ໃນຕອນບ່າຍວັນທີ 6 ກຸມພາ 2022, ທ່ານ ປອ. ຄຳແພງ ໄຊສົມແພງ, ກຳມະການສູນກາງພັກ, ເລຂາຄະນະພັກກະຊວງ, ລັດຖະມົນຕີ ກະຊວງອຸດສາຫະກໍາ ແລະ ການຄ້າ ພ້ອມດ້ວຍຄະນະ ຮ່ວມກັບ ທ່ານ ອ່ອນແກ້ວ ອຸ່ນອາລົມ, ຄະນະປະຈໍາພັກແຂວງ, ຮອງເຈົ້າແຂວງ ແຂວງອຸດົມໄຊ ແລະ ສະພາອຸດສາຫະກໍາ ແລະ ການຄ້າ ແຫ່ງຊາດ ພ້ອມດ້ວຍ ຄະນະພະແນກອຸດສາຫະກໍາ ແລະ ການຄ້າ ແຂວງອຸດົມໄຊ, ໄດ້ລົງຢ້ຽມຢາມ ບໍລິສັດ CNP ສໍາຫຼວດ ແລະ ຂຸດຄົ້ນບໍ່ແຮ່ ຂາອອກ-ຂາເຂົ້າຜູ້ດຽວ (CNP Exploration Mining Import-Export). ຈຸດປະສົງ ແມ່ນເພື່ອຊຸກຍູ້ຖານການຜະລິດທີ່ພົ້ນເດັ່ນຂອງແຂວງ ແລະ ທັງຊີ້ນຳໃນການສົ່ງເສີມການອໍານວຍຄວາມສະດວກຕໍ່ການດຳເນີນທຸລະກິດ-ການຄ້າ. ການລົງຢ້ຽມຢາມໃນຄັ້ງນີ້, ໄດ້ຮັບການຮັບຕ້ອນໂດຍ ທ່ານ ນາງ ເພັນນະພາ ວົງສະໝໍລະພູມ, ອໍານວຍການ ໂດຍໄດ້ຢ້ຽມຊົມໂຮງງານຂຸດຄົ້ນ ແລະ ຜະລິດແຮ່ເຫຼັກຂອງບໍລິສັດ ຕັ້ງຢູ່ບ້ານໂພນໂຮງ, ເມືອງໄຊ, ແຂວງອຸດົມໄຊ.
ບໍລິສັດ CNP ໄດ້ສ້າງຕັ້ງຂຶ້ນ ໃນປີ 1998, ໂດຍທ່ານອໍານວຍການ ມີວິໄສທັດ ໃນການຂະຫຍາຍກຸ່ມທຸລະກິດ CNP ຂະຫຍາຍການຂາຍ ແລະ ຜົນກໍາໄລ, ພ້ອມນັ້ນ ກໍຫວັງວ່າຈະສາມາດເປັນບໍລິສັດ ທີ່ເຂັ້ມແຂງ ແລະ ເປັນບໍລິສັດທີ່ນໍາໜ້າ ຂອງລາວ, ຊຶ່ງມີ 3 ເສົາຄໍ້າ ຄື: ຄວາມໜ້າເຊື່ອຖື, ຄຸນນະພາບ ແລະ ຜົນປະໂຫຍດຮ່ວມກັນ; ດ້ານການບໍລິການ 2 ຂົງເຂດຫຼັກ ຄື: 1) ສະໜອງການບໍລິການດ້ານການສໍາຫຼວດ ແລະ ຂຸດຄົ້ນບໍ່ແຮ່; ແລະ 2) ໃຫ້ການບໍລິການ ດ້ານການສົ່ງອອກ-ນໍາເຂົ້າສິນຄ້າ ແລະ ການອໍານວຍຄວາມສະດວກດ້ານການນໍາເຂົ້າເຄື່ອງໄຟຟ້າໃຫ້ແກ່ລັດຖະບານ. ປະຈຸບັນ, ມີເນື້ອທີ່ຂຸດຄົ້ນ ຢູ່ 3 ເຂດຫຼັກ ໃນແຂວງອຸດົມໄຊ ຄື: ບ້ານທາງເໜືອ, ບ້ານນາສະຫວ່າງ ແລະ ບ້ານນາໄຊ, ຜະລິດແຮ່ເຫຼັກ ເພື່ອສົ່ງອອກປະມານ 1.000.000 ໂຕນຕໍ່ປີ. ພ້ອມນັ້ນ, ຍັງມີນະໂຍບາຍປົກປັກຮັກສາສິ່ງແວດລ້ອມ, ນະໂຍບາຍແກ່ພະນັກງານ ແລະ ພັດທະນາຊຸມຊົນອີກດ້ວຍ. ໃນການລົງຢ້ຽມຢາມ ບໍລິສັດ CNP ໃນຄັ້ງນີ້, ທ່ານລັດຖະມົນຕີ ກະຊວງ ອຄ ກໍໄດ້ຊີ້ນຳຕິດພັນກັບວຽກງານການອໍານວຍຄວາມສະດວກທາງດ້ານການຄ້າ ໃນການສົ່ງອອກສິນຄ້າ ຜ່ານທາງລົດໄຟ ແມ່ນໃຫ້ສືບຕໍ່ປະສານກັບພາກສ່ວນກ່ຽວຂ້ອງຕື່ມ. ພ້ອມດຽວກັນນີ້, ທ່ານ ລມຕກໍ່ໄດ້ແຈ້ງໃຫ້ທາງບໍລິສັດ ຊາບວ່າ ທາງກະຊວງ ອຄ ກໍໄດ້ໄປຢ້ຽມຢາມທ່າບົກທ່ານາແລ້ງ ແລະ ສະຖານີວຽງຈັນໃຕ້ ເພື່ອຊຸກຍູ້ການແກ້ໄຂ ບັນຫາການສົ່ງສິນຄ້າອອກ ຜ່ານທາງລົດໄຟລາວ-ຈີນ ຂອງ ສປປ ລາວ ໃນນາມຜູ້ປະຈຳການ ຄະນະກຳມະການອຳນວຍຄວາມສະດວກດ້ານການຄ້າ ແລະ ຫວັງວ່າ ຈະໄດ້ມີຄວາມຄືບຫນ້າໃນໄວໆນີ້.
ຈາກນັ້ນ, ຄະນະກໍໄດ້ລົງຢ້ຽມຢາມ ບໍລິສັດ ຊ່ວງໄຊພັດທະນາກະສິກໍາ, ທີ່ມີໂຄງການປູກມອນ-ລ້ຽງມ້ອນຂະໜາດໃຫຍ່ ເພື່ອປຸງແຕ່ງເປັນໄໝ ແລະ ຜະລິດຕະພັນອື່ນສົ່ງ
ອອກ, ຊຶ່ງໄດ້ຮັບການຮັບຕ້ອນໂດຍ ທ່ານ ຈາງ ທິງ ຈຽງ, ປະທານບໍລິສັດ ທີ່ໄດ້ນໍາພາຢ້ຽມຊົມສະຖານທີ່ສາທິດໃນການປູກໃບມອນເພື່ອລ້ຽງມ້ອນ ແລະ ໂຮງເກັບລ້ຽງມ້ອນ ທີ່ຕັ້ງຢູ່ບ້ານບໍ່, ເມືອງໄຊ, ແຂວງອຸດົມໄຊ.
ບໍລິສັດ ດັ່ງກ່າວມີເນື້ອທີ່ປູກຝັງທັງໝົດ 500 ເຮັກຕາ, ມີເນື້ອທີ່ປູກຝັງຢູ່ໃນທົ່ວແຂວງອຸດົມໄຊ ຢູ່ 4 ເມືອງ ຄື: ເມືອງໄຊ ເນື້ອທີ່ 280 ເຮັກຕາ, ເມືອງງາ ເນື້ອທີ່ 120 ເຮັກຕາ, ເມືອງແບ່ງ ເນື້ອທີ່ 50 ເຮັກຕາ ແລະ ເມືອງຮຸນ ເນື້ອທີ່ 50 ເຮັກຕາ; ມີແຮງງານລາວ 280 ຄົນ, ເປັນຍິງ 150 ຄົນ. ບໍລິສັດ ມີແຜນໂຄງການ ທີ່ຈະສົ່ງຝັກລອກອອກ ແລະ ເສັ້ນໄຫມມ້ອນ, ຜ້າຫົ່ມທີ່ເຮັດດ້ວຍເສັ້ນໄຫມມ້ອນ ຊຶ່ງປະຈຸບັນ ກໍາລັງຢູ່ໃນຂັ້ນຕອນການເຈລະຈາເປີດຕະຫລາດ ເພື່ອສົ່ງສິນຄ້າທີ່ຜະລິດ ໄປ ສປ ຈີນ ຕາມນະໂຍບາຍຊຸກຍູ້ສົ່ງເສີມຂອງສອງປະເທດ. ຜ່ານການລົງຢ້ຽມຢາມ, ທ່ານລັດຖະມົນຕີກະຊວງ ອຄ ໄດ້ຊີ້ນຳ ໃຫ້ ບໍລິສັດ ຊ່ວງໄຊພັດທະນາກະສິກໍາ ທີ່ສົນໃຈສົ່ງສິນຄ້າຕົນອອກໄປ ສປ ຈີນ ພາຍໃຕ້ໂຄງການປູກພືດທົດແທນການປູກຝີ່ນ ແມ່ນໃຫ້ບໍລິສັດ ເຮັດຫນັງສືສະເໜີຫາ ກະຊວງ ອຄ ຜ່ານ ພະແນກ ອຄ ແຂວງ ເພື່ອໃຫ້ກະຊວງ ອຄ ຈະໄດ້ສົມທົບກັບພາກສ່ວນກ່ຽວຂ້ອງ ເພື່ອສະເໜີໄປຫາຝ່າຍຈີນ.
ແຫລ່ງຂ່າວ: ຫ້ອງການກະຊວງ ອຄ
ຮຽບຮຽງໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
