ຕອນເຊົ້າວັນພະຫັດ, ວັນທີ 24 ກຸມພາ 2022 ສະຫະພັນກຳມະບານ ກະຊວງອຸດສາຫະກຳ ແລະ ການຄ້າ ໄດ້ຈັດພິທີປະຖະກະຖາສະເຫລີມສະຫລອງວັນສ້າງຕັ້ງ ສະຫະພັນກຳມະບານລາວ ຄົບຮອບ 66 ປີ, ໃຫ້ກຽດເປັນປະທານຮ່ວມໂດຍ ສະຫາຍ ປອ. ຄໍາແພງ ໄຊສົມແພງ, ກໍາມະການສູນກາງພັກ, ເລຂາຄະນະພັກ, ລັດຖະມົນຕີກະຊວງອຸດສາຫະກຳ ແລະ ການຄ້າ ແລະ ສະຫາຍ ນາງ ອາລີ ວົງໜໍ່ບຸນທໍ​າ, ກໍາມະການສູນກາງພັກ, ເລຂາຄະນະພັກ, ປະທານຄະນະບໍລິຫານງານສູນກາງສະຫະພັນກຳມະບານ​ລາວ ມີບັນດາຄະນະບໍລິຫານງານ ສະຫະພັນກໍາມະບານກະຊວງອຸດສາຫະກໍາ ແລະ ການຄ້າ, ຄະນະປະທານຈາກ  ສະຫະພັນ ແລະ ກຳມະບານຮາກຖານທັງໝົດ 190 ສະຫາຍ ເຂົ້າຮ່ວມ.

          ໃນໂອກາດດັ່ງກ່າວ ສະຫາຍ ປອ. ຄຳແພງ ໄຊສົມແພງ, ກໍາມະການສູນກາງພັກ, ເລຂາຄະນະພັກ, ລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ກ່າວມີຄຳເຫັນໃນກອງປະຊຸມຄັ້ງນີ້: 

ເນື່ອງໃນວາລະໂອກາດວຽນມາເຖິງ ວັນສ້າງຕັ້ງກໍາມະບານຄົບຮອບ 66 ປີ ໃນຄັ້ງວັນທີ 1 ກຸມພາ 2022 ທີ່ຜ່ານມານັ້ນ, ຈຶ່ງໄດ້ມີການຈັດງານ ພິທີປະຖະກະຖາໃນມື້ນີ້ຂຶ້ນ ເຊິ່ງຖືວ່າເປັນອີກວັນໜຶ່ງທີ່ມີຄວາມໝາຍຄວາມສຳຄັນຫຼາຍ ສຳລັບສະມາຊິກກຳມະບານທຸກສະຫາຍ  ທີ່ຈະໄດ້ລະນຶກຄືນເຖິງມູນເຊື້ອການກຳເນີດ ແລະ ການເຕີບໃຫຍ່ຂະຫຍາຍຕົວຂອງອົງການຈັດຕັ້ງກໍາມະບານລາວ ທີ່ໄດ້ສ່ອງແສງໃຫ້ເຫັນເຖິງການຕໍ່ສູ້ຂອງຊົນຊັ້ນກໍາມະກອນ ແລະ ຊາວຜູ້ອອກແຮງງານລາວ.

           ຜ່ານການຟັງປະຖະກະຖາໃນຄັ້ງນີ້ ບັນດາສະຫາຍສະມາຊິກສະຫະພັນກໍາມະບານ ກະຊວງອຸດສາຫະກຳ ແລະ ການຄ້າ ຈະໄດ້ພ້ອມກັນເຊື່ອມຊຶມເຂົ້າໃຈ ເພື່ອໝູນໃຊ້ເຂົ້າໃນການປະຕິບັດວຽກງານ 5 ເປັນເຈົ້າ ໂດຍສະເພາະການປົກປ້ອງສິດ ແລະ ຜົນປະໂຫຍດອັນຊອບທຳຂອງສະມາຊິກກຳມະບານ ແລະ ຊາວຜູ້ອອກແຮງງານ.

        ພ້ອມນີ້ ສະຫາຍ ນາງ ອາລີ ວົງໜໍ່ບຸນທໍ​າ, ກໍາມະການສູນກາງພັກ, ເລຂາຄະນະພັກ, ປະທານຄະນະບໍລິຫານງານສູນກາງສະຫະພັນກຳມະບານ​ລາວ ໄດ້ເຜີຍແຜ່ກ່ຽວກັບມູນເຊື້ອຂອງ ສະຫະພັນກຳມະບານລາວ ໃນທີ່ປະຊຸມ: ບໍ່ວ່າໃນຍຸກສະໄໝໃດ ກໍາລັງແຮງຂອງສະມາຊິກກຳມະບານ ຫຼື ຊົນຊັ້ນກໍາມະກອນ ແລະ ຊາວຜູ້ອອກແຮງງານລາວ ຍາມໃດກໍຖືວ່າເປັນກ້ອນກໍາລັງຍຸດທະສາດທີ່ສຳຄັນຂອງພັກປະຊາຊົນປະຕິວັດລາວ ເພາະກວມເອົາຈຳນວນພົນທີ່ຫຼາຍ ແລະ ໄດ້ປະກອບສ່ວນທາງດ້ານແນວຄິດ ແລະ ກໍາລັງແຮງ ສຸມໃສ່ວຽກງານພັດທະນາປະເທດຊາດ ເວົ້າລວມ, ເວົ້າສະເພາະ ການພັດທະນາເສດຖະກິດ-ສັງຄົມລາວຕະຫຼອດມາ. ເຫັນໄດ້ວ່າມີສະມາຊິກກໍາມະບານ ຫຼື ຊົນຊັ້ນກໍາມະກອນ ແລະ ຊາວຜູ້ອອກແຮງງານ ໄດ້ປະກອບສ່ວນໃນທຸກໆຂະແໜງການໃນຂົງເຂດເສດຖະກິດ ແລະ ທຸກສາຍງານອາຊີບ ໂດຍສະເພາະໃນຂະ  ແໜງການອຸດສາຫະກໍາ ແລະ ການຄ້າ  ກໍໄດ້ໃຫ້ຄວາມສຳຄັນຂອງຊົນຊັ້ນກໍາມະກອນ ແລະ ຊາວຜູ້ອອກແຮງງານ ໂດຍໄດ້ສືບຕໍ່ຂົນຂວາຍທັງພາກລັດ ແລະ ພາກເອກະຊົນ. ຊົນຊັ້ນກຳມະກອນ ແລະ ຊາວຜູ້ອອກແຮງງານ ໄດ້ຊຸກຍູ້ສົ່ງເສີມສິດທິ ແລະ ຜົນປະໂຫຍດອັນຊອບທຳຂອງພວກເຂົາ.

         ໃນກອງປະຊຸມຄັ້ງນີ້  ສະຫະພັນກໍາມະບານ ກະຊວງອຸດສາຫະກໍາ ແລະ ການຄ້າ ກໍໄດ້ປະກາດບັ້ນແຂ່ງຂັນ 5 ເປັນເຈົ້າ ປະຈຳປີ 2022 ເພື່ອໃຫ້ແຕ່ລະສະຫະພັນກຳມະບານຮາກຖານນັ້ນ ພ້ອມພຽງກັນຈັດຕັ້ງປະຕິບັດວຽກງານກຳມະບານ ເຂົ້າສູ່ລວງເລິກຂອງຂະແໜງການ.

ພາບ-ຂ່າວ: ສະຫະພັນກໍາມະບານ ກະຊວງອຸດສາຫະກໍາ ແລະ ການຄ້າ