ໃນໂອກາດເຄື່ອນໄຫວຢ້ຽມຢາມ ແລະ ເຮັດວຽກຢູຸ່ແຂວງຫຼວງພະບາງ, ໃນຕອນເຊົ້າ ວັນທີ 10 ກຸມພາ 2022, ທ່ານ ປອ. ຄຳແພງ ໄຊສົມແພງ ກຳມະການສູນກາງພັກ, ລັດຖະມົນຕີ ກະຊວງອຸດສາຫະກຳ ແລະ ການຄ້າ ພ້ອມດ້ວຍຄະນະ ໄດ້ພົບປະ ທ່ານ ຄໍາຂັນ ຈັນທະວີສຸກ, ກໍາມະການສູນກາງພັກ, ເລຂາພັກແຂວງ, ເຈົ້າແຂວງ ແຂວງຫຼວງພະບາງ ພ້ອມດ້ວຍ ຫົວໜ້າຫ້ອງວ່າການແຂວງ, ຫົວໜ້າພະແນກອຸດສາຫະກຳ ແລະ ການຄ້າແຂວງ ແລະ ຄະນະ ທີ່ຫ້ອງວ່າການປົກຄອງແຂວງຫຼວງພະບາງ.
ໃນໂອກາດດັ່ງກ່າວ, ທ່ານ ປອ. ຄໍາແພງ ໄຊສົມແພງ ກໍໄດ້ແລກປ່ຽນທັດສະນະກ່ຽວກັບການສູ້ຊົນຈັດຕັ້ງປະຕິບັດ 2 ວາລະແຫ່ງຊາດ ໃນການແກ້ໄຂ້ຄວາມຫຍຸ້ງຍາກດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ ເພື່ອໃຫ້ໄດ້ຮັບຜົນສໍາເລັດຕາມຄາດໝາຍ, ການອໍານວຍຄວາມສະດວກທາງດ້ານການຄ້າ ຂອງບັນດາແຂວງພາກເໜືອ ຄຽງຄູ່ກັບ ການໝູນໃຊ້ກາລະໂອກາດການເປີດເສັ້ນທາງລົດໄຟ ລາວ-ຈີນ ເພື່ອເປີດກວ້າງຕະຫຼາດກັບ ສປ ຈີນ ແລະ ການເຊື່ອມຈອດທາງເສດຖະກິດ ຈີນ-ອາຊຽນ ເພື່ອກະຕຸ້ນຊຸກຍູ້ດຶງດູດການລົງທຶນ ຂອງບັນດາແຂວງພາກເໜືອ.
ທ່ານເຈົ້າແຂວງໆຫຼວງພະບາງ ຍັງໄດ້ກ່າວສະແດງຄວາມຕ້ອນຮັບຢ່າງຄວາມອົບອຸ່ນ ແລະ ແລກປ່ຽນກ່ຽວກັບສະພາບການພັດທະນາເສດຖະກິດ-ສັງຄັມ ໂດຍສະເພາະ ດ້ານການທ່ອງທ່ຽວຂອງແຂວງ ໃນໄລຍະຜ່ານມາ ພ້ອມກັບລາຍງານກ່ຽວກັບທິດທາງການພັດທະນາອຸດສາຫະກໍາການທ່ອງທ່ຽວໃນຕໍ່ໜ້າ. ພ້ອມນີ້ທ່ານກໍໄດ້ສະເໜີໃຫ້ ທ່ານລັດຖະມົນຕີ ກະຊວງ ອຄ ສືບຕໍ່ໃຫ້ການຊີ້ນຳພະແນກອຸດສາຫະກຳ ແລະ ການຄ້າແຂວງ ກໍຄືກົມວິຊາການຂອງກະຊວງ ສົ່ງເສີມ ແລະ ພັດທະນາວຽກງານອຸດສາຫະກໍາ ແລະ ການຄ້າ ພ້ອມທັງຊ່ວຍເປັນໃຈກາງປະສານ ແລະ ຂົນຂວາຍການລົງທຶນ ໂດຍສະເພາະ ເຂົ້າໃນການພັດທະນາຂະແໜງການທ່ອງທ່ຽວ ແລະ ກິດຈະການປິ່ນອ້ອມຂອງແຂວງ.
ພາບ-ຂ່າວ: ໄດ້ມາຈາກຫ້ອງການກະຊວງ ອຄ.
ຮຽບຮຽງ: ໂພຄໍາອີ ສູນສະຖິຕີ ແລະ ຂໍ້ມູນຂ່າວສານ ກຜຮ/ກະຊວງ ອຄ.
