ໃນວັນທີ 11 ມີນາ 2022 ທີ່ ໂຮງແຮງ ອາມາລີ, ທີ່ເມືອງວັງວຽງ ແຂວງ ວຽງຈັນ ຜ່ານມານີ້, ກົມການຄ້າພາຍໃນ ກະຊວງ ອຸດສາຫະກຳ ແລະ ການຄ້າ ໄດ້ຈັດກອງປະຊຸມທົບທວນຄືນການຈັດຕັ້ງປະຕິບັດ
ວຽກງານແຂ່ງຂັນທາງທຸລະກິດ ແລະ ປົກປ້ອງຜູ້ຊົມໃຊ້ ໂດຍການສະໜັບສະໜູນຈາກ ອົງການ GIZ-COMPETE ລັດຖະບານເຢຍລະມັນ, ກອງປະຊຸມດັ່ງກ່າວມີ ທ່ານ ໄຊທິເດດ ອິນທະສອນ ຮອງຫົວ ໜ້າກົມການຄ້າພາຍໃນ ຜູ້ຊີ້ນໍາພະແນກຄຸ້ມຄອງການແຂ່ງຂັນທາງທຸລະກິດ (ຂຂທ), ທ່ານ ສູນທອນ ຈັນທິລາດ ຮອງຫົວໜ້າກົມການຄ້າພາຍໃນ ຜູ້ຊີ້ນໍາພະແນກປົກປ້ອງຜູ້ຊົມໃຊ້ (ປປຊ) ແລະ ທ່ານ Frank Tibuton ຫົວໜ້າໂຄງການ GIZ-COMPETE ເຂົ້າຮ່ວມເປັນປະທານ ແລະ ມີຄະນະພະແນກ ແລະ ພະນັກງານວິຊາການຈາກທັງສອງພະແນກ ແລະ ພະແນກທີ່ກ່ຽວຂ້ອງ ເຂົ້າຮ່ວມທັງໝົດ ຈຳນວນ 17 ທ່ານ.
ໃນວາລະກອງປະຊຸມ, ຄະນະປະທານໄດ້ກ່າວເປີດພິທີພ້ອມທັງອອກຄຳເຫັນຕໍ່ກອງປະຊຸມ ເພື່ອເຮັດໃຫ້ກອງປະຊຸມໃນຄັ້ງນີ້ດຳເນີນໄປດ້ວຍບັນຍາກາດ ແລະ ຄວາມໝາຍອັນເລິກເຊິງ ໃນທ່າມກາງສະພາບການຫັນປ່ຽນຂອງເສດຖະກິດ, ການເມືອງຂອງໂລກ ແລະ ການລະບາດຂອງພະຍາດ COVID 19. ກອງປະຊຸມໃນຄັ້ງນີ້ ແມ່ນກອງປະຊຸມວິຊາການ ເພື່ອທົບທວນຄືນການຈັດຕັ້ງປະຕິບັດວຽກງານແຂ່ງຂັນທາງທຸລະກິດ ແລະ ການປົກປ້ອງຜູ້ຊົມໃຊ້, ຈາກນັ້ນກອງປະຊຸມໄດ້ພາກັນລົງເລິກຄົ້ນຄວ້າ ແລະ ປະກອບຄຳຄິດຄຳເຫັນໃສ່ບັນດາເອກະສານ ເປັນຕົ້ນ: ແຜ່ນການເຄື່ອນໄຫວຂອງທັງສອງວຽກງານ ປະຈຳປີ 2022 ພາຍໃຕ້ການສະຫນັບສະໜູນຂອງທັງສອງ ໂຄງການ ຄື: ໂຄງການ COMPETE ແລ ໂຄງການ PROTECT, ລາຍງານການຈັດຕັ້ງປະຕິບັດວຽກງານແຂ່ງຂັນ ແລະ ວຽກງານປົກປ້ອງຜູ້ຊົມໃຊ້ ໃນປີຜ່ານມາ ເພື່ອປະເມີນຄືນຈຸດຄົງຄ້າງ ແລະ ປະກອບຄຳເຫັນທິດທາງແກ້ໄຂໃນຕໍ່ຫນ້າ.
ຕອນທ້າຍຂອງກອງປະຊຸມ ຄະນະປະທານ ຍັງໄດ້ຮຽກຮ້ອງໃຫ້ຜູ້ເຂົ້າຮ່ວມກອງປະຊຸມໃນຄັ້ງນີ້ ຈົ່ງໄດ້ເອົາໃຈໃສ່ຕິດຕາມ, ຄົ້ນຄ້ວາ, ປະກອບຄຳເຫັນຢ່າງສ້າງສັນ ແລະ ພ້ອມກັນກຳໃຫ້ໄດ້ບັນຫາຕ່າງໆ ເພື່ອເຮັດໃຫ້ການຈັດຕັ້ງປະຕິບັດບັນດາກິດຈະກຳຂອງທັງສອງວຽກງານໃຫ້ໄດ້ຮັບປະສິດທິຜົນ, ເປົ້າໝາຍ ແລະ ກຳນົດເວລາທີ່ວາງໄວ້.
ແຫຼ່ງຂ່າວ: ໄດ້ມາຈາກກົມການຄ້າພາຍໃນ ກະຊວງ ອຄ.
ຮຽບຮຽງ: ໄພຄໍາອີ
