ໃນຕອນເຊົ້າ ວັນທີ 10 ກຸມພາ 2022, ທີ່​ຫ້ອງປະຊຸມ ພະແນກອຸດສາຫະກໍາ ແລະ ການຄ້າ ແຂວງຫຼວງພະບາງ​, ທ່ານ ປອ. ຄຳ​ແພງ ໄຊ​ສົມ​ແພງ, ກຳມະການສູນກາງພັກ, ລັດ​ຖະ​ມົນ​ຕີ ​ກະ​ຊວງ​ອຸດ​ສາ​ຫະ​ກຳ ແລະ ການ​ຄ້າ ພ້ອມດ້ວຍຄະນະ ໄດ້ພົບປະ ແລະ ໂອ້ລົມພະນັກງານຫຼັກແຫຼ່ງຂອງພະແນກອຸດສາຫະກໍາ ແລະ ການຄ້າແຂວງໆຫຼວງພະບາງ ຊຶ່ງຮັບຕ້ອນຄະນະ ໂດຍ ທ່ານ ບຸນສົມ ຄຸນມະນີ, ຄະນະພັກແຂວງ, ຫົວໜ້າພະແນກອຸດສາຫະກຳ ແລະ ການຄ້າແຂວງ ພ້ອມດ້ວຍຄະນະພະແນກ ແລະ ພະນັກງານຂອງພະແນກອຸດສາຫະກໍາ ແລະ ການຄ້າ ແຂວງໆຫຼວງພະບາງ ເຂົ້າຮ່ວມຢ່າງພ້ອມພຽງ.

      ໃນໂອກາດດັ່ງກ່າວນີ້, ​ຫົວໜ້າພະແນກ ອຄ ແຂວງໆຫຼວງພະບາງ ໄດ້ລາຍງານການຈັດຕັ້ງປະຕິບັດເຄື່ອນໄຫວວຽກງານ ປະຈໍາປີ 2021 ແລະ ທິດທາງແຜນການທີ່ຈະປະຕິບັດໃນຕໍ່ໜ້າ ໂດຍເນັ້ນໜັກ 8 ຈຸດສູມ ຄື: ຈຸດສຸມທີ 1: ເອົາໃຈໃສ່ກວດກາ ແລະ ປັບປຸງນະໂຍບາຍສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ໃຫ້ລະອຽດຈະແຈ້ງກວ່າເກົ່າ ເພື່ອການເຂົ້າເຖິງແຫຼ່ງທຶນດອກເບ້ຍຕໍ່າ, ການຊອກຕະຫຼາດຈຳໜ່າຍ ທັງໃຫ້ຄຳປືກສາດ້ານວິຊາການ, ບັນດານິຕິກຳ ແລະ ລະບຽບການ ທີ່ກ່ຽວຂ້ອງ ເພື່ອສ້າງຄວາມເຂັ້ມແຂງໃຫ້ແກ່ຜູ້ປະກອບການໃໝ່; ຈຸດສຸມທີ  2: ຄົ້ນຄວ້າປັບປຸງເງື່ອນໄຂການອະນຸຍາດໃຫ້ຜູ້ດຳເນີນທຸລະກິດຄືນໃໝ່ ໂດຍໃຫ້ເພີ້ມເງື່ອນໄຂ ການຖືບັນຊີ ແລະ ນຳໃຊ້ລະບົບບັນຊີທີ່ລັດກຳນົດ; ຈຸດສຸມທີ 3: ຄົ້ນຄວ້າເພື່ອສະເໜີການປັບປຸງແກ້ໄຂຄວາມຫຍຸ້ງຍາກໃນການດໍາເນີນທຸລະກິດ; ຈຸດສຸມທີ 4: ສືບຕໍ່ປັບປຸງຜູ້ປະກອບການທຸລະກິດນໍ້າມັນເຊື້ອໄຟ ຕາມດໍາລັດ ສະບັບເລກທີ 331/ນຍ; ຈຸດສຸມທີ 5: ເພີ່ມທະວີການຄຸ້ມຄອງລາຄາສິນຄ້າອຸປະໂພກ-ບໍລິໂພກທີ່ລັດຄຸ້ມຄອງຕາມ 8 ປະເພດ 23 ລາຍການ ແລະ ລາຍການຕິດຕາມການເໜັງຕີງລາຄາ 197 ລາຍການ; ຈຸດສຸມທີ 6: ສືບຕໍ່ຈັດຕັ້ງປະຕິບັດ ການປັບປຸງນິຕິກໍາ, ກົນໄກ ແລະ ວິທີການເກັບລາຍຮັບຈາກໄມ້ ແລະ ຜະລິດຕະພັນໄມ້ ກໍ່ຄືການຊຳລະສະສາງໄມ້ເກົ່າຄ້າງສາງ ທີ່ລັດຖະບານໄດ້ຕົກລົງ ຕາມແຈ້ງການ ສະບັບເລກທີ 885/ນຍ; ຈຸດສຸມທີ 7: ປັບປຸງລະບຽບການ ແລະ ກົນໄກການຄຸ້ມຄອງ ຕົວແທນຈຳໜ່າຍພາຫະນະ, ຕົວແທນຈຳໜ່າຍສິນຄ້າ ໂດຍພະຍາຍາມ ປັບບັນດາຫົວໜ່ວຍທຸລະກິດດັ່ງກ່າວ ຖືບັນຊີຕາມກົດໝາຍກຳນົດ; ຈຸດສຸມທີ 8: ຍົກສູງພາລະບົດບາດ, ກົນໄກການປະສານງານ ຂອງຫ້ອງການບໍລິການປະຕູດຽວຂັ້ນແຂວງ; 

      ຈາກນັ້ນ, ບັນດາທ່ານຫົວໜ້າກົມ ແລະ ຮອງຫົວໜ້າກົມວິຊາການ ຈາກກະຊວງອຸດສາຫະກຳ ແລະ ການຄ້າ ກໍໄດ້ແລກປ່ຽນທັດສະນະໃນການແກ້ໄຂ ແລະ ປັບປຸງວຽກງານ ລວມທັງ ການປັບປຸງກົງຈັກການຈັດຕັ້ງ ແລະ ຍົກລະດັບພະນັກງານ,​ ການປັບປຸງສະພາບແວດລ້ອມໃນການລົງທຶນ ແລະ ການດໍາເນີນທຸລະກິດ ເປັນຕົ້ນແມ່ນການປັບປຸງຂອດຂັ້ນການດຳເນີນກິດຈະການໂຮງງານ ກ້າວສູ່ການນຳໃຊ້ຖານຂໍ້ມູນໂຮງງານ, ການອໍານວຍຄວາມສະດວກທາງດ້ານການຄ້າ ລວມທັງການຈໍລະຈອນສິນຄ້າ ພາຍໃນ ແລະ ສົ່ງອອກ, ວຽກງານສູນສົ່ງເສີມຫັດຖະກຳ, ການຄຸ້ມຄອງລາຄາສິນຄ້າ ລວມທັງ ລາຄານໍ້າມັນ, ການສົ່ງເສີມການເຂົ້າຫາແຫຼ່ງທຶນ ຂອງວິສາຫະກິດຂະໜາດນ້ອຍ ແລະ ກາງ, ການເກັບກຳ-ລາຍງານສະຖິຕິຂໍ້ມູນອຸດສາຫະກຳ ແລະ ການຄ້າ ແລະ ການພັດທະນານິຄົມອຸດສາຫະກຳ ຕິດພັນກັບຂະແໜງທ່ອງທ່ຽວ ແລະ ແລວທາງເສດຖະກິດລາວ-ຈີນ.

     ໃນຕອນທ້າຍ, ທ່ານ ປອ. ຄໍາແພງ ໄຊສົມແພງ, ກໍໄດ້ໃຫ້ທິດຊີ້ນຳ ແລະ ເນັ້ນໜັກ ໃນຫຼາຍໆດ້ານ ໂດຍສະເພາະຄວາມເປັນເຈົ້າການປັບປຸງສະພາບແວດລ້ອມ ກໍຄືການແກ້ໄຂຄວາມຫຍຸ້ງຍາກຂອງການດຳເນີນທຸລະກິດ ໂດຍເພີ່ມທະວີການຈັດຕັ້ງປະຕິບັດຄໍາສັ່ງ ຂອງທ່ານນາຍົກລັດຖະມົນຕີ ສະບັບເລກທີ 02/ນຍ, 03/ນຍ ແລະ 12/ນຍ ຢ່າງເຂັ້ມງວດ ເພືີ່ອປັບປຸງອັນດັບຄວາມສະດວກໃນການດຳເນີນທຸລະກິດດ້ານຕ່າງໆ ໃຫ້ດີຂຶ້ນ; ຊອກຫາຕະຫຼາດຮອງຮັບການສົ່ງອອກສິນຄ້າ ພ້ອມທັງຊ່ວຍຊຸກຍູ້ການຜະລິດ ແລະ ປຸງແຕ່ງສິນຄ້າທີ່ມີທ່າແຮງ ໂດຍແນະນໍາຂັ້ນຕອນການຜະລິດໃຫ້ຮັບປະກັນມາດຕະຖານ ແລະ ຄຸນນະພາບ ໃຫ້ສິນຄ້າໄດ້ຮັບການຢັ້ງຢືນ ກາໝາຍມາດຕະຖານແຫ່ງຊາດ ແລະ ກາໝາຍຄຸນນະພາບ ພິເສດແມ່ນການຍົກປະສິດທິພາບໃນການແຂ່ງຂັນ ເພືີ່ອສົ່ງອອກສິນຄ້າ; ວຽກຈຸດສຸມໃນແຜນພັດທະນາອຸດສາຫະກໍາປຸງແຕ່ງ ແລະ ການຄ້າ 5 ປີ ເພື່ອສ້າງພື້ນຖານອັນໜັກແໜ້ນໃນການຫັນເປັນອຸດສາຫະກໍາ ແລະ ທັນສະໄໝ; ສົ່ງເສີມການປູກພືດທົດແທນການປູກຝີ່ນ; ການເລັ່ງເຈລະຈາເປີດຕະຫຼາດ ໂດຍສະເພາະຕໍ່ສິນຄ້າກະສິກໍາ ຂອງແຂວງ ເຊັ່ນ: ພືດ ແລະ ສັດໃຫຍ່; ແລະ ການເຈລະຈາເພື່ອອໍານວຍຄວາມສະດວກການຄ້າ ກັບປະເທດເພື່ອນມິດຍຸດທະສາດ (ສປ ຈີນ, ສສ ຫວຽດນາມ) ແລະ ປະເທດບ້ານໃກ້ເຮືອນຄຽງອື່ນ ເພື່ອໃຫ້ຜະລິດຕະພັນກະສິກໍາ ທີ່​ເປັນ​ທ່າ​ແຮງຂອງປະຊາຊົນລຽບຕາມຊາຍແດນ ມີຕະຫຼາດຮອງຮັບທີ່ແນ່ນອນ. ຄຽງຄູ່ກັນ ກໍສຸມໃສ່ຜັນຂະຫຍາຍການອໍານວຍຄວາມສະດວກ ເພື່ອໃຫ້ມີການສົ່ງອອກສິນຄ້າ ຜ່ານ ທາງລົດໄຟ ລາວ-ຈີນ ເພື່ອເປີດກວ້າງຕະຫຼາດກັບ ສປ ຈີນ ແລະ ການເຊື່ອມຈອດເສດຖະກິດຈີນ-ອາຊຽນ.