ໃນວັນທີ 14 ຕຸລາ 2022 ເວລາ 14:00 ໂມງ ໄດ້ມີພິທີ ເປີດຊຸດຝຶກອົບຮົມທິດສະດີການເມືອງ ແລະ ການປົກຄອງ ໄລຍະສັ້ນ 45 ວັນ ຊຸດທີ X ທີ່ຫ້ອງປະຊຸມໃຫຍ່ ກະຊວງອຸດສາຫະກຳ ແລະ ການຄ້າ ໂດຍ ພາຍໃຕ້ການເປັນປະທານ ສະຫາຍ ນາງ ຈັນສຸກ ແສງພະຈັນ ຮອງເລຂາຄະນະບໍລິຫານງານພັກ, ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ເປັນກຽດເຂົ້າຮ່ວມໃນພິທີ ຄັ້ງນີ້ມີແຂກ ແລະ ນັກສຳມະນາກອນ ເຂົ້າຮ່ວມທັງໝົດປະມານ 83 ສະຫາຍ.

ສະຫາຍ ຮອງເລຂາຄະນະບໍລິຫານງານພັກ ໄດ້ກ່າວສະແດງຄວາມຊົມເຊີຍມາຍັງຄະນະຮັບຜິດຊອບຊຸດຝຶກອົບຮົມທິດສະດີການເມືອງ ແລະ ການປົກຄອງ ໄລຍະສັ້ນ ທີ່ໄດ້ເປັນເຈົ້າການກະກຽມ ແລະ ຈັດຕັ້ງດຳເນີນຊຸດຝຶກອົບຮົມ, ບັນດາກົມກອງອ້ອມຂ້າງກະຊວງ   ທີ່ໄດ້ຄັດເລືອກພະນັກງານ  ຂອງຕົນເພື່ອເຂົ້າຮ່ວມ, ບັນດາສະຫາຍນັກສຳມະນາກອນທີ່ໄດ້ຕັດສິນໃຈເຂົ້າຮ່ວມຝຶກອົບຮົມ ຄັ້ງນີ້. ສະຫາຍ ໄດ້ເນັ້ນວ່າ ພັກເຮົາໄດ້ໃຫ້ຄວາມສຳຄັນຕໍ່ວຽກງານຝຶກອົບຮົມທິດສະດີການເມືອງ ແລະ  ການປົກຄອງ  ໃຫ້ແກ່ພະນັກງານ-ລັດຖະກອນ ຕະຫຼອດມາ ເພື່ອເປັນການຍົກສູງຄຸນນະພາບຂອງຖັນແຖວສະມາຊິກພັກ-ພະນັກງານ  ທາງດ້ານທິດສະດີ, ຫຼັກໜັ້ນການເມືອງ, ອຸດົມການປະຕິວັດ, ຄຸນສົມບັດສິນທໍາປະຕິວັດ, ຄວາມບໍລິສູດພຸດຜ່ອງ, ສະຕິຕໍ່ກົດໝາຍ, ສະຕິຕໍ່ການຈັດຕັ້ງ, ລະບຽບວິໄນ ແລະ ສະຕິຮັກສາຄວາມລັບເປັນກົກ. ການຝຶກອົບຮົມໃນຄັ້ງນີ້ຈະໄດ້ດຳເນີນໄປເປັນເວລາ  45 ວັນເຕັມ ຊຶ່ງສະຫາຍ ກໍ່ໄດ້ເນັ້ນໃຫ້ ແຕ່ລະສະຫາຍຕ້ອງຕັ້ງໜ້າຄົ້ນຄວ້າຮໍ່າຮຽນ, ກຳແໜ້ນບັນດາເນື້ອໃນຂອງຫຼັກສູດທັງໜົດນັບທັງພາກທິດສະດີ,  ແນວທາງນະໂຍບາຍຂອງພັກເພື່ອຈຳແນກໃຫ້ໄດ້ອັນຖືກ, ອັນຜິດ  ແລະ ຊອກໃຫ້ເຫັນ  ຈຸດທີ່ຈະໄດ້ປັບປຸງແກ້ໄຂໃນຕໍ່ໜ້າ;

ພາບ ແລະ ຂ່າວ: ທິລາວັນ