ໃນວັນທີ 7 ກຸມພາ 2022, ທ່ານ ປອ ຄຳແພງ ໄຊສົມແພງ, ກຳມະການສູນກາງພັກ,ລັດຖະມົນຕີກະຊວງອຸດສາຫະກຳ ແລະ ການຄ້າ ພ້ອມຄະນະ ຊຶ່ງປະກອບມີບັນດາຫົວໜ້າກົມ, ຮອງກົມທີ່ກ່ຽວຂ້ອງ ມາເຄື່ອນໄຫວຢ້ຽມຢາມ ແລະ ເຮັດວຽກ ກັບ ພະແນກອຸດສາຫະກໍາ ແລະ ການຄ້າ ແຂວງອຸດົມໄຊ, ຊຶ່ງໄດ້ມີ ທ່ານ ອ່ອນແກ້ວ ອຸ່ນອາລົມ, ຄະນະປະຈໍາພັກແຂວງ, ຮອງເຈົ້າແຂວງ ແຂວງອຸດົມໄຊ ເຂົ້າຮ່ວມ.
ໃນໂອກາດດັ່ງກ່າວນີ້, ທ່ານ ສອນທະນູ ສິງດາລາ, ຫົວໜ້າພະແນກ ອຸດສາຫະກໍາ ແລະ ການຄ້າ ແຂວງອຸດົມໄຊ ໄດ້ລາຍງານການຈັດຕັ້ງປະຕິບັດວຽກງານອຸດສາຫະກຳ ແລະ ການຄ້າໃນໄລຍະ 01 ປີຜ່ານມາ ແລະ ທິດທາງແຜນການທີ່ຈະປະຕິບັດໃນຕໍ່ໜ້າ ໃຫ້ທ່ານ ລັດຖະມົນຕີ ພ້ອມຄະນະຮັບຊາບ.ຈາກນັ້ນ ກໍໄດ້ມີການແລກປ່ຽນປະກອບຄຳເຫັນລະຫວ່າງບັນດາກົມ ອ້ອມຂ້າງກະຊວງ ແລະ ແຂວງ ໂດຍເນັ້ນໃສ່ການແກ້ໄຂບາງບັນຫາທີ່ຍັງຄົງຄ້າງໄລຍະຜ່ານມາ ໂດຍສະເພາະແມ່ນ ບັນຫາກົນໄກການປະສານງານລະຫວ່າງສູນກາງກັບທ້ອງຖິ່ນ ແລະ ບາງສະພາບການທີ່ທາງແຂວງຍັງຈັດຕັ້ງປະຕິບັດບໍ່ທັນໄດ້ດີ ເປັນຕົ້ນແມ່ນ ບັນຫາການສົ່ງອອກສິນຄ້າພາຍໃນ, ການຄຸ້ມຄອງລາຄາສິນຄ້າ, ການຊຸກຍູ້ແລະສົ່ງເສີມຫົວໜ່ວຍທຸລະກິດ ແລະ ຜູ້ປະກອບການ SME ແລະ ອື່ນໆ.
ຊຶ່ງໃນການລົງເຮັດວຽກໃນຄັ້ງນີ້, ກໍໄດ້ມີການແລກປ່ຽນຄໍາຄິດຄໍາເຫັນຂອງບັນດາກົມ ອ້ອມຂ້າງກະຊວງຕໍ່ການລາຍງານ ແລະ ການສະເໜີຂອງພະແນກ ອຸດສາຫະກໍາ ແລະ ການຄ້າ ແຂວງ. ການລົງຢ້ຽມຢາມໃນຄັ້ງນີ້ ແມ່ນເພື່ອແນໃສ່ໃຫ້ການຈັດຕັ້ງປະຕິບັດວຽກງານວິຊາສະເພາະ ໃນຊຸມປີຕໍ່ໜ້າໄດ້ດີກວ່າເກົ່າ ທ່ານ ປອ ຄຳແພງ ໄຊສົມແພງ ໄດ້ເນັ້ນໜັກໃຫ້ສືບຕໍ່ຈັດຕັ້ງປະຕິບັດແຜນການທີ່ວາງໄວ້ໃຫ້ສຳເລັດ, ເອົາໃຈໃສ່ເພີ່ມທະວີຈັດຕັ້ງປະຕິບັດຄໍາສັ່ງ ຂອງທ່ານນາຍົກສະບັບເລກທີ 02, 03 ແລະ ເລກທີ 42 ຢ່າງເຂັ້ມງວດ ກໍານົດເປັນຄາດໝາຍສູ້ຊົນ, ເອົາໃຈໃສ່ແກ້ໄຂຕົວຊີ້ວັດທີ່ຍັງຄົງຄ້າງຂອງຄໍາສັ່ງເລກທີ 02 ແລະ 03 ເພື່ອອຳນວຍຄວາມສະດວກໃຫ້ການດຳເນີນທຸລະກິດຢູ່ລາວໃຫ້ນັບມື້ດີຂຶ້ນ, ເອົາໃຈໃສ່ຊຸກຍູ້, ສົ່ງເສີມຫົວໜ່ວຍການຜະລິດ, ການປຸງແຕ່ງສິນຄ້າທີ່ມີທ່າແຮງມີຕະຫຼາດຮອງຮັບ, ເຮັດໃຫ້ສິນຄ້າໄດ້ຮັບການຢັ້ງຢືນກາໝາຍມາດຕະຖານແຫ່ງຊາດ ແລະ ກາໝາຍຄຸນນະພາບ ຄຽງຄູ່ກັບການແນະນຳຂັ້ນຕອນການຜະລິດໃຫ້ສອດຄ່ອງກັບມາດຕະຖານນັບມື້ເພີ່ມຂຶ້ນ.
ໃນໂອກາດທີ່ມາເຄື່ອນໄຫວຢ້ຽມຢາມ ພະແນກອຸດສາຫະກໍາ ແລະ ການຄ້າ ຄັ້ງນີ້ ທ່ານ ປອ ຄໍາແພງ ໄຊສົມແພງ ໄດ້ຕາງໜ້າໃຫ້ກະຊວງອຸດສາຫະກຳ ແລະ ການຄ້າ ມອບເງິນຈຳນວນ 5.000.000 ກີບ ເພື່ອຊ່ວຍເຫຼືອ ໃຫ້ແກ່ພະແນກອຸດສາຫະກຳ ແລະ ການຄ້າ ແຂວງອຸດົມໄຊ ນຳໃຊ້ເຂົ້າໃນການຕ້ານ ແລະ ສະກັດກັ້ນ ການລະບາດຂອງພະຍາດໂຄວິດ-19; ແລະ ມອບປຶ້ມແຜນຍຸດທະສາດພັດທະນາຊັບພະຍາກອນມະນຸດ ຂອງຂະແໜງອຸດສາຫະກໍາ ແລະ ການຄ້າ ແຕ່ປີ 2021-2025 ແລະ ວິໄສທັດຮອດປີ 2030 ຈໍານວນ 06 ຫົວໃຫ້ພະແນກ ອຄ ແຂວງ ແລະ ບັນດາຫ້ອງການ ອຄ ເມືອງ ເພື່ອນໍາໄປຜັນຂະຫຍາຍຈັດຕັ້ງປະຕິບັດໃຫ້ເກີດປະໂຫຍດສູງສຸດ.
ແຫລ່ງຂ່າວ: ຫ້ອງການກະຊວງ ອຄ
ຮຽບຮຽງໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
