ກອງປະຊຸມເຜີຍແຜ່ວຽກງານເຊື່ອມໂຍງເສດຖະກິດພາກພື້ນ ແລະ ສາກົນ ຂອງ ສປປລາວ ໄດ້ຈັດຂຶ້ນໃນລະຫວ່າງ ວັນທີ 02-03 ກຸມພາ 2022 ທີ່ແຂວງ ອຸດົມໄຊ ໂດຍການເປັນປະທານ ຮ່ວມ ຂອງທ່ານ ອ່ອນແກ້ວ ອຸນອາລົມ ຮອງເຈົ້າແຂວງອຸດົມໄຊ ແລະ ທ່ານ ບຸນເຖິງ ດວງສະຫວັນ ຮອງລັດຖະມົນຕີ, ກະຊວງ ອຸດສາຫະກໍາ ແລະ ການຄ້າ, ມີບັນດາຜູ້ຕາງໜ້າຈາກພາກລັດ ແລະ ພາກທຸລະກິດ 08 ແຂວງພາກເໜືອເຂົ້າຮ່ວມ.

      ກອງປະຊຸມໄດ້ເຜີຍແຜ່ຂໍ້ມຸນຂ່າວສານ-ຄວາມຄືບໜ້າ ແລະ ການແກ້ໄຂຂໍ້ຂ້ອງໃຈໃຫ້ພາກລັດ ແລະ ພາກທຸລະກິດຂັ້ນທ້ອງຖິ່ນ ກ່ຽວກັບວຽກງານການເຊື່ອມໂຍງເສດຖະກິດພາກພື້ນ ແລະ ສາກົນ ຂອງ ສປປ ລາວ ທີ່ຕິດພັນກັບອາຊຽນ ແລະ ອົງການການຄ້າໂລກ ເປັນຕົ້ນການເຜີຍແຜ່ສະພາບລວມ ວຽກງານການເຊື່ອມໂຍງເສດຖະກິດ ຂອງ ສປປ ລາວ, ຄວາມຄືບໜ້າກ່ຽວກັບການຈັດຕັ້ງປະຕິບັດວຽກງານການຄ້າສອງຝ່າຍ ຂອງ ສປປ ລາວ, ​ຄວາມຄືບໜ້າກ່ຽວກັບວຽກງານການຄ້າຫຼາຍຝ່າຍພາຍໃຕ້ອົງການການຄ້າໂລກ, ການເຊື່ອມໂຍງປະຊາຄົມເສດຖະກິດອາຊຽນ ແລະ ຄວາມຄືບໜ້າການຈັດຕັ້ງປະຕິບັດປະຊາຄົມເສດຖະກິດອາຊຽນ ຂອງ ສປປ ລາວ, ການຈັດຕັ້ງປະຕິບັດບັນດາສັນຍາການຄ້າ-ການບໍລິການ, ດ້ານການລົງທຶນ, ​ດ້ານສິນຄ້າ, ແຫຼ່ງກໍາເນີດສິນຄ້າ,​ດ້ານສຸຂະອານາໄມພືດ ແລະ ສັດ, ສິ່ງກີດຂວາງດ້ານເຕັກນິກຕໍ່ການຄ້າ( TBT), ຜົນປະໂຫຍດ ແລະ ຜົນກະທົບຈາກການຈັດຕັ້ງປະຕິບັດວຽກງານເຊື່ອມໂຍງເສດຖະກິດພາກພື້ນ ແລະ ສາກົນຂອງພາກເອກະຊົນພາຍໃຕ້ສັນຍາຕ່າງໆ.

ພາບ-ຂ່າວ:​ ໂພໄຊ ໄຊຍະວົງ ພະແນກ ອຄ ແຂວງອຸດົມໄຊ

ຮຽບຮຽງໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ