ໃນຕອນເຊົ້າ, ວັນທີ 9 ກຸມພາ 2022,  ທ່ານ ປອ. ຄຳ​ແພງ ໄຊ​ສົມ​ແພງ ກຳມະການສູນກາງພັກ, ເລຂາຄະນະພັກລັດຖະມົນຕີ ກະຊວງ ອຄ ພ້ອມ ຄະນະ ໄດ້ພົບປະ ທ່ານ ບຸນຄົງ ຫຼ້າຈຽມພອນ, ກຳມະການສຳຮອງສູນກາງພັກ, ເລຂາພັກແຂວງ, ເຈົ້າ​ແຂວງອຸດົມໄຊ ແລະ ທ່ານ ອ່ອນແກ້ວ ອຸ່ນອາລົມ, ຄະນະປະຈໍາພັກແຂວງ, ຮອງເຈົ້າແຂວງ ແຂວງອຸດົມໄຊ ພ້ອມດ້ວຍພະນັກງານຫຼັກແຫຼ່ງເຂົ້າຮ່ວມ ທີ່​ຫ້ອງວ່າ​ການ​ປົກ​ຄອງ​ແຂວງອຸດົມໄຊ.

        ໃນໂອກາດດັ່ງກ່າວ, ທ່ານ ປອ. ຄຳ​ແພງ ໄຊ​ສົມ​ແພງ ກໍໄດ້ ໂອ້ລົມກ່ຽວກັບສະພາບການພັດທະນາຂະແໜງອຸດສາຫະກຳ-ການຄ້າ, ນະໂຍບາຍປັບປຸງ ແລະ ການແກ້ໄຂບັນຫາດ້ານການຄ້າພາກເໜືອ ເປັນຕົ້ນແມ່ນ: 1) ການຫັນມາປູກພືດ ທົດແທນການປູກຝິ່ນ, 2) ດ້ານອໍານວຍຄວາມສະດວກດ້ານການຄ້າ ເວົ້າສະເພາະ ການສົ່ງອອກສິນຄ້າ ຄື: ການລະບາຍລົດຂົນສົ່ງ, ບັນຫາຄ່າຄ່ຽນຖ່າຍສິນຄ້າ ແລະ ຄ່າບໍລິການທີ່ຕິດພັນກັບການໃຫ້ບໍລິການຂົນສົ່ງລົດໄຟ ລາວ-ຈີນ, 3) ການຈັດຕັ້ງປະຕິບັດ ແລະ ຄຸ້ມຄອງໂຮງງານອຸດສາຫະກໍາ ແລະ ປຸງແຕ່ງ ທີ່ຕິດພັນກັບຫຼາຍຂະແໜງການ, ແລະ 4) ການເຊື່ອມໂຍງເສດຖະກິດພາກພື້ນ ເພື່ອການເຈລະຈາ ກັບ ບັນດາປະເທດທີ່ມີການສົ່ງອອກສິນຄ້າລາວ ໂດຍສະເພາະແມ່ນ ສປ ຈີນ; ແລະ 5) ວາລະແຫ່ງຊາດ ເພື່ອແກ້ໄຂຂໍ້ຫຍຸ້ງຍາກດ້ານເສດຖະກິດ-ການເງິນ ແລະ ການພັດທະນາເສດຖະກິດ-ສັງຄົມ, 6) ການສ້າງ ແລະ ປັບປຸງ ນິຕິກໍາ, ນະໂຍບາຍ ແລະ ຄໍາສັ່ງ ໃຫ້ສອດຄ່ອງການກັບການຈັດຕັ້ງປະຕິບັດຕົວຈິງຂອງທ້ອງຖິ່ນ ແລະ ພາກທຸລະກິດ;

        ພາຍຫຼັງຮັບຟັງການໂອ້ລົມ, ທ່ານ​ເຈົ້າ​ແຂວງ​ ກໍໄດ້​ກ່າວສະແດງຄວາມຕ້ອນຮັບ ທ່ານລັດ​ຖະ​ມົນ​ຕີ​ ພ້ອມດ້ວຍຄະນະ ຢ່າງອົບອຸ່ນ ແລະ ທ່ານເຈົ້າແຂວງ ກໍຍັງໄດ້ສະເໜີສະພາບຈຸດພິເສດຂອງແຂວງ ແລະ ລາຍງານການຈັດຕັ້ງປະຕິບັດດ້ານການພັດທະນາເສດຖະກິດ-ສັງຄົມຂອງແຂວງ ໃນຊ່ວງໄລຍະໂຄວິດ 19 ແລະ ຫຼັງຈາກມີສະຖານີ ລົດໄຟລາວ-ຈີນ ທີ່ເຮັດໃຫ້ ແຂວງ ໄດ້ຮັບຄວາມສົນໃຈດ້ານການລົງທຶນ ດ້ານການຂຸດຄົ້ນບໍ່ແຮ່, ກະສິກຳ, ອຸດສາຫະກຳ, ຫັດຖະກຳ, ທ່ອງທ່ຽວ ແລະ ບໍລິການອື່ນໆ ຫຼາຍຂຶ້ນກວ່າເກົ່າ.

      ໃນຕອນເຊົ້າຂອງວັນດຽວກັນ, ທ່ານລັດຖະມົນຕີ ພ້ອມດ້ວຍຄະນະ ໄດ້ລົງຢ້ຽມຢາມ ໂຮງງານເຟີນິເຈີ້ຊ່ວງໄຊ, ຢູ່ບ້ານກໍນ້ອຍ, ເມືອງໄຊ ຊຶ່ງໄດ້ສ້າງຕັ້ງຂື້ນໃນປີ 2016, ເນື້ອທີ່ພາຍໃນໂຮງງານ 5 ເຮັກຕາ, ກ່ອນການລະບາດຂອງພະຍາດໂຄວີດ-19 ຕາມປົກກະຕິແລ້ວມີແຮງງານປະມານ 300 ຄົນ, ປະຈຸບັນມີພຽງ 150 ຄົນ, ແຮງງານຈີນມີ 25 ຄົນ. ຈຸດດີຂອງບໍລິສັດແມ່ນ ສາມາດສົ່ງເສີມການຈັດຫາວຽກເຮັດງານທໍາໃຫ້ປະຊາຊົນ ແລະ ຍັງສ້າງລາຍຮັບໃຫ້ກັບທ້ອງຖີ່ນເຂດໃກ້ຄຽງ, ການປະກອບສ່ວນພັນທະໃຫ້ກັບພາກລັດ ແລະ ກະຕຸ້ນຊູກຍູ້ຂັບເຄື່ອນເສດຖະກິດການຜະລິດຂອງແຂວງ.

       ຈາກນັ້ນ, ຄະນະ ກໍໄດ້ລົງຢ້ຽມຢາມ ໂຮງງານອາຫານສັດ ທີ່ລັດຖະບານ ສປ ຈີນ ມອບ ໃຫ້ລັດຖະບານ ສປປ ລາວ ເພື່ອຊ່ວຍເຫຼືອພັດທະນາການປູກ-ການລ້ຽງ ຢູ່ພາກເໜືອຂອງລາວ. ການກໍ່ສ້າງໂຮງງານແມ່ນ ເລີ່ມແຕ່ປີ 2013 ທີ່ສາມາດເປີດນໍາໃຊ້ຢ່າງເປັນທາງການໃນປີ 2014; ດ້ານການລົງທຶນແມ່ນມາຈາກແຂວງຢູນນານ ສປ ຈີນ ມູນຄ່າການລົງທຶນ 5.250.000 ໂດລາສະຫະລັດ ໂດຍມອບໃຫ້ບໍລິສັດ ເຟິງໂຮລາວ ຈໍາກັດ ເປັນຜູ້ດໍາເນີນການຜະລິດ; ການຜະລິດແບ່ງອອກ 3 ປະເພດ ຄື: ຫົວອາຫານໝູ, ຫົວອາຫານສັດປີກ ແລະ ຫົວອາຫານປາ, ກໍາລັງການຜະລິດ 60.000 ໂຕນຕໍ່ປີ, ໃນປີ 2022 ມີແຜນສົ່ງອອກ ໄປ ສປ ຈີນ 5.000 ໂຕນ.

ແຫລ່ງຂ່າວ: ຫ້ອງການກະຊວງ ອຄ

 ຮຽບຮຽງໂດຍ: ນ ຖື ແຫວນວົງສົດ ສູນສະຖິຕິ ແລະຂໍ້ມູນຂ່າວສານ ກຜຮ