຄຳແພງ ໄຊສົມແພງ, ກໍໄດ້ໃຫ້ການຍ້ອງຍໍຊົມເຊີຍ ທີ່ພະແນກ ອຄ ແຂວງ ໄດ້ມີການຈັດຕັ້ງຕາມທິດຊີ້ນໍາຂອງຂັ້ນເທິງ, ຄະນະພັກຮາກຖານ ແລະ ຄະນະພະແນກ, ໄດ້ເອົາໃຈໃສ່ ປະຕິບັດຕາມການຊີ້ນຳ-ນໍາພາ ຈາກສູນກາງ ແລະ ທ້ອງຖິ່ນ ຢ່າງໃກ້ຊິດໃນການຈັດຕັ້ງປະຕິບັດວຽກງານຕ່າງໆ ໄດ້ເຄື່ອນ
ໄຫວວຽກງານຢ່າງເຕັມສ່ວນຕາມສິດ ແລະ ໜ້າທີ່; ພະນັກງານທຸກຄົນມີຄວາມຫ້າວຫັນ ແລະ ມີຄວາມຮັບຜິດຊອບສູງຕໍ່ໜ້າທີ່ວຽກງານທີ່ຂັ້ນເທິງມອບໝາຍໃຫ້ ເພື່ອພັດທະນາວຽກງານອຸດສາຫະກໍາ ແລະ ການຄ້າ ຂອງພວກເຮົາໃຫ້ນັບມື້ນັບເຂັ້ມແຂງ ແລະ ມີປະສິດຕິພາບຍິ່ງຂຶ້ນ. ພ້ອມດຽວກັນນີ້້, ທ່ານ ປອ. ຄຳແພງ ໄຊສົມແພງ, ກໍໄດ້ໃຫ້ກຽດ ຕາງໜ້າໃຫ້ ກະຊວງອຸດສາຫະກຳ ແລະ ການຄ້າ ມອບເງິນວຽກງານຕ້ານ ແລະ ສະກັດກັ້ນໂຄວິດ 19 ໃຫ້ພະແນກ ອຄແຂວງວຽງຈັນຈຳນວນ 5.000.000 ກີບ; ພ້ອມທັງມອບອຸປະກອນ ຮັບໃຊ້ໂຄງການ ສົ່ງເສີມຈຸນລະວິສາຫະກິດ, ວິສາ
ຫະກິດຂະຫນາດນ້ອຍ ແລະ ກາງ ໃຫ້ສາມາດເຊື່ອມຕໍ່ກັບຕະຫລາດໃນຕ່ອງໂສ້ອຸດສາຫະກໍາທ່ອງທ່ຽວລາວແບບຍືນຍົງ (SUSTOUR Laos) ໃຫ້ພະແນກ ອຄ ແຂວງ ແລະ ສະພາການຄ້າ ແລະ ອຸດສາຫະກໍາ ແຂວງວຽງຈັນ ໃນນີ້ມີຄອມພິວເຕີ້ແລັບທອບ ແລະ ປີນເຕີ້ສີ ພາກສ່ວນລະ 1 ຫນ່ວຍ, ຊຶ່ງສະຫນັບສະຫນູນໂດຍ ອົງການແພລນສາກົນ ປະຈໍາ ສປປ ລາວ; ແລະ ໄດ້ມອບປຶ້ມແຜນຍຸດທະ
ສາດພັດທະນາຊັບພະຍາກອນມະນຸດ ຂອງຂະແໜງອຸດສາຫະກຳ ແລະ ການຄ້າ ແຕ່ປີ 2021-2025 ແລະ ວິໃສທັດຮອດປີ 2030 ຈຳນວນ 12ຫົວ ໃຫ້ພະແນກ ອຄ ແຂວງວຽງຈັນ ແລະ ບັນດາຫ້ອງການ ອຄ ເມືອງ ເພື່ອນຳໄປຜັນຂະຫຍາຍຈັດຕັ້ງປະຕິບັດໃຫ້ເກີດປະໂຫຍດສູງສຸດ.
ຫຼັງຈາກນັ້ນ ທ່ານ ປອ. ຄຳແພງ ໄຊສົມແພງ, ໄດ້ລົງຍ້ຽມຍາມໂຮງງານໄມ້ອັດ ຂອງບໍລິສັດບົວລະພາ ແລະ ຕໍ່ມາກໍໄດ້ຕາງໜ້າໃຫ້ ກະຊວງອຸດສາຫະກຳ ແລະ ການຄ້າ ເປັນປະທານໃນພິທີມອບ-ຮັບເຮືອນຮົ່ມ ຂອງໂຄງການສະໜອງເຮືອນຮົ່ມໃຫ້ກຸ່ມຜະລິດກະສິກຳຂະໜາດນ້ອຍ ແລະ ກາງ ຈຳນວນ 3 ຫລັງ ທີ່ຕັ້ງຢູ່ ກຸ່ມຜະລິດພືດຜັກພູດິນແດງ, ພາຍໃຕ້ອົງການຜະລິດຕະພາບແຫ່ງອາຊີ (APO), ໃນພິທີ ທ່ານ ລັດຖະມົນຕີ ກໍໄດ້ສະແດງຄວາມຂອບໃຈ ໄປຍັງອົງການຜະລິດຕະພາບແຫ່ງອາຊີ (APO) ທີ່ໄດ້ໃຫ້ການສະໜັບສະໜູນທຶນຮອນ ເພື່ອຊ່ວຍພາກທຸລະກິດ ໂດຍສະເພາະແມ່ນວິສາຫະກິດຂະໜາດນ້ອຍ ແລະ ກາງ ຂອງ ສປປ ລາວ ໃນການຮັບມືກັບຜົນກະທົບ ແລະ ຟື້ນຟູຈາກ ໂຄວິດ-19 ໃນໄລຍະຜ່ານມາ.
ແຫລ່ງຂ່າວ: ຫ້ອງການ ກະຊວງ ອຄ
ຮຽບຮຽງໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
