ໃນວັນທີ 2 ມີນາ 2022, ທ່ານ ບຸນເຖິງ ດວງສະຫວັນ, ຮອງລັດຖະມົນຕີກະຊວງອຸດສາຫະກໍາ ແລະ ການຄ້າ, ທັງເປັນຫົວໜ້າເຈົ້າໜ້າທີ່ສະເພາະກິດລະດັບສູງເພື່ອການເຊື່ອມໂຍງເສດຖະກິດອາຊຽນຂອງ ສປປ ລາວ ໄດ້ນໍາພາຄະນະຜູ້ແທນຂອງ ສປປ ລາວ ເຂົ້າຮ່ວມກອງປະຊຸມທາງໄກເຈົ້າໜ້າທີ່ສະເພາະກິດລະດັບສູງເພື່ອການເຊື່ອມໂຍງເສດຖະກິດອາຊຽນ ຄັ້ງທີ 41 ທີ່ຫ້ອງປະຊຸມທາງໄກ, ກະຊວງອຸດສາຫະກໍາ ແລະ ການຄ້າ. ກອງປະຊຸມຄັ້ງນີ້ ດຳເນີນພາຍໃຕ້ການເປັນປະທານຂອງ ທ່ານ RIZAL AFFANDI LUKMAN, ທີ່ປຶກສາພິເສດຂອງລັດຖະມົນຕີ, ກະຊວງປະສານງານເສດຖະກິດອິນໂດເນເຊຍ ໂດຍມີເຈົ້າໜ້າທີ່ສະເພາະກິດລະດັບສູງເພື່ອການເຊື່ອມໂຍງເສດຖະກິດອາຊຽນຈາກ 10 ປະເທດສະມາຊິກອາຊຽນ ແລະ ຮອງເລຂາທິການໃຫຍ່ອາຊຽນ ເຂົ້າຮ່ວມ.
ກອງປະຊຸມໄດ້ປຶກສາຫາລື, ແລກປ່ຽນຄໍາຄິດເຫັນກ່ຽວກັບ ບັນດາໜ້າວຽກພາຍໃຕ້ເສົາຄໍ້າເສດຖະກິດ ເພື່ອກະກຽມ ແລະ ສະເໜີຕໍ່ກອງປະຊຸມລັດຖະມົນຕີເສດຖະກິດອາຊຽນ ແບບວົງແຄບ ຄັ້ງທີ 28 ພິຈາລະນາຮັບຮອງເອົາໃນກາງເດືອນມີນາ ທີ່ຈະມາເຖິງນີ້ ເປັນຕົ້ນ: ກອງປະຊຸມໄດ້ປຶກສາຫາລືກ່ຽວກັບ ແຜນວຽກບູລິມະສິດພາຍໃຕ້ເສົາຄໍ້າເສດຖະກິດໃນໄລຍະການເປັນປະທານອາຊຽນຂອງກໍາປູເຈຍ ປີ 2022 ຊຶ່ງມີທັງໝົດ 19 ແຜນວຽກ ຊຶ່ງບັນດາແຜນວຽກບູລິມະສິດດັ່ງກ່າວນີ້ ຈະເປັນການປະກອບສ່ວນໃຫ້ແກ່ການສົ່ງເສີມການເຊື່ອມຈອດດີຈີຕ໋ອນ, ວິທະຍາສາດ ແລະ ເຕັກໂນໂລຊີໃນອາຊຽນ, ທັງເປັນການຮັດແຄບຊ່ອງວ່າງຄວາມແຕກໂຕນດ້ານການພັດທະນາ ແລະ ສົ່ງເສີມການເຊື່ອມໂຍງ ແລະ ຄວາມສາມາດໃນການແຂ່ງຂັນຂອງອາຊຽນ ໂດຍສະເພາະໃນຊ່ວງໄລຍະການແຜ່ລະບາດຂອງພະຍາດໂຄວິດ-19.
ໃນການຮັບມືກັບການແຜ່ລະບາດຂອງພະຍາດໂຄວິດ-19, ພາຍຫຼັງການຮັບຮອງເອົາ ຂອບວຽກວ່າດ້ວຍການຟື້ນຟູຮອບດ້ານອາຊຽນ ໃນປີ 2020 ທີ່ຜ່ານມາ ກອງປະຊຸມໄດ້ ຮັບຊາບຄວາມຄືບໜ້າຂອງການຈັດຕັ້ງປະຕິບັດຂອບວຽກດັ່ງກ່າວ ໂດຍສະເພາະແມ່ນການຈັດຕັ້ງປະຕິບັດບັນດາຂໍ້ລິເລີ່ມທີ່ຢູ່ພາຍໃຕ້ເສົາຄໍ້າເສດຖະກິດ. ທັງນີ້, ກອງປະຊຸມຍັງໄດ້ຮັບຊາບຄວາມຄືບໜ້າວຽກງານສືບຕໍ່ຈາກຂໍ້ສະເໜີພາຍຫຼັງການທົບທວນກາງສະໄໝການຈັດຕັ້ງປະຕິບັດແຜນແມ່ບົດປະຊາຄົມເສດຖະກິດອາຊຽນ 2025 ເພື່ອເປັນພື້ນຖານໃຫ້ແກ່ການສ້າງວິໃສທັດຂອງອາຊຽນຫຼັງ 2025.
ພ້ອມດຽວກັນນີ້, ກອງປະຊຸມຍັງໄດ້ຕິດຕາມຄວາມຄືບໜ້າການຈັດຕັ້ງປະຕິບັດວຽກງານການປະຕິວັດອຸດສາຫະກໍາ 4.0 ແລະ ການຫັນເປັນດິຈິຕ໋ອ ນອາຊຽນ; ປຶກສາຫາລືກ່ຽວກັບຂອບວຽກວ່າດ້ວຍເສດຖະກິດໝູນວຽນຂອງເສົາຄໍ້າເສດຖະກິດອາຊຽນ, ຂໍ້ສະເໜີຂອງກອງປະຊຸມເສດຖະກິດໂລກໃນການເຮັດບັດບັນທຶກຄວາມເຂົ້າໃຈວ່າດ້ວຍການຮ່ວມມືກັບອາຊຽນ, ຄວາມສົນໃຈຂອງ ບັງກລາເທດ ທີ່ສະເໜີເຮັດບົດສຶກສາຄວາມເປັນໄປໄດ້ໃນການສ້າງສັນຍາການຄ້າເສລີກັບອາຊຽນ ແລະ ເອກະສານແນວຄວາມຄິດກ່ຽວກັບການຫຼຸດຜ່ອນກາກບອນໃນອາຊຽນ ຊຶ່ງຈຸດປະສົງຂອງເອກະສານດັ່ງກ່າວແມ່ນ ເພື່ອຫຼຸດຜ່ອນການປ່ອຍອາຍກາກໂບນິກໃນພາກພື້ນອາຊຽນ ແລະ ປະກອບສ່ວນເຂົ້າໃນການຫັນໄປສູ່ເສດຖະກິດກາກບອນຕໍ່າ.
ພາບ-ຂ່າວ: ໄດ້ມາຈາກ ກົມນະໂຍບາຍການຄ້າຕ່າງປະເທດ, ກະຊວງ ອຄ.
ຮຽບຮຽງ: ໄພຄໍາອີ
