ໃນວັນທີ 1 ກໍລະກົດ ທີ່ຜ່ານມານີ້, ພະແນກອຸດສາຫະກໍາ ແລະ ການຄ້າ ແຂວງ ອຸດົມໄຊ ໄດ້ຈັດພິທີ ມອບ-ຮັບໃນອະນຸຍາດ ນໍາໃຊ້ກາໝາຍສິນຄ້າ ໜຶ່ງເມືອງ ໜຶ່ງຜະລິດຕະພັນແຫ່ງຊາດ One District One Product ( ODOP) ໃຫ້ກຸ່ມຜະລິດຕະພັນຫັດຖະກໍາຕໍ່າຫູກ ບ້ານຜາຄໍາ, ທີ່ຫ້ອງ ວ່າການປົກຄອງ ເມືອງຮຸນ ໃຫ້ກຽດເປັນປະທານຮ່ວມໂດຍ ທ່ານ ບຸນທັນ ສຸພັດທອນ ຮອງເຈົ້າເມືອງ-ເມືອງຮຸນ ແລະ ທ່ານ ສອນທະນຸ ສິງດາລາ ຫົວໜ້າພະແນກອຸດສາຫະກໍາ ແລະ ການຄ້າ ແຂວງ ມີບັນດາແຂກທີ່ຖືກເຊີນຈາກຂະແໜງການທີ່ກ່ຽວຂ້ອງຂັ້ນແຂວງ, ຂັ້ນເມືອງ ແລະ ກຸ່ມຜະລິດຕະພັນຫັດຖະກໍາຕໍ່າຫູກ ບ້ານຜາຄໍາເຂົ້າຮ່ວມ.
ພິທີໃນຄັ້ງນີ້ທ່ານ ຄໍາຜາຍ ຮັກປະສິດ ຫົວໜ້າຫອ້ງການ ອຸດສາຫະກໍາ ເມືອງຮຸນ ກໍ່ໄດ້ຂຶ້ນກ່າວຕ້ອນຮັບແຂກແຕ່ລະພາກສ່ວນ ພ້ອມທັງສະເໜີຈຸດປະສົງຂອງພິທີດັ່ງກ່າວ ຈາກນັ້ນຜູ້ເຂົ້າຮ່ວມຍັງໄດ້ຮັບຟັງການຜ່ານບົດຄວາມໝາຍຄວາມສໍາຄັນ ຂອງວຽກງານພັດທະນາສິນຄ້າໂອດ໋ອບຕໍ່ແຂວງອຸດົມໄຊ, ບົດລາຍງານການຫ້າງຫາກະກຽມ, ຜ່ານໃບອະນຸຍາດນໍາໃຊ້ກາໝາຍ ໜຶ່ງເມືອງ ໜຶ່ງຜະລິດຕະພັນ ເລກທີ 0277/ກສຄ.ລົງວັນທີ 18 ພຶດສະພາ 2022 ແລະ ມອບໃບອະນຸຍາດນໍາໃຊ້ກາໝາຍ ໜຶ່ງເມືອງໜຶ່ງຜະລິດຕະພັນໃຫ້ກຸ່ມຜະລິດຕະພັນຫັດຖະກໍາຕໍ່າຫູກ ບ້ານຜາຄໍາ ເມືອງ ຮຸນ. ໃນຕອນທ້າຍຂອງກອງປະຊຸມ ບັນດາແຂກທີ່ເຂົ້າຮ່ວມກໍ່ໄດ້ມີຄໍາເຫັນໃນລວງແລວດຽວກັນ ເພື່ຶອໃຫ້ກຸ່ມຜະລິດຕະພັນຫັດຖະກໍາຕໍ່າຫູກ ບ້ານຜາຄໍາ ຈົ່ງຮັກສາມຸນເຊື້ອໃນການປະດິດຄິດແຕ່ງ ສີໄມ້ລາຍມື ລວດລາຍຕ່າງໆທີ່ເປັນເອກກະລັກຂອງທ້ອງຖິ່ນຕົນ ແລະ ຜະລິດໃຫ້ຫຼາຍຂຶ້ນ ເພື່ອເປັນສິນຄ້າໂດຍເນັ້ນໜັກທາງດ້ານຄຸນນະພາບໃຫ້ຫຼາຍຂຶ້ນ.
ພາບ-ຂ່າວ: ໂພໄຊ ໄຊຍະວົງ ພະແນກ ອຄ ແຂວງອຸດົມໄຊ
ຮຽບຮຽງໂດຍ: ນ ຖື ແຫວນວົງສົດ ສູນສະຖິິຕິ ແລະ ຂໍ້ມູນຂ່າວສານ ກຜຮ
