ໃນວັນ​ທີ 24 ມີນາ 2022, ກະຊວງ​ອຸດສາ​ຫະກຳ ​ແລະ ການ​ຄ້າ ໄດ້​​​ເປີດກອງ​ປະຊຸມ​ປະຈຳ​ປີ 2021 ຂອງຂະ​ແໜງອຸດສາຫະກຳ ​ແລະ ການ​ຄ້າ ຢ່າງ​ເປັນ​ທາງການ ທີ່ກະຊວງອຸດສາຫະກຳ ແລະ ການຄ້າ ຜ່ານຮູບແບບປະຊຸມທາງໄກ ກອງ​ປະຊຸມໄດ້ດໍາ​ເນີນ​ລະຫວ່າງ ວັນທີ 24-25 ມີນາ 2022 ນີ້ ໂດຍການເປັນປະທານ ຂອງ ທ່ານ ປອ ຄຳແພງ ໄຊສົມແພງ ລັດຖະມົນຕີ​ ກະຊວງ​ອຸດສາຫະກຳ ​ແລະ ການ​ຄ້າ. ມີ ຮອງລັດຖະມົນຕີ, ຮອງເຈົ້າແຂວງ, ຮອງເຈົ້າຄອງນະຄອນຫລວງ, ຫົວໜ້າ​-ຮອງຫົວໜ້າກົມ, ຫົວ  ໜ້າພະແນກ ຈາກບັນດາກົມ, ສະຖາບັນ ແລະ ຫ້ອງການກະຊວງ, ສະພາການຄ້າ ແລະ ອຸດສາຫະກຳແຫ່ງຊາດ, ບັນດາລັດວິສາຫະກິດ ອ້ອມຂ້າງກະຊວງ, ຫົວໜ້າພະແນກ/ຮອງຫົວໜ້າພະແນກ ອຄ ແຂວງ, ນະຄອນຫຼວງ ເຂົ້າຮ່ວມຈຳນວນ 220 ທ່ານ.

     ຈຸດປະສົງຂອງການຈັດກອງປະຊຸມຄັ້ງນີ້ ​ແມ່ນເພື່ອສະຫຼຸບຕີລາຄາການຈັດຕັ້ງປະຕິບັດ ແຜນພັດທະນາອຸດສາຫະກໍາປຸງແຕ່ງ ແລະ ການຄ້າ ປະຈໍາປີ 2021 ແລະ ທິດທາງແຜນການປີ 2022 ຂອງຂະແໜງອຸດສາຫະກຳ ແລະ ການຄ້າ ແລະ ລົງເລີກບາງໜ້າທີ່ວຽກງານ ທີ່ສັງຄົມໃຫ້ຄວາມສົນໃຈ ກໍຄືສີ່ງທີ່ລັດຖະບານໃຫ້ຄວາມສຳຄັນ ເປັນຕົ້ນ ການພັດທະນາອຸດສາຫະກໍາປຸງແຕ່ງ ແລະ ຫັດຖະກຳ ປະກອບສ່ວນແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ; ການຄຸ້ມຄອງລາຄາສິນຄ້າອຸປະໂພກ-ບໍລິໂພກ ແລະ ລາຄານ້ຳມັນ; ການສົ່ງເສີມການຄ້າເຂົ້າເຖິງຕະຫຼາດພາຍໃນ ແລະ ຕ່າງປະເທດ; ການສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ໃນການເຂົ້າເຖີງແຫລ່ງທຶນ; ການອຳນວຍຄວາມສະດວກທາງດ້ານການຄ້າ ໃນການສົ່ງອອກສິນຄ້າ ໄປ ສປ ຈີນ; ການຄຸ້ມຄອງກວດກາ ແລະ ຢັ້ງຢືນຄຸນນະພາບ ຂອງສິນຄ້າ ຂອງ ສປປ ລາວ ໃຫ້ເຊື່ອມໂຍງພາກພື້ນ ແລະ ສາກົນ ແລະ ວຽກງານຊັບສິນທາງບັນຍາ. ນອກນັ້ນ ກອງປະຊຸມຍັງໄດ້ລົງເລີກ ທັງດ້ານດີ-ດ້ານອ່ອນ, ປຶກສາຫາລື ຖາມ-ຕອບ ຂໍຄວາມກະຈ່າງແຈ້ງ ໃນບັນຫາຕ່າງໆ ທີ່ຈະຕ້ອງເອົາໃຈໃສ່ ແລະ ນຳໄປຈັດຕັ້ງປະຕິບັດຢ່າງເປັນເອກະພາບກັນ ໃນຂະແໜງ ອຄ;

     ໃນໄລຍະ 1 ປີຜ່ານມາ ສາມາດສະຫຼຸບວຽກງານອັນພົ້ນເດັ່ນ ທີ່ສ້າງມາໄດ້ ຄື:

1) ສໍາເລັດການສ້າງດໍາລັດ ວ່າດ້ວຍການຄ້າທາງເອເລັກໂຕຣນິກ ສະບັບເລກທີ 296/ລບ, ລົງວັນທີ 12 ເມສາ 2021;

2) ສໍາເລັດການສ້າງແຜນພັດທະນາອຸດສາຫະກໍາປຸງແຕ່ງ ແລະ ການຄ້າ 5 ປີ ໄລຍະ 2021 -2025 ແລະ ໄດ້ຮັບຮອງຢ່າງເປັນທາງການເປັນທີ່ຮຽບຮ້ອຍແລ້ວ;

3) ສໍາເລັດການສ້າງແຜນພັດທະນາການສົ່ງອອກ ຂອງ ຂະແໜງອຸດສາຫະກໍາປຸງແຕ່ງໄມ້ ຂອງ ສປປ ລາວ ໄລຍະ 2021-2025 (Wood Processing Sector Export Roadmap 2021-2025) ແລະ ໄດ້ຮັບຮອງຢ່າງເປັນທາງການເປັນທີ່ຮຽບຮ້ອຍແລ້ວ;

4) ສໍາເລັດການສ້າງແຜນພັດທະນາສົ່ງເສີມການສົ່ງອອກກາເຟລາວ Lao PDR Coffee Sector Export  Roadmap ໄລຍະ 2021-2025.

5) ສໍາເລັດໃນການປະສານສົມທົບກັບຂະແໜງການທີ່ກ່ຽວຂ້ອງ ເພື່ອປຶກສາຫາລືກ່ຽວກັບການປັບປຸງແກ້ໄຂ, ຫຼຸດຂອດຂັ້ນ ແລະ ໄລຍະເວລາ ໃນການເລີ່ມຕົ້ນດໍາເນີນທຸລະກິດຢູ່ ສປປ ລາວ ໃຫ້ສະດວກ, ກະທັດຮັດ ແລະ ວ່ອງໄວຂຶ້ນ ຊຶ່ງສາມາດຫຼຸດຈາກ 09 ຂັ້ນຕອນມາເປັນ 03 ຂັ້ນຕອນ, ຈາກ 173 ວັນ ມາເຫຼືອພຽງ 17 ວັນ;

6) ສໍາເລັດພິທີລົງນາມຮ່ວມມືການຈັດຊື້ສິນຄ້າປຸງແຕ່ງກະສິກຳຈາກ ສປປ ລາວ ໄປ ສປ ຈີນ ໃນຈຳນວນ 09 ລາຍການສິນຄ້າຄື: ໝາກຖົ່ວດິນ, ແປ້ງມັນຕົ້ນ, ຊີ້ນງົວແຊ່ແຂງ, ໝາກມ່ວງຫິມະພານ, ໝາກຖົ່ວລຽນ ແລະ ຖົ່ວລຽນແຊ່ເເຂງ, ໝາກຖົ່ວເຫຼືອງ, ໝາກກ້ວຍ, ໝາກມ່ວງ ແລະ ໝາກມ່ວງອົບແຫ້ງ, ຊຶ່ງຄາດຄະເນລວມມູນຄ່າການສົ່ງອອກຈຫຼາຍກວ່າ 1,5 ຕື້ ໂດລາສະຫະລັດຕໍ່ປີ.

7) ສໍາເລັດເຂົ້າຮ່ວມງານວາງສະແດງໂລກ EXPO 2020 DUBAI: ກະຊວງອຸດສາຫະກໍາ ແລະ ການຄ້າພ້ອມດ້ວຍພາກສ່ວນທີ່ກ່ຽວຂ້ອງ ທີ່ໄດ້ຕາງໜ້າໃຫ້ລັດຖະບານແຫ່ງ ສປປ ລາວ ເຂົ້າຮ່ວມງານວາງສະແດງໂລກທີ່ຈັດຂຶ້ນທີ່ປະເທດສະຫະລັດອາລັບເອມີເລດ ເຊິ່ງງານດັ່ງກ່າວມີບັນດາປະເທດຕ່າງໆຈາກທົ່ວໂລກເຂົ້າຮ່ວມທັງໝົດ 192 ປະເທດ ແລະ ເປີດໃຫ້ເຂົ້າທ່ຽວຊົມງານເປັນເວລາ 06 ເດືອນ ນັບແຕ່ວັນທີ 01 ຕຸລາ 2021 ຫາວັນທີ 31 ມີນາ 2022;

 ໃນ​ໄລຍະ​ຜ່ານ​ມາ​ການ​ປະຕິບັດຕົວເລກຄາດໝາຍສູ້ຊົນຕົ້ນຕໍ ປີ 2021 ຂອງ​ຂະ​ແໜງ ອຄ ມີ​ດັ່ງ​ນີ້:

ດ້ານອຸດສາຫະກໍາປຸງແຕ່ງ ແລະ ຫັດຖະກໍາ:  ມູນຄ່າການຜະລິດອຸດສາຫະກໍາປຸງແຕ່ງ ແລະ ຫັດຖະກໍາ ປີ 2021 ບັນລຸໄດ້ 11 ພັນຕື້ກວ່າກີບ ເທົ່າກັບ 86,26% ຂອງແຜນປີ (ແຜນປີແມ່ນ 13.771 ຕື້ກີບ) ທຽບໃສ່ໄລ ຍະດຽວກັນຂອງປີຜ່ານມາເຫັນວ່າຫຼຸດລົງ 6,84%. ດ້ານການຄ້າພາຍໃນ: ມູນຄ່າການຈໍລະຈອນສິນຄ້າ (ຂາຍຍົກ-ຂາຍຍ່ອຍ ແລະ ຄ່າບໍລິການ) ປີ 2021 ບັນ ລຸໄດ້ 61 ພັນຕື້ກວ່າກີບ ເທົ່າກັບ 85% ຂອງແຜນການປີ (ແຜນປີແມ່ນ 71.882 ຕື້ກີບ) ທຽບໃສ່ໄລຍະດຽວກັນຂອງປີຜ່ານມາເຫັນວ່າຫຼຸດລົງ 3,55% ແລະ ດ້ານການຄ້າຕ່າງປະເທດ: ມູນຄ່າການນຳເຂົ້າ ແລະ ສົ່ງອອກ ຂອງ ສປປ ລາວ ສາມາດບັນລຸໄດ້ທັງ  ໝົດປະມານ 13.514 ລ້ານໂດລາສະຫະລັດ (ລວມທັງຕົວເລກຄາດຄະເນການນໍາເຂົ້າ ແລະ ສົ່ງອອກ ໄຟຟ້າ)  ເທົ່າກັບ 104,2% ຂອງແຜນການປີ 2021 (ມະຕິສະພາແຫ່ງຊາດ ສະບັບເລກທີ 12/ສພຊ, ລົງວັນທີ 01 ພະຈິກ 2020) ທຽບໃສ່ ປີ 2020 ແມ່ນເພີ່ມຂຶ້ນ 20,4%; ເຊິ່ງໃນນີ້, ​ມູນ​ຄ່າການ​ສົ່ງ​ອອກ​ບັນ​ລຸໄດ້ 7.627 ລ້ານ​ໂດ​ລາ, ເພີ່ມ​ຂຶ້ນ 23,9% ແລະ ປະ​ຕິ​ບັດ​ໄດ້ 115,9% ​ຂອງ​ແຜນ​ການ​ປີ 2021, ສ່ວນມູນ​ຄ່າການ​ນຳ​ເຂົ້າບັນ​ລຸໄດ້ 5.887 ລ້ານ​ໂດ​ລາ, ເພີ່ມ​ຂຶ້​ນ 16,2% ແລະ ​ປະ​ຕິ​ບັດ​​ໄດ້ 92,2% ຂອງ​ແຜນ​ການ​ປີ 2021. ຈາກຕົວເລກດັ່ງກ່າວແມ່ນເຫັນວ່າ ມູນຄ່າການຄ້າແມ່ນເກີນດຸນ 1.740 ລ້ານໂດລາສະຫະລັດ; ຢ່າງ​ໃດ​ກໍ​ຕາມ, ຖ້າ​ຫາກບໍ່​ລວມ​ຕົວ​ເລກ​ນຳ​ເຂົ້າແລະສົ່ງ​ອອກ​ໄຟ​ຟ້າ, ​ສ​ປ​ປລາວ ​ຍັງຈະຂາດ​ດຸນ 228 ລ້ານ​ໂດ​ລາ.

ຕົວເລກຄາດໝາຍສູ້ຊົນຕົ້ນຕໍ ປີ 2022 ຂອງ​ຂະ​ແໜງ ອຄ ມີ​ດັ່ງ​ນີ້: ບັນດາຕົວເລກຄາດໝາຍສູ້ຊົນຕົ້ນຕໍປີ 2022: ອີງຕາມມະຕິກອງປະຊຸມສະພາແຫ່ງຊາດ ສະບັບເລກທີ 41.ສພຊ, ລົງວັນທີ 17 ພະຈິກ 2021 ກ່ຽວກັບທິດທາງແຜນການປະຈໍາປີ 2022 ໃນຂົງເຂດອຸດສາຫະກໍາ ແລະ ການຄ້າ ແມ່ນມີດັ່ງນີ້: ສູ້ຊົນສ້າງມູນຄ່າຜະລິດອຸດສາຫະກຳປຸງແຕ່ງ ແລະ ຫັດຖະກຳ ຄາດຄະເນໃຫ້ບັນລຸ 13.007 ຕື້ກີບ. ສູ້ຊົນສ້າງມູນຄ່າຈໍລະຈອນສິນຄ້າ ຄາດຄະເນໃຫ້ບັນລຸ  67.833 ຕື້ກີບ. ສູ້ຊົນສ້າງມູນຄ່າການນຳເຂົ້າ ແລະ ສົ່ງອອກ ຄາດຄະເນໃຫ້ບັນລຸ  13.650 ລ້ານໂດລາສະຫະລັດ. ໃນນັ້ນ, ມູນຄ່າການສົ່ງອອກ  7.600 ລ້ານໂດລາສະຫະລັດ ແລະ ມູນຄ່າການນໍາເຂົ້າ  6.050 ລ້ານໂດລາສະຫະລັດ.

ຕີລາຄາການຈັດຕັ້ງປະຕິບັດແຜນພັດທະນາ ອຄ ປີ 2021 ຕາມ V ແຜນງານ ຄືດັ່ງລະອຽດລຸ່ມນີ້:

ແຜນງານທີ 1: ການເຊື່ອມໂຍງ ແລະ ເຊື່ອມຈອດເສດຖະກິດກັບພາກພື້ນ ແລະ ສາກົນ: ສໍາເລັດການສ້າງດໍາລັດ ວ່າດ້ວຍການຄ້າທາງເອເລັກໂຕຣນິກ. ສໍາເລັດບົດຄົ້ນຄວ້າຜົນກະທົບດ້ານສິດທິພິເສດທາງການຄ້າຂອງ ສປ ຈີນ, ເກົາຫຼີ, ຍີ່ປຸ່ນ ແລະ ອີຢູ ພາຍຫຼັງຫຼຸດພົ້ນອອກຈາກສະຖານະພາບດ້ອຍພັດທະນາຂອງ ສປປ ລາວ ເພື່ອປະກອບເຂົ້າໃນການກະກຽມຍຸດທະສາດທີ່ຕິດພັນກັບວຽກງານຄ້າພາຍຫຼັງຫຼຸດພົ້ນອອກຈາກປະເທດດ້ອຍພັດທະນາ. ສຳເລັດຂໍ້ສະເໜີຂອງ ສປປ ລາວ ທີ່ຕິດພັນກັບການເຈລະຈາຂໍ້ລິເລີ່ມຂອງ ອຄລ ວ່າດ້ວຍການອຳນວຍຄວາມສະດວກດ້ານການລົງທຶນ. ສຳເລັດຂໍ້ສະເໜີຂອງ ສປປ ລາວ ກ່ຽວກັບຄວາມໝັ້ນຄົງດ້ານສະບຽງອາຫານໃນຂອບສັນຍາ ອຄລ ເພື່ອເປັນຫົວຂໍ້ສະເໜີໃຫ້ກອງປະຊຸມລະດັບລັດຖະມົນຕີ ອຄລ ຄັ້ງທີ 12 ພິຈາລະນາ. ສໍາເລັດການປັບປຸງເນື້ອໃນສັນຍາການຄ້າສອງຝ່າຍລາວ-ຫວຽດນາມ ເພື່ອໃຫ້ສອດຄ່ອງກັບສະພາບການຄ້າໃນປະຈຸບັນ. ສຳເລັດການເຈລະຈາ ແລະ ລົງນາມໃນບົດບັນທຶກຊ່ວຍຈຳລະຫວ່າງ ສປປ ລາວ ແລະ ສປ ຈີນ ວ່າດ້ວຍການໃຫ້ສິດທິພິເສດທາງການຄ້າໃນການຍົກເວັ້ນອັດຕາພາສີ ຈໍານວນ 97% ຂອງລາຍການສິນຄ້າທັງ  ໝົດ (GSP 97%) ຂອງ ສປ ຈີນໃຫ້ແກ່ ສປປ ລາວ. ສໍາເລັດການປັບປຸງ ແລະ ຍົກລະດັບສັນຍາການຄ້າເສລີລະຫວ່າງອາຊຽນກັບປະເທດຄູ່ເຈລະຈາ ເຊັ່ນ: ສັນຍາການຄ້າເສລີອາຊຽນ-ສປ ຈີນ, ສັນຍາການຄ້າເສລີອາຊຽນ-ສ. ເກົາຫຼີ, ສັນຍາການຄ້າເສລີອາຊຽນ-ອິນເດຍ, ສັນຍາການຄ້າເສລີອາຊຽນ-ອົດສະຕຣາລີ-ນິວຊີແລນ. ສຳເລັດການໃຫ້ສັດຕະຍະບັນແກ່ສັນຍາວ່າດ້ວຍການຮ່ວມມືເສດຖະກິດແບບຮອບດ້ານລະດັບພາກພື້ນ (RCEP). ສໍາເລັດການເຈລະຈາ ແລະ ຮັບຮອງເອົາເອກະສານອ້າງອີງເພື່ອສ້າງສັນຍາການຄ້າເສລີອາຊຽນ-ການາດາ. ສ້າງແຜນດຳເນີນງານການຮ່ວມມືດ້ານການຄ້າ ແລະ ການລົງທຶນ ສຳລັບປີ 2021-2025 ລະຫວ່າງ ອາຊຽນ-ລັດເຊຍ, ອາຊຽນ-ຍີ່ປຸ່ນ, ອາຊຽນ-ສະຫະລັດອາເມລິກາ ແລະ ອາຊຽນ-ອັງກິດ. ສຳເລັດການສ້າງຂອບວຽກລວມຂອງອາຊຽນ ເພື່ອຈັດຕັ້ງປະຕິບັດແຜນຟື້ນຟູຮອບດ້ານອາຊຽນ ພາຍຫຼັງໂຄວິດ-19 ແລະ ຍຸດທະສາດລວມຂອງອາຊຽນກ່ຽວກັບການປະຕິວັດອຸດສາຫະກໍາຄັ້ງທີ 4 (4IR). ສໍາເລັດການປະເມີນກາງສະໄໝ ກ່ຽວກັບການຈັດຕັ້ງປະຕິບັດແຜນແມ່ບົດການສ້າງປະຊາຄົມເສດຖະກິດອາຊຽນ 2025 ແລະ ກຳນົດນະໂຍບາຍໃນການຈັດຕັ້ງປະຕິບັດແຜນແມ່ບົດດັ່ງກ່າວຮອດປີ 2025. ໄດ້ກຳນົດແຜນວຽກເພື່ອຜັນຂະຫຍາຍ ແລະ ຈັດຕັ້ງປະຕິບັດຂອບວຽກວ່າດ້ວຍການພັດທະນາປະເທດ CLMV ແນໃສ່ເພື່ອສ້າງໃຫ້ປະເທດ CLMV ກາຍເປັນປະເທດທີ່ມີລາຍຮັບປານກາງສູງ ແລະ ເປັນຈຸດໃຈກາງຂອງການລົງທຶນໃນປີ 2030. ສໍາເລັດການເຈລະຈາການເຂົ້າຮ່ວມເປັນພາຄີຂອງສັນຍາວ່າດ້ວຍ ເຕັກໂນໂລຊີຂໍໍ້ມູນຂ່າວສານໃນຂອບສັນຍາອົງການການຄ້າໂລກ.

ແຜນງານທີ 2: ສົ່ງເສີມການພັດທະນາອຸດສາຫະກໍາ ແລະ ການຜະລິດເປັນສິນຄ້າ ຕິດພັນກັບຕະຫຼາດ:

-       ວຽກອຸດສາຫະກໍາປຸງແຕ່ງ ແລະ ຫັດຖະກໍາ: ສໍາເລັດການສ້າງແຜນພັດທະນາອຸດສາຫະກໍາປຸງແຕ່ງ ແລະ ຫັດຖະກໍາ 5 ປີ 2021-2025. ສໍາເລັດການສ້າງແຜນພັດທະນາການສົ່ງອອກຂອງຂະແໜງອຸດສາຫະກໍາປຸງແຕ່ງໄມ້ ຂອງ ສປປ ລາວ ໄລຍະ 2021-2025. ອອກແຈ້ງການແນະນໍາ ກ່ຽວກັບການຈັດຕັ້ງປະຕິບັດມາດຕະການເພີ່ມເຕີມໃນການເພີ່ມທະວີມາດຕະການສະກັດກັ້ນ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດໂຄວິດ-19 ຢູ່ບັນດາໂຮງງານອຸດສາຫະກໍາປຸງແຕ່ງ ແລະ ຫັດຖະກໍາ; ອອກແຈ້ງການ ກ່ຽວກັບໃຫ້ຢຸດເຊົາຊົ່ວຄາວການດໍາເນີນກິດຈະການໂຮງງານຕັດຫຍິບ ແລະ ໂຮງງານຜະລິດເກີບ (ຍົກເວັ້ນໂຮງງານທີ່ນໍາໃຊ້ແຮງງານທີ່ຢູ່ຫໍພັກໃນຂອບເຂດໂຮງງານຂອງຕົນ) ເພື່ອສະກັດກັ້ນ ແລະ ຄວບຄຸມການລະບາດຂອງພະຍາດໂຄວິດ-19. ໄດ້ລົງກວດກາ ແລະ ຊຸກຍູ້ໃຫ້ໂຮງງານຜະລິດຜ້າອັດປາກອັດດັງ ແລະ ອຸປະກອນຈໍາເປັນທາງການແພດອື່ນໆ ສືບຕໍ່ດຳເນີນການຢ່າງເປັນປົກກະຕິ. ສໍາເລັດບົດແນະນໍາ ກ່ຽວກັບການຜັນຂະຫຍາຍຂໍ້ຕົກລົງວ່າດ້ວຍສູນສົ່ງເສີມຫັດຖະກໍາ. ໄດ້ສົມທົບກັບພະແນກອຸດສາຫະກໍາ ແລະ ການຄ້ານະຄອນຫຼວງ, ຫ້ອງການ ອຄ 9 ຕົວເມືອງ ໃນນະຄອນຫຼວງວຽງຈັນ, ສະມາຄົມຫັດຖະກໍາລາວ ແລະ ສະພາການຄ້າ ແລະ ອຸດສາຫະກໍາແຫ່ງຊາດລາວ ເພື່ອສົ່ງເສີມການຜະລິດ ແລະ ຈໍາໜ່າຍສິນຄ້າຫັດຖະກໍາ ທີ່ເປັນຜະລິດຕະພັນກະຕ່າຂອງຂວັນ-ອວຍພອນຈາກເຄື່ອງຫັດຖະກໍາໃນ 5 ຕົວເມືອງ (ຈັນທະບູລີ, ສີສັດຕະນາກ, ໄຊເສດຖາ, ໄຊທານີ ແລະ ສີໂຄດຕະບອງ).

- ວຽກສົ່ງເສີມການຄ້າ: ສໍາເລັດການສ້າງແຜນພັດທະນາສົ່ງເສີມການສົ່ງອອກກາເຟລາວ Lao PDR Coffee Sector Export  Roadmap ໄລຍະ 2021-2025. ສໍາເລັດພິທີລົງນາມຮ່ວມມືການຈັດຊື້ສິນຄ້າປຸງແຕ່ງກະສິກຳຈາກ ສປປ ລາວ ໄປ ສປ ຈີນ ໃນຈຳນວນ 09 ລາຍການສິນຄ້າຄື: ໝາກຖົ່ວດິນ, ແປ້ງມັນຕົ້ນ, ຊີ້ນງົວແຊ່ແຂງ, ໝາກມ່ວງຫິມະພານ, ໝາກຖົ່ວລຽນ ແລະ ຖົ່ວລຽນແຊ່ເເຂງ, ໝາກຖົ່ວເຫຼືອງ, ໝາກກ້ວຍ, ໝາກມ່ວງ ແລະ ໝາກມ່ວງອົບແຫ້ງ, ຊຶ່ງຄາດຄະເນລວມມູນຄ່າການສົ່ງອອກຫຼາຍກວ່າ 1,5 ຕື້ ໂດລາສະຫະລັດຕໍ່ປີ. ສໍາເລັດເຂົ້າຮ່ວມງານວາງສະແດງໂລກ EXPO 2020 DUBAI: ຊຶ່ງງານດັ່ງກ່າວມີບັນດາປະເທດຕ່າງໆຈາກທົ່ວໂລກເຂົ້າຮ່ວມທັງໝົດ 192 ປະເທດ ແລະ ເປີດໃຫ້ເຂົ້າທ່ຽວຊົມງານເປັນເວລາ 06 ເດືອນ ນັບແຕ່ວັນທີ 01 ຕຸລາ 2021 ຫາວັນທີ 31 ມີນາ 2022. ສໍາລັບ ປີ 2021 ສາມາດອອກອະນຸຍາດນໍາໃຊ້ກາໝາຍສິນຄ້າ ໜຶ່ງເມືອງ ໜຶ່ງຜະລິດຕະພັນແຫ່ງຊາດ ທັງໝົດແມ່ນ 15 ຫົວໜ່ວຍ, 56 ຜະລິດຕະພັນ, ພ້ອມນີ້ຍັງໄດ້ເປີດສູນຈຳໜ່າຍສິນຄ້າໂອດອບແຫ່ງຊາດ ເຖິງ 02 ແຫ່ງ ຄື: ສູນຝາກຂາຍ ໂອດອບລາວ ເອັນແອນເອັນ/12 ສ່ວນບຸກຄົນ ທີ່ ສູນການຄ້າວຽງຈັນເຊັນເຕີ (ນະຄອນຫຼວງວຽງຈັນ) ແລະ ບໍລິສັດ ຮຸ່ງຈະເລີນ ລວຍຊັບ ການຄ້າ ນໍາເຂົ້າ-ສົ່ງອອກ ຈໍໍາກັດຜູ້ດຽວ ທີ່ ບ້ານໂຊກນ້ອຍ ເມືອງໄຊເສດຖາ ນະຄອນຫຼວງວຽງຈັນ. ສໍາເລັດໃນເບື້ອງຕົ້ນການສ້າງປື້ມຄູ່ມື ກ່ຽວກັບລະບຽບ, ເງື່ອນໄຂ ແລະ ມາດຕະຖານສິນຄ້າ ສົ່ງອອກ ເຂົ້າ ແລະ ສັດ ໄປຕະຫຼາດຕ່າງປະເທດ ໂດຍສະເພາະຕະຫຼາດ ສປ ຈີນ. ພ້ອມທັງປະສານກັບກະຊວງກະສິກໍາ ແລະ ປ່າໄມ້ ເພື່ອໃຫ້ຄໍາແນະນໍາ ແລະ ອໍານວຍຄວາມສະດວກໃຫ້ບັນດາບໍລິສັດຂອງລາວ ທີ່ຕ້ອງການສົ່ງອອກສິນຄ້າກະສິກໍາ ໄປ ສປ ຈີນ ໃຫ້ມີການຂຶ້ນທະບຽນເປັນບໍລິສັດສົ່ງອອກໃຫ້ຫຼາຍຂຶ້ນ ໂດຍນໍາໃຊ້ປຶ້ມຄູ່ມືກ່ຽວກັບຂັ້ນຕອນການສົ່ງອອກເຂົ້າ, ສັດ ແລະ ຄູ່ມືສິນຄ້າກະສິກໍາອື່ນໆ ໄປຕະຫຼາດ ສປ ຈີນ.

-    ວຽກການສົ່ງເສີມການຜະລິດເປັນສິນຄ້າ: ສ້າງຄວາມສາມາດແຂ່ງຂັນໃຫ້ແກ່ພາກທຸລະກິດຢູ່ 03 ແຂວງພາກເໜືອ: ໄດ້ສົ່ງເສີມຄວາມສາມາດໃນການແຂ່ງຂັນເພື່ອສົ່ງອອກສິນຄ້າຫັດຖະກຳ ແລະ ສິນຄ້າກະສິກຳ (ເຂົ້າ, ສາລີ ແລະ ຊາ) ຢູ່ສາມແຂວງພາກເໜືອຄື: ແຂວງຜົ້ງສາລີ, ຫຼວງນ້ໍາທາ ແລະ ອຸດົມໄຊ; ສໍາລັບສິນຄ້າຫັດຖະກໍາ: ສາມາດສ້າງລາຍຮັບເພີ່ມໃຫ້ບ້ານເປົ້າໝາຍ 20.000 ໂດລາສະຫະລັດ ແລະ ມີຍອດຂາຍສິນຄ້າຜ່ານທາງ online ປະມານ 3.000 ໂດລາສາຫະລັດ ຢູ່ 6 ບ້ານເປົ້າໝາຍ ຈາກ 03 ແຂວງ ຈໍານວນ 120 ຄົວເຮືອນ. ສໍາລັບການຜະລິດເຂົ້າ ໄດ້ຄັດເລືອກຜູ້ປະກອບການ (ໂຮງສີເຂົ້າ) ເຂົ້າຮ່ວມຈັດຕັ້ງປະຕິບັດໂຄງການຕົວແບບ ໃນການຜະລິດເຂົ້າເປັນສິນຄ້າ ຊຶ່ງສາມາດຄັດເລືອກ ໄດ້ 11 ໂຮງສີເຂົ້າ ນໍາໃຊ້ເນື້ອທີ່ທັງໝົດ 156 ເຮັກຕາ ຈາກ 123 ຄົວເຮືອນ ໃນ 2 ເມືອງຂອງແຂວງຫຼວງນ້ໍາທາ ຄື: ເມືອງສິງ ແລະ ເມືອງຫຼວງນ້ໍາທາ. ໃນນັ້ນ, ໂຄງການທົດລອງໃນລະດູນາແຊງ ເຫັນວ່າສາມາດໄດ້ ຮັບຜົນຜະລິດສູງເຖິງ 6,7 ໂຕນ/ເຮັກຕາ ທຽບກັບແນວພັນ ແລະ ການປູກແບບພື້ນເມືອງທີ່ເຄີຍເຮັດຜ່ານມາ ຜົນຮັບສະເລ່ຍໄດ້ 3-4 ໂຕນ/ເຮັກຕາ; ສ່ວນໂຄງການຕົວແບບລະດູຝົນ ສະເລ່ຍຜົນຜະລິດເມືອງສິງໄດ້ຮັບ 7,2 ໂຕນ/ຮຕ ແລະ ເມືອງຫຼວງນຳ້ທາ ໄດ້ ຮັບ 5,6 ໂຕນ/ຮຕ  ທຽບກັບປະສິດທິພາບການຜະລິດທົ່ວແຂວງ 4,4 ໂຕນ/ ຮຕ;  ສາລີ: ສໍາລັບການຜະລິດ ແລະ ປຸງແຕ່ງສາລີຢູ່ແຂວງອຸດົມໄຊ ແມ່ນໄດ້ເລີ່ມໃນຕົ້ນປີ 2021 ຢູ່ 2 ເມືອງເປົ້າໝາຍ ຄື: ເມືອງຮຸນ ແລະ ເມືອງແບ່ງ,  ຊຶ່ງໄດ້ຄັດເລືອກເອົາ 16 ຜູ້ປະກອບການ ໃຊ້ເນື້ອທີ່ໃນການທົດລອງທັງໝົດ 21,7 ເຮັກຕາ ຈາກ 36 ຄົວເຮືອນ. ຈາກການປະເມີນຜົນຜະລິດສະເລ່ຍຂອງໂຄງການຕົວແບບລະດູຝົນຜ່ານມາ ເຫັນວ່າ ເມືອງ ຮຸນ ແມ່ນ 8,15 ໂຕນ/ເຮັກຕາ ແລະ ເມືອງແບ່ງ ໄດ້ 6,41 ໂຕນ/ເຮັກຕາ. ເຫັນວ່າສູງກ່ວາຜົນຜະລິດສະເລ່ຍຜ່ານມາທີ່ໄດ້ພຽງ 4 – 4,5 ໂຕນ/ເຮັກຕາ. * ຊາ: ຍ້ອນສະພາບການແຜ່ລະບາດຂອງ COVID-19 ເຮັດໃຫ້ບໍ່ສາມາດຈັດກິດຈະກໍາໄດ້ ໂດຍສະເພາະການຊ່ວຍເຫຼືອຜູ້ປະກອບການເຂົ້າຫາຕະຫຼາດ ເປັນຕົ້ນແມ່ນການເຂົ້າຮ່ວມງານວາງສະແດງສິນຄ້າ, ການສະໜັບສະໜູນຜູ້ປະກອບ ການເຂົ້າຝຶກອົບຮົມເຕັກນິກການປຸງແຕ່ງຊາຢູ່ ສປ ຈີນ ແລະ ການແລກປ່ຽນບົດຮຽນຢູ່ແຂວງອື່ນພາຍໃນປະເທດ. ຢ່າງໃດກໍຕາມໂຄງການກໍ່ຍັງໄດ້ຈັດຈ້າງຊ່ຽວຊານພັດທະນາແຜນທຸລະກິດຊາ ເປົ້າໝາຍເພື່ອຊ່ວຍພັດທະນາແຜນທຸລະກິດ ຂອງສະມາຄົມປຸງແຕ່ງຊາ ໃນແຂວງຜົ້ງສາລີ ແລະ ສຳເລັດການສ້າງແຜນທຸລະກິດໃຫ້ກັບສະມາຄົມຊາກໍແມ່ນ. ສໍາເລັດການອອກແບບລະບົບຖານຂໍ້ມູນຕະຫຼາດສິນຄ້າກະສິກໍາ (AMIS) ໃນເບື້ອງຕົ້ນໂດຍຊ່ຽວຊານ ຕ່າງປະເທດ. ສໍາເລັດຮ່າງຍູດທະສາດສົ່ງອອກເຂົ້າ (ຮ່າງທີ 3). ສໍາເລັດຮ່າງບົດແນະນໍາກາໝາຍຄຸນນະພາບສິນຄ້າກະສິກໍາ (ຮ່າງທີ 3). ສໍາເລັດຂໍ້ຕົກລົງວ່າດ້ວຍມາດຕະຖານໂຮງງານສີເຂົ້້າ (ສະບັບເລກທີ 1319/ອຄ.ກອຫ, ລົງວັນທີ 24 ທັນວາ 2021). ສໍາເລັດການສ້າງປື້ມຄູ່ມືກ່ຽວກັບການສ້າງກົນໄກການດຸ່ນດ່ຽງເຂົ້າກິນ ຢູ່ ສປປ ລາວ ແລະ ສໍາເລັດການປັບປຸງຄຳສັ່ງວ່າດ້ວຍການລົບລ້າງໃບອະນຸຍາດນຳເຂົ້າລົດແທັກເຕີ້ ຮັບໃຊ້ການຜະລິດກະສິກໍາ ສະບັບເລກທີ 0982/ກອຄ, ລົງວັນທີ 19 ຕຸລາ 2021. ສໍາເລັດການຝຶກອົບຮົມດ້ານການຂຽນແຜນທຸລະກິດ ແລະ ການຕະຫຼາດໃຫ້ແກ່ຜູ້ປະກອບກິດຈະການທຸລະກິດກະສິກຳຈໍານວນ 32 ຫົວໜ່ວຍ. ສໍາເລັດການສ້າງປື້ມຄູ່ມື ພາກປະຕິບັດການຜະລິດທີ່ດີ (GMP/GHP Practical Manual) ແລະ ສ້າງປື້ມຄູ່ມື ພາກປະຕິບັດລະບົບວິເຄາະ ແລະ ຄວບຄຸມຈຸດວິກິດ (HACCP) ໃຫ້ແກ່ຜູ້ປະກອບກິດຈະການໂຮງສີເຂົ້າ ເພື່ອປັບປຸງໂຮງສີໃຫ້ໄດ້ຕາມມາດຕະຖານສາກົນ.

-       ວຽກພັດທະນາເຂດນິຄົມອຸດສາຫະກໍາ: ປັດຈຸບັນ, ທົ່ວປະເທດມີເຂດອຸດສາຫະກໍາທັງໝົດ 74 ເຂດ,​ ເນື້ອທີ່ທັງໝົດ 34.151,42 ເຮັກຕາ; ສະເພາະນິຄົມອຸດສາຫະກໍາ ທີ່ໄດ້ຮັບການພັດທະນາ ແລະ ສາມາດຮອງຮັບໃຫ້ແກ່ການດໍາເນີນກິດຈະການ ແມ່ນນິຄົມອຸດສາຫະກໍາ ແລະ ການຄ້າ ວຽງຈັນ-ໂນນທອງ ຊຶ່ງໄດ້ມີການພັດທະນາໄລ​ຍະ​ທີ 1 ໃນ​ເນື້ອ​ທີ່ 110 ເຮັກ​ຕາ ສຳເລັດຕາມແຜນການຫລາຍກວ່າ 85%, ​ສາ​ມາດ​ດຶງ​ດູດ​ການລົງ​ທຶນໄດ້ 68 ບໍ​ລິ​ສັດ (ນັກລົງທຶນຈາກຕ່າງປະເທດຄື: ໄທ, ຈີນ, ໄຕ້ຫວັນ, ຍີ່ປຸ່ນ, ຮົງກົງ…), ໃນນັ້ນສາມາດເຄື່ອນໄຫວດໍາເນີນກິດຈະການແລ້ວ 33 ບໍລິສັດ, ສ້າງວຽກເຮັດງານທໍາໄດ້ທັງໝົດ 4.426 ຄົນ. ພ້ອມກັນນີ້ ໄດ້ ສໍາເລັດການເຊັນບົດບັນທຶກຄວາມເຂົ້າໃຈກ່ຽວກັບການສຳຫລວດ, ເກັບກຳຂໍ້ມູນ, ກຳນົດຂອບເຂດພື້ນທີ່ ເພື່ອສຶກສາຄວາມເປັນໄປໄດ້ເບື້ອງຕົົ້ນໃນການພັດທະນານິຄົມອຸດສາຫະກຳ ແລະ ສູນໂລຊິດຕິກ ຢູ່ເມືອງໄຊ ແລະ ເມືອງນາໝໍ້ ແຂວງອຸດົມໄຊ.

ແຜນງານທີ 3: ສ້າງສະພາບແວດລ້ອມທີ່ເອື້ອອໍານວຍ ແລະ ສ້າງຄວາມເຂັ້ມແຂງ ໃຫ້ແກ່ພາກທຸລະກິດ:

-       ວຽກສ້າງສະພາບແວດລ້ອມທີ່ເອື້ອອຳນວຍໃຫ້ແກ່ພາກທຸລະກິດ:

* ວຽກຄໍາສັ່ງເລກທີ 02/ນຍ: ສໍາເລັດໃນການປະສານສົມທົບກັບຂະແໜງການທີ່ກ່ຽວຂ້ອງ ເພື່ອປຶກສາຫາລືກ່ຽວກັບການປັບປຸງແກ້ໄຂ, ຫຼຸດຂອດຂັ້ນ ແລະ ໄລຍະເວລາ ໃນການເລີ່ມຕົ້ນດໍາເນີນທຸລະກິດຢູ່ ສປປ ລາວ ໃຫ້ສະດວກ, ກະທັດຮັດ ແລະ ວ່ອງໄວຂຶ້ນ ຊຶ່ງ​ສາມາດຫຼຸດ​ຈາກ 09 ຂັ້ນ​ຕອນ​ມາ​ເປັນ 03 ຂັ້ນ​ຕອນ, ຈາກ 173 ວັນ ​ມາ​ເຫຼືອ​ພຽງ 17 ວັນ. ການຈັດອັນດັບຕົວຊີ້ວັດທີ່ຕິດພັນກັບວຽກອໍານວຍຄວາມສະດວກທາງດ້ານການຄ້າ ຫຼື ຕົວຊີ້ວັດທີ 8 “ການຄ້າລະຫວ່າງປະເທດ” ຊຶ່ງຕາມບົດລາຍງານການສໍາຫຼວດການຈັດອັນດັບຄວາມງ່າຍດາຍໃນການດໍາເນີນທຸລະກິດ ຂອງທະນາຄານໂລກ (EDB) ສຳລັບປີ 2020 ເຫັນວ່າ: ການຈັດຕັ້ງປະຕິບັດວຽກອໍານວຍຄວາມສະດວກທາງດ້ານການຄ້າ ຂອງ ສປປ ລາວ ຖືກອັນດັບໃຫ້ເປັນທີ 78 ຂອງໂລກ ແລະ  ອັນດັບທີ 4 ຂອງອາຊຽນ ຮອງຈາກ ສິງກະໂປ, ມາເລເຊຍ, ແລະ ໄທ. ໃນປີ 2021 ກຸ່ມທະນາຄານໂລກ ໄດ້ປະກາດວ່າ ຈະບໍ່ສືບຕໍ່ການເຮັດບົດລາຍງານ EDB ແລະ ຈະປ່ຽນວິທີການປະເມີນສະພາບແວດລ້ອມດ້ານການລົງທຶນແບບໃໝ່. ສໍາເລັດອອກຄໍາແນະນໍາການຈັດຕັ້ງປະຕິບັດວຽກງານບໍລິຫານຄວາມສ່ຽງຂອງບັນດາຂະແໜງການທີ່ມີໜ່ວຍງານປະຈໍາດ່ານ (ເປັນຕົ້ນ: ພາສີ, ກັກກັນພືດ, ກັກກັນສັດ ແລະ ອາຫານ-ຢາ) ພ້ອມທັງອອກຂໍ້ຕົກລົງຮັບຮອງຄໍາແນະນໍາດັ່ງກ່າວ ເລກທີ 002/ຄອຄສ, ລົງວັນທີ 21 ມັງກອນ 2021 ກ່ຽວກັບການຈັດຕັ້ງປະຕິບັດວຽກງານບໍລິຫານຄວາມສ່ຽງ ໜ່ວຍງານທີ່ກ່ຽວຂ້ອງທີ່ປະຈໍາຢູ່ດ່ານສາກົນ ລະຫວ່າງ 04 ພາກສ່ວນ ໄດ້ຮ່ວມກັນລົງນາມໃນບົດບັນທຶກ ຊ່ວງທ້າຍປີ 2021 ຜ່ານມານີ້ ແລະ ຈະສາມາດເລີ່ມຈັດຕັ້ງປະຕິບັດວຽກງານບໍລິຫານຄວາມສ່ຽງຮ່ວມກັນໃນຕົ້ນປິ 2022.

* ວຽກຄໍາສັ່ງເລກທີ 03/ນຍ: ສະເພາະຂະແໜງອຸດສາຫະກໍາ ແລະ ການຄ້າ ໃນນາມທີ່ໄດ້ຮັບມອບໝາຍໃຫ້ເປັນເຈົ້າການປະສານສົມທົບກັບຂະແໜງການກ່ຽວຂ້ອງກ່ຽວກັບການປັບປຸງການອອກໃບອະນຸຍາດດໍາເນີນທຸລະກິດ ພາຍຫຼັງທີ່ໄດ້ຮັບໃບອະນຸຍາດລົງທຶນ ແລະ ໃບທະບຽນວິສາຫະກິດໃຫ້ມີຄວາມສະດວກວ່ອງໄວ, ຊຶ່ງມາຮອດປັດຈຸບັນແມ່ນຢູ່ໃນຂັ້ນຕອນຄົ້ນຄວ້າປັບປຸງບັນດານິຕິກໍາຕ່າງໆທີ່ກ່ຽວຂ້ອງ ເພື່ອເຮັດໃຫ້ຖືກຕ້ອງ, ສອດຄ່ອງ, ສະດວກ, ວ່ອງໄວ ແລະ ງ່າຍຂຶ້ນໃນການອອກໃບອະນຸຍາດດໍາເນີນທຸລະກິດ; ພ້ອມດຽວກັນນັ້ນ, ສາມາດສ້າງເວັບໄຊ ແລະ ຈັດພິມປຶ້ມຄູ່ມືແນະນໍາກ່ຽວກັບການອອກໃບອະນຸຍາດດໍາເນີນທຸລະກິດ ຢູ່ ສປປ ລາວ. ນອກຈາກນັ້ນ, ໄດ້ປະກອບຄໍາເຫັນຕໍ່ກັບກິດຈະການທີ່ຕ້ອງຂໍໃບອະນຸຍາດດໍາເນີນທຸລະກິດຕາມການສະເໜີຂອງຂະແໜງການທີ່ກ່ຽວຂ້ອງ; ໄດ້ປະສານກັບບັນດາຂະແໜງການກ່ຽວຂ້ອງ  ເພື່ອສັງລວມບັນຊີ ກ່ຽວກັບກິດຈະການທີ່ບໍ່ຈໍາເປັນຕ້ອງຂໍອະນຸຍາດ ແລະ ກິດຈະການທີ່ຕ້ອງໄດ້ຂໍອະນຸຍາດດຳເນີນທຸລະກິດ. ປະຈຸບັນ ແຕ່ລະຂະແໜງການຢູ່ໃນຂັ້ນຕອນຄົ້ນຄວ້າ ແລະ ສັງລວມບັນຊີຂອງຂະແໜງການຕົນ ແລ້ວນໍາສົ່ງໃຫ້ຂະແໜງ ອຄ ເພື່ອສັງລວມເປັນບັນຊີລະອຽດຂອງທຸກຂະແໜງການ.

-       ວຽກການອໍານວຍຄວາມສະດວກທາງດ້ານການຄ້າ: ໄດ້ສົມທົບກັບຂະແໜງການກ່ຽວຂ້ອງ ຢູ່ຂັ້ນສູນກາງ ແລະ ທ້ອງຖິ່ນ ເພື່ອອໍານວຍຄວາມສະດວກໃຫ້ແກ່ການນໍາເຂົ້າ-ສົ່ງອອກສິນຄ້າ ຢູ່ດ່ານ. ໃນນີ້, ສາມາດຊຸກຍູ້ການອອກແຈ້ງການຂອງກະຊວງໂຍທາທິການ ແລະ ຂົນສົ່ງ ສະບັບເລກທີ 242/ຍທຂ, ລົງວັນທີ 23 ເມສາ 2021 ເພື່ອກໍານົດມາດຕະການລວມໃນການຄຸ້ມຄອງ ແລະ ອຳນວຍຄວາມສະດວກໃນການຂົນສົ່ງສິນຄ້າລະຫວ່າງປະເທດ ແລະ ພາຍໃນປະເທດ. ພິເສດ ສາມາດຊຸກຍູ້ການອອກແຈ້ງການຂອງ ຫສນຍ ສະບັບເລກທີ 406/ຫສນຍ, ລົງວັນທີ 26/04/2021 ເພື່ອໃຫ້ບັນດາແຂວງ ຕ້ອງຂໍຄໍາເຫັນຈາກ ກະຊວງ ຍທຂ ກ່ອນ ຈຶ່ງອອກລະບຽບການເພີ່ມເຕີມຂອງຕົນກ່ຽວກັບການຂົນສົ່ງສິນຄ້າ ເພື່ອຄວາມເປັນເອກະພາບໃນການຈັດຕັ້ງປະຕິບັດມາດຕະການຂົນສົ່ງໃນຂອບເຂດທົ່ວປະເທດ ແລະ ໄດ້ອອກແຈ້ງການ ເລກທີ 0304/ອຄ.ສພກ, ລົງວັນທີ 22/4/2021 ເພື່ອຍົກເລີກມາດຕະການໂຈະຊົ່ວຄາວການນຳເຂົ້າອາຫານທະເລ (ສົົດ, ແຊ່ແຂງ) ທີ່ມາຈາກປະເທດທີ່ມີການແຜ່ລະບາດຂອງໂຄວິດ-19 ແຕ່ຕ້ອງນໍາເຂົ້າຜ່ານດ່ານສາກົນເທົ່ານັ້ນ ແລະ ຕ້ອງມີເອກະສານຢັ້ງຢືນສຸຂານາໄມຈາກປະເທດຕົ້ນທາງ ໂດຍສອດຄ່ອງກັບລະບຽບການຂອງຂະແໜງກະສິກຳ ແລະ ປ່າໄມ້.

-       ສົ່ງເສີມ-ພັດທະນາຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ (ຈວນກ): ປີ 2021 ສາມາດປ່ອຍສິນເຊື່ອໃຫ້ MSME ທັງໝົດ 397 ຫົວໜ່ວຍ ມູນຄ່າ 140,36 ຕື້ກີບ ທຽບກັບປີ 2020 ທີ່ສາມາດປ່ອຍກູ້ໃຫ້ MSME ທັງໝົດ 145 ຫົວໜ່ວຍມູນຄ່າ 169,81 ຕື້ກີບ, ເມື່ອສົມທຽບຕົວເລກລະຫວ່າງຫົວໜ່ວຍຂອງການປ່ອຍສິນເຊື່ອແມ່ນເຫັນວ່າອັດຕາສ່ວນການປ່ອຍສິນເຊື່ອເພິ່ມສູງຂຶ້ນເຖິງ 271,72% ເມື່ອທຽບໃສ່ປີ 2020, ແຕ່ເມື່ອສົມທຽບມູນຄ່າຂອງການປ່ອຍສິນເຊື່ອເຫັນວ່າອັດຕາສ່ວນຂອງມູນຄ່າການປ່ອຍສິນເຊື່ອຂອງປີ 2021 ຫຼຸດລົງ 17,34% ເມື່ອທຽບໃສ່ປີ 2020. ໃນໄລຍະການແຜ່ລະບາດຂອງພະຍາດໂຄວິດ 19 ຮອບສອງ, ທສວ ໄດ້ແຈ້ງໃຫ້ບັນດາທະນາຄານທຸລະກິດ ແລະ ສະຖາບັນການເງິນຈຸນລະພາກ ທີ່ເຂົ້າຮ່ວມໂຄງການຂອງ ທສວ ພາຍໃຕ້ບ້ວງເງິນຕ່າງໆ ພິຈາລະນາປະຕິບັດນະໂຍບາຍຕໍ່ຫົວໜ່ວຍ ຈວນກ ທີ່ໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ 19 ປະຕິບັດ ຄື: 1) ພາຍໃຕ້ບ້ວງທຶນດັດແກ້ມະຫາພາກ ທະນາຄານພັດທະນາລາວ ໄດ້ເລື່ອນງວດຊຳລະໃຫ້ລູກຄ້າ 02 ສັນຍາ ແລະ ເລື່ອນການຊໍາລະຕົ້ນທຶນອອກໄປຕື່ມ 01 ສັນຍາ; 2) ພາຍໃຕ້ບ້ວງທຶນໂຄງການເຂົ້າຫາແຫຼ່ງທຶນຂອງ ວນກ, ທະນາຄານລາວຈີນ, ທະນາຄານຮ່ວມທຸລະກິດລາວ-ຫວຽດ ແລະ ທະນາຄານ ເອັສທີ ໄດ້ປະຕິບັດນະໂຍບາຍກັບ ວນກ ທັງໝົດລວມ 28 ສັນຍາ; 3) ພາຍໃຕ້ບ້ວງທຶນອັດຕາດອກເບ້ຍ 3%/ປີ, ທະນາຄານໄຊງ່ອນເທືອງຕິນ ລາວ ແລະ ທະນາຄານມາຣູຮານເຈແປນລາວ ໄດ້ປະຕິບັດນະໂຍບາຍລວມທັງໝົດ 06 ສັນຍາ; 4) ພາຍໃຕ້ບ້ວງທຶນສະສົມຂອງ ທສວ, ສະຖາບັນການເງິນຈຸນລະພາກບໍ່ຮັບເງິນຝາກໄຊອຸດົມ ໄດ້ປະຕິບັດນະໂຍບາຍເລື່ອນຊໍາລະຕົ້ນທຶນໃຫ້ກັບ ວນກ ຈຳນວນ 01 ສັນຍາ.

-       ວຽກຄຸ້ມຄອງ ແລະ ດັດສົມໂຮງງານ: ໂດຍປະຕິບັດຕາມຄໍາສັ່ງ 15/ນຍ, ປັດຈຸບັນ ໂຮງງານອຸດສາຫະກໍາປຸງແຕ່ງໄມ້ຍັງເຫຼືອ 969 ໂຮງງານ, ມີໂຮງເລື່ອຍໄມ້ 6 ໂຮງງານ, ໂຮງງານປຸງແຕ່ງໄມ້ສໍາເລັດຮູບ 364 ໂຮງງານ, ໂຮງງານເຟີນີເຈີ 599 ໂຮງງານ ແລະ ຂະໜາດນ້ອຍແບບຄອບຄົວ 121 ຫົວໜ່ວຍ. ພ້ອມທັງໄດ້ຮັບການມອບໝາຍຈາກ ຄະນະສະເພາະກິດ 40/ນຍ ໃຫ້ຂະແໜງການກ່ຽວຂ້ອງສືບຕໍ່ຄຸ້ມຄອງ, ສົ່ງເສີມຕາມພາລະບົດບາດ. ສໍາເລັດການຈັດຕັ້ງປະຕິບັດແຜນດໍາເນີນງານປີ 2017-2020 ຂອງໂຄງການສ້າງຕັ້ງໂຮງງານຕົວແບບ ແລະ ເຄືອຂ່າຍການຜະລິດ-ປຸງແຕ່ງໄມ້ ຊຶ່ງມີຜົນສໍາເລັດໃນຫຼາຍດ້ານ ເປັນຕົ້ນ: ການປັບປຸງມາດຕະຖານຂອງໂຮງງານ​ເຂົ້າ​ສູ່​ມາດຕະຖານ ​ແລະ ລະບົບສາກົນ, ຍົກລະດັບເຕັກໂນໂລຊີໃໝ່ທີ່ທັນສະໄໝ, ຂັ້ນຕອນການຜະລິດ, ການສະໜອງວັດຖຸດິບໄມ້ຈາກແຫຼ່ງສວນປູກ, ຕະຫຼາດຈໍາໜ່າຍຢູ່ພາຍໃນ ແລະ ຕ່າງປະ ເທດ, ສ້າງສີມືແຮງງານ ແລະ ການຜະລິດສິນຄ້າ. ພ້ອມກັນນັ້ນ  ກໍ່ສ້າງສຳເລັດແຜນການດໍາເນີນງານປີ 2021-2023 ເພື່ອສືບຕໍ່ຊຸກຍູ້ສົ່ງເສີມໂຮງງານຕົວແບບທີ່ເປັນໜໍ່ແໜງທີ່ດີ ໃຫ້ສາມາດດໍາເນີນການຜະລິດໄດ້ຢ່າງເຕັມກໍາລັງ, ເປັນຕະຫລາດຮອງຮັບໄມ້ປູກຂອງປະຊາຊົນ ທັງເປັນການສົ່ງເສີມ ແລະ ພັດທະນາສີມືແຮງງານ, ການສ້າງມູນຄ່າເພີ່ມໃຫ້ແກ່ຜະລິດຕະພັນໄມ້ລາວ ຕາມນະໂຍບາຍການເຕີບໂຕສີຂຽວ ແລະ ຍືນຍົງຂອງລັດຖະບານ. ໄດ້ປັບປຸງດັດສົມໂຮງງານປຸງແຕ່ງສິ່ງເສດເຫຼືອຢາງພລາສຕິກ ຕາມແຈ້ງການປັບປຸງດັດສົມໂຮງງານປຸງແຕ່ງສິ່ງເສດເຫຼືອຢາງປລາສະຕິກ ເລກທີ 263/ກອຫ.ຄຮ, ຊຶ່ງສາມາດປັບປຸງດັດສົມໂຮງງານດັ່ງກ່າວໃນນະຄອນຫຼວງວຽງຈັນ ທີ່ມີ 14 ໂຮງງານ, ໃນນັ້ນໃຫ້ສືບຕໍ່ດໍາເນີນການຜະລິດ ແລະ ປັບປຸງ 5 ໂຮງງານ, ຢຸດເຊົາຊົ່ວຄາວ 4 ໂຮງງານ ແລະ ຢຸດເຊົາຖາວອນ 5 ໂຮງງານ.

-    ວຽກມາດຕະຖານ ແລະ ວັດແທກ: ສາມາດສ້າງ ແລະ ຮັບຮອງ ມາດຕະຖານແຫ່ງຊາດ  ຈໍານວນ 56 ມາດຕະຖານ ແລະ ໄດ້ປະກາດໃຊ້ມາດຕະຖານແຫ່ງຊາດແບບບັງຄັບ ຈຳນວນ 119 ມາດຕະຖານ; ອອກໃບຢັ້ງຢືນ ນໍາໃຊ້ກາໝາຍມາດຕະຖານ ແຫ່ງຊາດ ໄດ້: 08 ບໍລິສັດ. ອອກໃບຢັ້ງຢືນຄຸນນະພາບ ແລະ ອຸປະກອນພິເສດ ໄດ້ທັງໝົດ 163 ໃບ ແລະ ອອກເລກໝາຍກົດລະຫັດສາກົນ (ບາໂຄດ) ໃຫ້ 23 ບໍລິສັດ. ສາມາດກວດສອບຜະລິດຕະພັນລາຍການອື່ນໆ ຄື:  ກົງເຕີໄຟຟ້ານຳເຂົ້າໃໝ່ 1 ເຟດ 159.536 ໜ່ວຍ; 3 ເຟດ 8.600 ໜ່ວຍ; ເຄື່ອງວັດແທກໄຟຟ້າ 01 ເຄື່ອງ; ສິນຄ້າຫຸ້ມຫໍ່ 91 ລາຍການ; ລົດບັນທຸກນ້ໍາມັນເຊື້ອໄຟລົດໃໝ່ 66 ຄັນ, ລົດຕໍ່ອາຍຸ 175 ຄັນ; ດັດແກ້ 07 ຄັນ; ໂພໂລມິດເຕີ້ 125 ຫົວຈ່າຍ; ຖັງຜອງ 07 ໜ່ວຍ;  ຊິງຊັ່ງລົດບັນທຸກ 32 ໜ່ວຍ, ຊິງຊັ່ງນ້ອຍ 106 ໜ່ວຍ; ແມ່ແບບນ້ໍາໜັກ 19 ໜ່ວຍ;  ເຄື່ອງວັດແທກອຸນນະພູມ 06 ໜ່ວຍ; ເຕົາອົບ 11 ເຄື່ອງ; ເຊັນເຊີດິຈິຕອນ 26 ເຄື່ອງ; ແມັັດກໍ້ 01 ອັນ; ຄາລິບເປີ້ 01 ອັນ; ໄມໂຄມິດເຕີ້ 01 ອັນ. ສາມາດກວດກາຄຸນນະພາບການນໍາເຂົ້ານໍ້າມັນເຊື້ອໄຟ ທັງໝົດ 1 ຕື້ກວ່າ ລິດ ໃນນັ້ນ, ນໍ້າມັນແອັດຊັງ 91 ຈໍານວນ 236 ລ້ານກວ່າ ລິດ; ນໍ້າມັນແອັດຊັງ 95 ຈໍານວນ 6 ລ້ານກວ່າ ລິດ; ນໍ້າມັນກາຊວນ 796 ລ້ານກວ່າ ລິດ. ວຽກງານແກ້ໄຂການຮ້ອງຮຽນຜ່ານສາຍດ່ວນ 1513 ໃນຂອບເຂດທົ່ວປະເທດ ຈໍານວນ 19 ກໍລະນີ. ນອກຈາກນັ້ນແລ້ວ ຍັງໄດ້ປະສານສົມທົບກັບຂະແໜງການກ່ຽວຂ້ອງ ເພື່ອສ້າງດຳລັດວ່າດ້ວຍ ມາດຕະການຕໍ່ຜູ້ລະເມີດກົດໝາຍ ແລະ ລະບຽບການ ກ່ຽວກັບມາດຕະຖານ ແລະ ດຳລັດວ່າດ້ວຍ ມາດຕະການຕໍ່ຜູ້ລະເມີດກົດໝາຍ ແລະ ລະບຽບການ ກ່ຽວກັບການວັດແທກ.

-       ວຽກຊັບສິນທາງປັນຍາ: ສາມາດຈັດຕັ້ງປະຕິບັດອອກໜັງສືຢັ້ງຢືນຕ່າງໆຄື:  ອອກໃບຢັ້ງຢືນແບບອຸດສາຫະກໍາ ຈໍານວນ 30 ສະບັບ ແລະ ໃບຢັ້ງຢືນຕໍ່ອາຍຸແບບອຸດສາຫະກໍາ ຈໍານວນ 25 ສະບັບ; ຈົດທະບຽນເຄື່ອງໝາຍການຄ້າ ຈໍານວນ 1.463 ເຄື່ອງໝາຍ, ຕໍ່ອາຍຸເຄື່ອງໝາຍການຄ້າ ຈໍານວນ 2.810 ເຄື່ອງໝາຍ, ແຈ້ງປະຕິເສດເຄື່ອງໝາຍການຄ້າເບື້ອງຕົ້ນ ຈໍານວນ 95 ເຄື່ອງໝາຍ; ອອກເອກະສານປ່ຽນແປງ ຈໍານວນ 1.938 ເຄື່ອງໝາຍ; ອອກເອກະສານຕໍ່ອາຍຸເຄື່ອງໝາຍການຄ້າ ຈໍານວນ 2.810 ເຄື່ອງໝາຍ; ສໍາເລັດການຈົດທະບຽນສາກົນ ກ່ຽວກັບເຄື່ອງໝາຍ ໂດຍຜ່ານລະບົບມາດຣິດ ຈໍານວນ 1.073 ຄໍາຮ້ອງ; ໄດ້ຮັບຄໍາຮ້ອງແຈ້ງຂໍ້ມູນລິຂະສິດ ຈໍານວນ 21 ຄໍາຮ້ອງ; ສໍາເລັດການແກ້ໄຂທາງດ້ານບໍລິຫານກ່ຽວກັບການລະເມີດຊັບສິນທາງປັນຍາ ຈໍານວນ 18 ກໍລະນີ ໃນນີ້, ສໍາເລັດການແກ້ໄຂຂໍ້ຂັດແຍ່ງກ່ຽວກັບການລົບລ້າງເຄື່ອງໝາຍການຄ້າ ຈໍານວນ 06 ກໍລະນີ; ອອກຢັ້ງຢືນກ່ຽວກັບການຮຽນແບບທີ່ເປັນການລະເມີດເຄື່ອງໝາຍການຄ້າ ແລະ ແບບອຸດສາຫະກໍາ ຈໍານວນ 04 ກໍລະນີ.

ແຜນງານທີ 4:  ສົ່ງເສີມ ແລະ ພັດທະນາການຄ້າໃຫ້ກ້າວທັນກັບສະພາບການໃໝ່:

-   ວຽກສ້າງຖານຂໍ້ມູນ ແລະ ພັດທະນາລະບົບການຄ້າ ທັນສະໄໝ: ສ້າງເງື່ອນໄຂອຳນວຍຄວາມສະດວກໃຫ້ຜູ້ປະກອບການ SME ສາມາດເຂົ້າຕະຫລາດອາຊີໄດ້ ແລະ ຫັນໄປເປັນເວັບໄຊ໌ E-Commerce ໃຫ້ມີການຊື້-ຂາຍ ແບບ online ໄດ້.ປັດຈຸບັນ, ເວັບໄຊ໌ plaosme (www.plaosme.com) ມີສະມາຊິກລວມ 828 ຫົວໜ່ວຍທຸລະກິດ (ບໍລິສັດ) ແລະ ມີຜະລິດຕະພັນທີ່ລົງໂຄສະນາໃນເວັບໄຊ໌ ຈໍານວນ 1.714 ລາຍການສິນຄ້າ. ສໍາເລັດການສ້າງ website ຖານຂໍ້ມູນໃບອະນຸຍາດດໍາເນີນທຸລະກິດ www.bned.moic.gov.la. ເວັບໄຊ໌ດັ່ງກ່າວແມ່ນຈຸດສັງລວມຂໍ້ມູນໃບອະນຸຍາດດຳເນີນທຸລະກິດ ລວມທັງໃບຢັ້ງຢືນຕ່າງໆ ທີ່ຕິດພັນກັບ ການດຳເນີນທຸລະກິດ, ຊຶ່ງປັດຈຸບັນສາມາດສັງລວມໄດ້ ທັງໝົດ 350 ກວ່າ ໃບອະນຸຍາດ ແລະ ໃບຢັ້ງຢືນ ຫຼື ເອກະສານຕ່າງໆ ທີ່ຕິດພັນກັບການດຳເນີນທຸລະກິດ, ໃນນັ້ນລວມມີ ໃບອະນຸຍາດດຳເນີນທຸລະກິດ 149 ໃບ, ອອກໃບຢັ້ງຢືນແຫຼ່ງກໍາເນີດສິນຄ້າທາງເອເລັກໂຕຣນິກ ຫຼື e-CO ເປັນລະບົບທີ່ອຳນວຍຄວາມຄວາມສະດວກໃຫ້ແກ່ຜູ້ປະກອບການໃນການຂໍໃບຢັ້ງຢືນແຫຼ່ງກຳເນີດສິນຄ້າ (Certificate of Origin: CO). ນອກຈາກນີ້, ຍັງມີການຢັ້ງຢືນແຫຼ່ງກໍາເນີດສິນຄ້າດ້ວຍຕົນເອງຂອງອາຊຽນ, ສະຫະພາບເອີຣົບ, ນໍເວ, ສະວິດເຊີແລນ ແລະ ຕວັກກີອີກດ້ວຍ ເພື່ອອໍານວຍຄວາມສະດວກ ເປັນຕົ້ນແມ່ນຫຼຸດຜ່ອນຂັ້ນຕອນ, ປະຢັດເວລາ ແລະ ຄ່າໃຊ້ຈ່າຍ.

-       ວຽກຄຸ້ມຄອງລາຄາສິນຄ້າ ແລະ ຄ່າບໍລິການ: ໄດ້ສຸມໃສ່ຈັດຕັ້ງປະຕິບັດຕາມເນື້ອໃຈຈິດໃຈ ຂອງດໍາລັດ 474/ນຍ, ດໍາລັດ 331/ນຍ (ຄຸ້ມຄອງທຸລະກິດນໍ້າມັນເຊື້ອໄຟ) ກໍ່ຄື ຕາມຂໍ້ຕົກລົງ ເລກທີ 71/ນຍ, ລົງວັນທີ 06 ຕຸລາ 2017 (ຄະນະ 71/ນຍ) ທັງຂັ້ນສູນກາງ ແລະ ຂັ້ນແຂວງ, ນະຄອນຫຼວງວຽງຈັນ ໂດຍສະເພາະ ໃນໄລຍະການແຜ່ລະບາດຂອງພະຍາດໂຄວິດ-19 ເພື່ອເປັນເຄື່ອງມືຄຸ້ມຄອງ, ຕິດຕາມ ແລະ ກວດກາວຽກງານຄຸ້ມຄອງລາຄາສິນຄ້າ ແລະ ຄ່າບໍລິການ ໃຫ້ຢູ່ໃນຄວາມສະຫງົບ ຫຼື ເໜັງຕີງຕາມຕົ້ນທຶນຕົວຈິງ ດ້ວຍການປະສານສົມທົບກັບບັນດາພະແນກ ອຄ ແຂວງ/ນະຄອນຫຼວງ ກ່ຽວກັບການຄຸ້ມຄອງ, ຕິດຕາມ ແລະ ກວດກາສະພາບການເໜັງຕີງຂອງລາຄາສິນຄ້າ ຕາມພາລະບົດບາດ, ສິດ ແລະ ໜ້າທີ່ ໂດຍສະ ເພາະແມ່ນສິນຄ້າທີ່ມີຄວາມອ່ອນໄຫວ ແລະ ກະທົບໄວຕໍ່ຊີວິດການເປັນຢູ່ຂອງປະຊາຊົນ. ພ້ອມດຽວກັນນັ້ນ, ກໍ່ໄດ້ເອົາໃຈໃສ່ປະສານສົມທົບກັບຂະແໜງການກ່ຽວຂ້ອງນັບທັງສູນກາງ ແລະ ທ້ອງຖິ່ນ ຕິດຕາມ, ກວດກາ ບັນດາຫ້າງ, ຮ້ານ ແລະ ບໍລິສັດຕ່າງໆ ບໍ່ໃຫ້ສວຍໂອກາດກັກຕຸນສິນຄ້າ ແລະ ຂຶ້ນລາຄາສິນຄ້າຕາມລຳພັງໃຈໂດຍບໍ່ໄດ້ຮັບອະນຸຍາດ ໃນຊ່ວງເທດສະການ, ງານບຸນປະເພນີ, ວັນສຳຄັນຕ່າງໆຂອງຊາດ ຫຼື ໃນຊ່ວງໄພພິບັດ ແລະ ວິກິດການຕ່າງໆທີ່ເກີດຂຶ້ນ ຊຶ່ງເປັນການສ້າງຄວາມຫຍຸ້ງຍາກ ແລະ ສົ່ງຜົນກະທົບໂດຍກົງຕໍ່ພໍ່ແມ່ປະຊາຊົນ.

ແຜນງານທີ 5: ເພີ່ມປະສິດທິພາບການຄຸ້ມຄອງມະຫາພາກ, ການແບ່ງ ຂັ້ນຄຸ້ມຄອງກັບທ້ອງຖິ່ນ, ການນໍາພາການຈັດຕັ້ງທຸລະກິດ ແລະ ຫົວໜ່ວຍທຸລະກິດ ທີ່ຂຶ້ນກັບກະຊວງ:

-       ວຽກແຜນການ, ສະຖິຕິ ແລະ ຂໍ້ມູນຂ່າວສານ: ສໍາເລັດການສ້າງແຜນພັດທະນາອຸດສາຫະກໍາປຸງ ແລະ ການຄ້າ 5 ປີ 2021-2025 (ຮັບຮອງໂດຍລມຕແລ້ວ); ສຳເລັດການສ້າງແຜນພັດທະນາອຸດສາຫະກຳປຸງແຕ່ງ ແລະ ຫັດຖະກຳ ໄລຍະ 2021-2025; ສຳເລັດການສ້າງຈຸດປະສານງານລະບົບຂາເຂົ້າປະຕູດຽວ ຜ່ານລະບົບການສື່ສານຂອງລັດຖະບານ (G-Chat) ສຳລັບຫ້ອງການກະຊວງ ອຄ ກັບ ຫສນຍ ເພື່ອຈັດຕັ້ງຜັນຂະຫຍາຍລະບຽບການ, ກົນໄກການ ແກ້ໄຂວຽກງານ ຂອງລັດຖະບານຊຸດທີ IX ຜ່ານລະບົບທັນສະໄໝ. ຈັດຝຶກອົບຮົມການນໍາໃຊ້ລະບົບ E-Filing ໃຫ້ພະນັກງານພາຍໃນກະຊວງໄດ້ຮັບຮູ້ ແລະ ເຂົ້າໃຈ ກ່ຽວກັບການນໍາໃຊ້ລະບົບດັ່ງກ່າວໃນການຕິດຕາມເອກະສານເຮັດໃຫ້ມີຄວາມສະດວກ ແລະ ວ່ອງໄວຂຶ້ນ; ອໍານວຍຄວາມສະດວກໃນການນຳໃຊ້ລະບົບ ແລະ ຫ້ອງປະຊຸມທາງໄກ (Video Conference) ໃຫ້ພາກສ່ວນພາຍໃນກະຊວງ ອຄ ແລະ ພາກສ່ວນພາຍນອກ.

-          ວຽກຫ້ອງການກະຊວງ: ສໍາເລັດການສ້າງແຜນການສ້າງ ແລະ ປັບປຸງກົດໝາຍຂອງກະຊວງ ອຄ  ໂດຍໄດ້ຖືກຮັບຮອງເຂົ້າໃນແຜນສ້າງ ແລະ ປັບປຸງກົດໝາຍ 5 ປີ  (2021-2025) ຂອງສະພາແຫ່ງຊາດ ລວມທັງໝົດ 04 ກົດໝາຍຄື:  ສ້າງໃໝ່ 01 ກົດໝາຍ (ກົດໝາຍວ່າດ້ວຍການຄຸ້ມຄອງສິນຄ້າ ແລະ ຄ່າບໍລິການ); ກົດໝາຍປັບປຸງ 03 ກົດໝາຍ (ກົດໝາຍວ່າດ້ວຍວິສາຫະກິດ, ກົດໝາຍວ່າດ້ວຍການສົ່ງເສີມວິສາຫະກິດຂະໜາດນ້ອຍ ແລະ ກາງ ຄາດໝາຍປີ 2022 ແລະ ກົດໝາຍວ່າດ້ວຍຊັບສິນທາງປັນຍາ ຄາດໝາຍປີ 2023). ສາມາດຄົ້ນຄວ້າ, ສ້າງ ແລະ ປັບປຸງນິຕິກຳລຸ່ມກົດໝາຍ ຈຳນວນ 20 ສະບັບ; ວຽກຄະນະປະສານງານບໍລິການການລົງທຶນປະຕູດຽວ (ຄລທ.ສ) ຂອງກະຊວງ ອຄ; ສຳເລັດຄົ້ນຄວ້າປະກອບຄຳເຫັນຕໍ່ການສະເໜີຂໍລົງທຶນຢູ່ໃນຂັ້ນສູນກາງທີ່ຕິດພັນກັບຂະແໜງອຸດສາຫະກໍາ ແລະ ການຄ້າ ຈຳນວນ 22 ໂຄງການ;  ສຳເລັດການປັບປຸຸງບັນຊີກິດຈະການຄວບຄຸມ ແລະ ກິດຈະການສຳປະທານຂອງຂະແໜງອຸດສາຫະກຳ ແລະ ການຄ້າ;  ສຳເລັດການສ້າງບັນຊີກິດຈະການທີ່ໄດ້ຮັບ ນະໂຍບາຍສົ່ງເສີມການລົງທຶນຂອງຂະແໜງອຸດສາຫະກຳ ແລະ ການຄ້າ.

-       ວຽກຈັດຕັ້ງ ແລະ ພະນັກງານ: ສໍາເລັດກອງປະຊຸມໃຫຍ່ຄັ້ງທີ V ຂອງອົງຄະນະພັກກະຊວງອຸດສາຫະກໍາ ແລະ ການຄ້າ; ສໍາເລັດຈັດພິທີມອບ-ຮັບໃບຢັ້ງຢືນ ໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2020 ໃຫ້ 23 ໜ່ວຍພັກອ້ອມຂ້າງກະຊວງ; ສໍາເລັດບົດສະຫຼຸບຕີລາຄາວຽກງານກໍ່ສ້າງພັກ-ພະນັກງານ ແລະ ວຽກປັບປຸງກົງຈັກການຈັດຕັ້ງ ໄລຍະ 05 ປີ (2016-2020) ແລະ ທິດທາງແຜນການ 05 ປີ (2021-2025); ສໍາເລັດການຄັດເລືອກຜົນງານດີເດັ່ນໃນການຈັດຕັ້ງປະຕິບັດໜ້າທີ່ວຽກງານ 05 ປີ 2016-2020 ເພື່ອສະເໜີກະຊວງພາຍໃນຍ້ອງຍໍ; ສໍາເລັດແຜນຍຸດທະສາດພັດທະນາຊັບພະຍາກອນມະນຸດ ປີ 2021-2025 ແລະ ວິໄສທັດ 2030.

-       ວຽກຄົ້ນຄວ້າອຸດສາຫະກໍາ ແລະ ການຄ້າ:  ສໍາເລັດການປັບປຸງບົດຄົ້ນຄວ້າລະດັບຊາດຈໍານວນ 03 ຄື:  “ ຕີລາຄາສະພາບຄວາມເປັນຈິງໃນການສ້າງ ແລະ ພັດທະນາເສດຖະກິດຕະຫຼາດຕາມທິດສັງຄົມນິຍົມຢູ່ລາວ”, “ ການເຊື່ອມໂຍງເສດຖະກິດກັບພາກພື້ນ ແລະ ສາກົນ ຂອງ ສປປ ລາວ”, ການພັດທະນາຕະຫຼາດປະເພດຕ່າງໆຢູ່ ສປປ ລາວ ໃນໄລຍະຜ່ານມາ”.  ສໍາ​ເລັດ​ການ​ຂຽນ​ບົດ​ຄົ້ນ​ຄວ້າ​ນະ​ໂຍ​ບາຍ​ການ​ຄ້າ​ຫຍໍ້​ ຄື: “ ເງິນກີບອ່ອນຄ່າກະທົບ ຕໍ່ຜູ້ບໍລິໂພກ ແລະ ທຸລະກິດພາຍໃນປະເທດ ໃນຊ່ວງການລະບາດຂອງໂຄວິດ-19”,  “ ການເຂົ້າຫາແຫຼ່ງທຶນຂອງວິສາຫະກິດຂະໜາດນ້ອຍ ແລະ ກາງ ໃນໄລຍະຟື້ນໂຕຈາກຜົນກະທົບຂອງໂຄວິດ-19”,  “ ມາດຕາການຮັບມືກັບຜົນກະທົບຂອງໂຄວິດ 19 ຕໍ່ເສດຖະກິດ: ບົດຮຽນຂອງປະເທດຕ່າງໆໃນອາຊຽນ”, “ອຸດສາຫະກຳແຜ່ນແພ ແລະ ເຄື່ອງນຸ່ງຫົ່ມຂອງ ສປປ ລາວ ໃນຍຸກຄວາມປົກກະຕິຮູບແບບໃໝ່ (New Normal) ພາຍໃຕ້ການແຜ່ລະບາດຂອງພະຍາດໂຄວິດ 19: ການປັບຕົວ ແລະ ທິດທາງ”,  “ຜົນກະທົບໂຄວິດຕໍ່ການຜະລິດແລະຈຳໜ່າຍສິນຄ້າ ODOP ”, “ການພັດທະນາການຄ້າເອເລັກໂຕຣນິກ (E-commerce) ຢູ່ສປປລາວ”. ສໍາເລັດການຄົ້ນຄວ້າ ຫົວຂໍ້: ການຕີລາຄາວຽກງານບໍລິການຜ່ານ ປະຕູດຽວ ຂອງອາຊຽນ ແລະ ການຄຸ້ມຄອງຂໍ້ມູນດີຈິຕອນ ຢູ່ ສປປ ລາວ.

ພ້ອມດຽວກັນນີ້, ໃນມື້ທີສອງວັນທີ 25 ມີນາ ຍັງໄດ້ຮັບຟັງການໃຫ້ຄໍາເຫັນໂອ້ລົມ ຂອງທ່ານ ສອນໄຊ ສີພັນດອນ ກົມການເມືອງສູນກາງພັກ, ຮອງນາຍົກລັດຖະມົນຕີອີກດ້ວຍ.

ແຫລ່ງຂ່າວ: ກົມແຜນການ ແລະ ການຮ່ວມມື

ຮຽບຮຽງໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ