ກອງປະຊຸມຝຶກອົບຮົມກ່ຽວກັບ ວຽກອໍານວຍຄວາມສະດວກທາງດ້ານການຄ້າ ໃຫ້ແກ່ຫ້ອງການປະຈໍາກອງເລຂາຄະນະກໍາມະການອໍານວຍຄວາມສະດວກທາງດ້ານການຄ້າ ຂັ້ນແຂວງ ທົ່ວປະເທດ ຄັ້ງທີ II, ພິທີໄດ້ຈັດຂຶ້ນໃນວັນທີ 15 ກຸມພາ ທີ່ໂຮງແຮມ ມິດຕະພາບ ແຂວງອຸດົມໄຊ ໂດຍການເປັນປະທານຮ່ວມຂອງທ່ານ ອ່ອນແກ້ວ ອຸ່ນອາລົມ ຮອງເຈົ້າແຂວງ ແຂວງ ອຸດົມໄຊ ແລະ ທ່ານ ນ ຈັນສຸກ ແສງພະຈັນ ຮອງລັດຖະມົນຕີກະຊວງອຸດສາຫະກໍາ ແລະ ການຄ້າ ມີຫົວໜ້າພະແນກ, ຮອງພະແນກ ແລະ ຜູ້ຕາງໜ້າຂະແໜງນຳເຂົ້າ-ສົ່ງອອກ ຂອງພະແນກອຸດສາຫະກໍາ ແລະ ການຄ້າ ທົ່ວປະເທດເຂົ້າຮ່ວມ.
ຊຸດຝຶກອົບຮົມໃນຄັ້ງນີ້ ຕົ້ນຕໍແມ່ນໄດ້ແນະນຳຜົນການຈັດຕັ້ງປະຕິບັດວຽກງານອໍານວຍຄວາມສະດວກທາງດ້ານການຄ້າ ປະຈໍປີ 2021 ແລະ ການກຳນົດແຜນວຽກໃນປີ 2022, ການສ້າງມາດຕະການບໍລິການ, ການປັບປຸງຂັ້ນຕອນ ແລະ ເວລາໃນການອອກອະນຸຍາດ, ຢັ້ງຢຶນ ການນໍາເຂົ້າ-ສົ່ງອອກ, ການເຄື່ອນຍ້າຍສິນຄ້າ, ການແກ້ໄຂບັນຫາຂອງພາກທຸກລະກິດ ແລະ ການສົ່ງອອກສິນຄ້າກະສິກໍາໄປ ສປ ຈີນ ແລະ ບາງປະເທດທີ່ມີຊາຍແດນຕິດກັບ ສປປ ລາວ. ທ່ານ ສອນທະນູ ສິງດາລາ ຫົວໜ້າພະແນກອຸດສາຫະກໍາ ແລະ ການຄ້າ ແຂວງອຸດົມໄຊ ກໍ່ໄດ້ລາຍງານສະພາບລວມ ແລະ ສະພາບຈຸດພິເສດ ກ່ຽວກັບການປູກ, ການລ້ຽງ, ການຜະລິດ ແລະ ການສົ່ງອອກສິນຄ້າກະສິກໍາ ໄປ ສປ ຈີນຕື່ມວ່າ: ໃນແຂວງ ອຸດົມໄຊ ມີເນື້ອທີ່ປູກພືດກະສິກໍາເປັນສິນຄ້າ 46.485 ເຮັກຕາ, ຜົນຜະລິດປີ 2021 ແມ່ນ 412.842 ໂຕນ, ໃນນັ້ນຈໍານວນ 319.524 ໂຕນ ແມ່ນສົ່ງອອກໄປຕ່າງປະເທດ ປະກອບມີ: ພືດຜັກ, ໝາກຖົ່ວ,ສາລີ,ກາເຟ,ອ້ອຍ,ໝາກອຶ, ໝາກໂມ, ກ້ວຍຫອມ,ຢາສູບ, ຝັກຫຼອດມ້ອນ, ງົວ,ຢາງພາລາ, ເຄື່ອງປ່າຂອງດົງ ແລະ ອື່ນໆ ສໍາລັບແຜນປີຕໍ່ໄປແມ່ນ ຈະສືບຕໍ່ຈັດຕັ້ງປະຕິບັດກິດຈະກໍາວາລະແຫ່ງຊາດ ໂດຍສະເພາະແມ່ນວຽກງານຊຸກຍູ້ສົ່ງເສີມການສົ່ງອອກໃຫ້ຫຼາຍຂຶ້ນ, ສ້າງແຜນໃນການຍົກລະດັບການຄ້າແບບຊາຍແດນໃຫ້ກາຍເປັນການຄ້າແບບທາງການ ແລະ ມີຄວາມຍືນຍົງເທື່ອລະກ້າວ, ສູ້ຊົນໃຫ້ໄດ້ສົ່ງອອກຜ່ານການຂົນສົ່ງທາງລົດໄຟ ແລະ ອື່ນໆ.
ພາບ-ຂ່າວ: ໂພໄຊ ໄຊຍະວົງ ພະແນກ ອຄ ອຸດົມໄຊ
ຮຽບຮຽງໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
