ຕອນເຊົ້າຂອງວັນທີ 17 ພຶດສະພາ 2022, ທີ່ຫ້ອງປະຊຸມທາງໄກຊັ້ນ 3 ກະຊວງ ອຄ ໄດ້ຈັດກອງປະຊຸມຄົ້ນຄວ້າປຶກສາຫາລື ກ່ຽວກັບການປັບປຸງກົງຈັກການຈັດຕັ້ງ ຂອງຂະແໜງອຸດສາຫະກໍາ ແລະ ການຄ້າ ໂດຍການເປັນປະທານຂອງທ່ານ ປອ. ຄໍາແພງ ໄຊສົມແພງ ລັດຖະມົນຕີກະຊວງ ອຄ ພ້ອມນີ້ມີທ່ານຮອງລັດຖະມົນຕີຜູ້ຊີ້ນໍາກົມຈັດຕັ້ງ ແລະ ພະນັກງານ, ທ່ານຫົວໜ້າຫ້ອງການ, ຫົວໜ້າ-ຮອງຫົວໜ້າກົມຂອງບັນດາກົມ, ຫົວໜ້າສະຖາບັນອຸດສາຫະກໍາ ແລະ ການຄ້າ ແລະ ຄະນະຮັບຜິດຊອບປັບປຸງກົງຈັກການຈັດຕັ້ງຂັ້ນກະຊວງ ອຄ ເຂົ້າຮ່ວມປະມານ 30 ທ່ານ. 
ຈຸດປະສົງຂອງກອງປະຊຸມຄັ້ງນີ້ ໂດຍລວມການປັບປຸງກົງຈັກການຈັດຕັ້ງລັດ ຂອງຂະແໜງອຸດສາຫະກຳ ແລະ ການຄ້າແມ່ນໄດ້ປະຕິບັດຕາມຄຳສັ່ງ ຂອງນາຍົກລັດຖະມົນຕີ ສະບັບເລກທີ 03/ນຍ, ລົງວັນທີ 09 ກຸມພາ 2018 ວ່າດ້ວຍການປັບປຸງຄຸນນະພາບການເຄື່ອນໄຫວ ຂອງກົງຈັກການຈັດຕັ້ງ ແລະ ການບັນຈຸລັດຖະກອນໃໝ່; ອີງຕາມ ຄໍາແນະນໍາ ຂອງນາຍົກລັດຖະມົນຕີ ສະບັບເລກທີ 01/ນຍ, ລົງວັນທີ 06 ທັນວາ 2021 ວ່າດ້ວຍການຈັດຕັ້ງຜັນຂະຫຍາຍຄໍາສັ່ງ ຂອງຄະນະເລຂາທິການສູນກາງພັກ ສະບັບເລກທີ 190/ຄລສພ, ລົງວັນທີ 29 ກັນຍາ 2021 ແລະ ແຈ້ງການຂອງກະຊວງພາຍໃນ ສະບັບເລກທີ 175/ພນ, ລົງວັນທີ 24 ກັນຍາ 2021 ກ່ຽວກັບການຄົ້ນຄວ້າປັບປຸງກົງຈັກ ແລະ ຂໍ້ຕົກລົງວ່າດ້ວຍການຈັດຕັ້ງ ແລະ ການເຄື່ອນໄຫວຂອງບັນດາກົມ ແລະ ສະຖາບັນອຸດສາຫະກໍາ ແລະ ການຄ້າ ຕາມດໍາລັດ 604/ນຍ, ລົງວັນທີ 15 ຕຸລາ 2021 ແລະ ການປັບປຸງກົງຈັກຂັ້ນແຂວງ ແລະ ເມືອງຕາມທິດຊີ້ນໍາໃນໄລຍະໃໝ່; 
ຊຶ່ງໃນນີ້ ທ່ານ ນ ກິ່ງສະດອນ ເພັດດາວເຮືອງ ຫົວໜ້າກົມຈັດຕັ້ງ ແລະ ພະນັກງານ ໄດ້ຂຶ້ນລາຍງານຫຍໍ້ສະພາບການປັບປຸງກົງຈັກການຈັດຕັ້ງ, ການປັບປຸງພາລະບົດບາດ ແລະ ການຂຶ້ນແຜນກຳນົດຕຳແໜ່ງງານ ຂອງຂະແໜງອຸດສາຫະກຳ ແລະ ການຄ້າໃນໄລຍະຜ່ານມາ; 
ທ່ານ ວັນໄຊ ແກ້ວຄໍາພັນ ຮອງຫົວໜ້າກົມໄດ້ສະເໜີບາງເນື້ອໃນຈິດໃຈ ໃນການປຶກສາຫາລືກ່ຽວກັບການປັບປຸງກົງຈັກການຈັດຕັ້ງ ແລະ ປັບປຸງຂໍ້ຕົກລົງວ່າດ້ວຍ ການຈັດຕັ້ງ ແລະ ການເຄື່ອນໄຫວຂອງຫ້ອງການ, ບັນດາກົມ ແລະ ສະຖາບັນອຸດສາຫະກໍາ ແລະ ການຄ້າ ຕາມດໍາລັດ 604/ນຍ, ລົງວັນທີ 15 ຕຸລາ 2021 ແລະ ການປັບປຸງກົງຈັກຂັ້ນແຂວງ ແລະ ເມືອງຕາມທິດຊີ້ນໍາໃນໄລຍະໃໝ່; 
ທ່ານ ນ ວິໄລວັນ ເທບທິລາດ ຫົວໜ້າພະແນກກົງຈັກ ແລະ ຄຸ້ມຄອງພະນັກງານ-ລັດຖະກອນ ໄດ້ເຜີຍແຜ່ແນະນໍາ ແຜນກໍານົດຕໍາແໜ່ງງານ ຂອງຫ້ອງການ, ບັນດາກົມ ແລະ ສະຖາບັນອຸດສາຫະກໍາ ແລະ ການຄ້າ ທີ່ໄດ້ຮັບການຮັບຮອງຈາກກະຊວງພາຍໃນ ສະເໜີບາດກ້າວ ແລະ ຂັ້ນຕອນໃນການຈັດຕັ້ງປະຕິບັດໃນຕໍ່ໜ້າ; 
ພ້ອມດຽວກັນນີ້, ຜູ້ເຂົ້າຮ່ວມປະຊຸມໄດ້ຄົ້ນຄວ້າປະກອບຄໍາເຫັນ ຢ່າງກົງໄປກົງມາ ເພື່ອແນໃສ່ປັບປຸງກົນໄກການຄຸ້ມຄອງໃຫ້ມີຄຸນນະພາບ, ຮັບປະກັນຕາມທິດກະຊວງ-ອົງການ ເຮັດບົດບາດຄຸ້ມຄອງມະຫາພາກເປັນຕົ້ນຕໍ, ແບ່ງຂັ້ນຄຸ້ມຄອງໃຫ້ສອດຄ່ອງຕາມນະໂຍບາຍ 3 ສ້າງໂດຍແບ່ງຂອບເຂດສິດ, ໜ້າທີ່ ແລະ ຄວາມຮັບຜິດຊອບ ລະຫວ່າງ ສູນກາງ ແລະ ທ້ອງຖິ່ນໃຫ້ຈະແຈ້ງ ແລະ ຂາດຕົວຕາມທິດມອບຄວາມເປັນເຈົ້າການ ໃຫ້ແກ່ທ້ອງຖິ່ນຫຼາຍຂຶ້ນ.
ຕອນທ້າຍທ່ານປະທານ ໄດ້ໃຫ້ຄໍາເຫັນຊີ້ນໍາ ກອງປະຊຸມວຽກງານປັບປຸງກົງຈັກການຈັດຕັ້ງລັດ ຂອງຂະແໜງອຸດສາຫະກຳ ແລະ ການຄ້າ ໃນຄັ້ງນີ້ສຸດທີ່ມີຄວາມໝາຍສຳຄັນເປັນຢ່າງຍິ່ງ ເພາະມັນຕິດພັນກັບຫຼາຍບັນຫາທີ່ເຮົາຈະຕ້ອງໄດ້ປັບປຸງແກ້ໄຂ ແລະ ຈັດຕັ້ງປະຕິບັດຕາມຄວາມຮຽກຮ້ອງຕ້ອງການ ຂອງວຽກງານໃນໄລຍະໃໝ່ ການປັບປຸງກົງຈັກການຈັດຕັ້ງໃຫ້ໄປຕາມທິດກະທັດຮັດ, ໜັກແໜ້ນ ແລະ ເຄື່ອນໄຫວມີປະສິດທິພາບ, ຕ້ອງຄົ້ນຄວ້າກຳນົດຢ່າງຈະແຈ້ງບັນດາໜ້າທີ່ຄວາມຮັບຜິດຊອບລະຫວ່າງສູນກາງ ແລະ ທ້ອງຖິ່ນ ໂດຍກະຊວງຫັນມາເຮັດໜ້າທີ່ຄຸ້ມຄອງມະຫາພາກ ຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດ ໝາຍຄວາມວ່າກະຊວງຕ້ອງຄົ້ນຄວ້າໃນການມອບສິດຕົກລົງບັນຫາໃຫ້ທ້ອງຖິ່ນຫຼາຍຂຶ້ນໃຫ້ໄປຕາມທິດທາງວຽກງານ 3 ສ້າງ ອັນສຳຄັນໃຫ້ປະຕິບັດຕາມທາງລວມທີ່ຂັ້ນເທິງວາງອອກ ໃນການຈັດຕັ້ງປະຕິບັດ ບາງບັນຫາສຳຄັນດັ່ງນີ້:
- ການປັບປຸງກົງຈັກການຈັດຕັ້ງລັດຂອງຂະແໜງອຸດສາຫະກຳ ແລະ ການຄ້າພວກເຮົາ ແມ່ນໃຫ້ອີງໃສ່ທິດທາງລວມທີ່ຂັ້ນເທິງໄດ້ວາງອອກ ເປັນຕົ້ນແມ່ນ: ຄຳສັ່ງຂອງຄະນະເລຂາທິການສູນກາງພັກ; ຄໍາສັ່ງຂອງນາຍົກລັດຖະມົນຕີ; ຄໍາແນະນຳຂອງກະຊວງພາຍໃນ ແລະ ນິຕິກຳທີ່ກ່ຽວຂ້ອງ ມາເປັນບ່ອນອີງໃນການຄົ້ນຄວ້າ ແລະ ຜັນຂະຫຍາຍໃຫ້ຖືກຕ້ອງສອດຄ່ອງຕາມຄວາມຮຽກຮ້ອງຕ້ອງການຂອງວຽກງານຕົວຈິງຢູ່ແຕ່ລະບ່ອນ, ໃຫ້ກວດກາ-ຕີລາຄາຄືນ ບັນດາກົງຈັກການຈັດຕັ້ງທີ່ເຮັດໜ້າທີ່ຊໍ້າຊ້ອນ-ກ້າວກ່າຍກັນ ຈະປັບປຸງຄືແນວໃດ, ຈະແບ່ງໜ້າທີ່ ແລະ ຂອບເຂດສິດໃນການຕົກລົງບັນຫາຄືແນວໃດ ລະຫວ່າງ ສູນກາງ ແລະ ທ້ອງຖິ່ນ ເພື່ອຮັບປະກັນວຽກງານໃຫ້ມີປະສິດທິພາບ ແລະ ປະສິດທິຜົນສູງ;
- ໃຫ້ກົມຈັດຕັ້ງ ແລະ ພະນັກງານ ສືບຕໍ່ປະສານສົມທົບກັບບັນດາ ແຂວງ, ນະຄອນຫຼວງ ເພື່ອຄົ້ນຄວ້າເບິ່ງຄືນ ໂຄງປະກອບດ້ານຈໍານວນກົງຈັກການຈັດຕັ້ງ ລວມທັງຊື່ຂອງບັນດາຂະແໜງ ສໍາລັບຂັ້ນແຂວງ ແລະ ໜ່ວຍງານ ສໍາລັບຂັ້ນເມືອງ ຈະກຳນົດຊື່ຂະແໜງ ແລະ ໜ່ວຍງານແນວໃດ ເພື່ອໃຫ້ເປັນເອກະພາບ ໂດຍສັງລວມເອົາບັນດາຄຳເຫັນທີ່ໄດ້ຕົກລົງໃນກອງປະຊຸມຄັ້ງນີ້ເປັນບ່ອນອີງໃນການພິຈາລະນາ, ຈາກນັ້ນ ຈຶ່ງລາຍງານຂໍທິດຊີ້ນຳຈາກຄະນະນຳກະຊວງຕື່ມ;
- ສຳລັບການກຳນົດຕຳແໜ່ງງານ: ພາກສ່ວນໃດທີ່ໄດ້ເຮັດສໍາເລັດ ແລະໄດ້ຮັບການຮັບຮອງ ຈາກກະຊວງພາຍໃນແລ້ວ ກໍ່ໃຫ້ສືບຕໍ່ຈັດຕັ້ງປະຕິບັດຕາມຕຳແໜ່ງງານທີ່ໄດ້ຖືກຮັບຮອງ, ພາກສ່ວນໃດທີ່ຍັງບໍ່ທັນເຮັດສຳເລັດ ກໍ່ຕ້ອງໄດ້ສືບຕໍ່ຂຸ້ນຂ້ຽວຄົ້ນຄວ້າໃຫ້ສໍາເລັດ ໃນເວລາອັນຄວນ, ສິ່ງສຳຄັນ ແມ່ນໃຫ້ໄຈ້ແຍກໃຫ້ເຫັນຈຳນວນຕຳແໜ່ງງານທີ່ມີໃນປັດຈຸບັນ ແລະ ຄວາມຮັບຜິດຊອບຂອງບຸກຄະລາກອນໃນແຕ່ລະຕຳແໜ່ງງານ ໃຫ້ມີຈຳນວນໜ້າວຽກທີ່ເໝາະສົມ ຕາມທິດຊີ້ນຳໃນໄລຍະໃໝ່: ‘‘ຜູ້ໜຶ່ງຮັບຜິດຊອບຫຼາຍໜ້າວຽກ’’ ໃຫ້ຮັບປະກັນແກ້ໄຂສະພາບພະນັກງານເຫຼືອບໍ່ພໍໃນກົງຈັກທຸກຂັ້ນ, ຖ້າກົມກອງໃດເຫຼືອ ໃຫ້ປັບປຸງສັບຊ້ອນໄປໃສ່ບ່ອນທີ່ຍັງບໍ່ພຽງພໍ ບົນພື້ນຖານມາດຖານເງື່ອນໄຂ ຂອງຕໍາແໜ່ງງານທີ່ໄດ້ກຳນົດໄວ້;
- ການສະເໜີແຕ່ງຕັ້ງພະນັກງານ-ລັດຖະກອນໃນຕຳແໜ່ງບໍລິຫານຂັ້ນຕ່າງໆ ແມ່ນໃຫ້ປະຕິບັດຕາມແຜນກໍານົດພະນັກງານນຳພາຄຸ້ມຄອງ ທີ່ຄະນະນໍາແຕ່ລະຂັ້ນ ໄດ້ເຊັນຮັບຮອງໄວ້ແລ້ວນັ້ນ, ຜູ້ທີ່ໄດ້ຮັບການແຕ່ງຕັ້ງໃຫ້ດຳລົງຕຳແໜ່ງ ຕ້ອງຮັບປະກັນມາດຖານເງື່ອນໄຂຄົບຖ້ວນ ໂປ່ງໃສ ແລະ ຍຸຕິທຳ;
- ສຳລັບບັນຫາອື່ນໆທີ່ກອງປະຊຸມໄດ້ຍົກຂຶ້ນມາປຶກສາຫາລື ແລະ ແລກປ່ຽນໃນຄັ້ງນີ້ ມອບໃຫ້ຄະນະຮັບຜິດຊອບ ຈົດບັນທຶກບັນດາຄຳເຫັນຕ່າງໆ, ມີອັນໃດທີ່ຍັງບໍ່ລະອຽດຈະແຈ້ງ ຕິດພັນກັບກົມກອງໃດ ກໍ່ໃຫ້ສືບຕໍ່ປະສານສົມທົບກັບກົມຈັດຕັ້ງ ແລະ ພະນັກງານ ເພື່ອພ້ອມກັນຄົ້ນຄວ້າແກ້ໄຂ ໃຫ້ສຳເລັດຕາມຄາດໝາຍທີ່ວາງໄວ້.
ແຫລ່ງຂ່າວ: ກົມຈັດຕັ້ງ ແລະ ພະນັກງານ ກະຊວງ ອຄ
ຮຽບຮຽງໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
