ຕອນບ່າຍ ເວລາ 1: 30 ໂມງ ຂອງວັນທີ 30 ພະຈິກ 2022 ທີ່ຫ້ອງຮັບແຂກໃຫຍ່ຊັ້ນ 4 ກະຊວງ ອຸດສາຫະກໍາ ແລະ ການຄ້າ, ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ LIU JINXIN (ຫລິວ ຈິນຊິນ) ປະທານສະຖາບັນຄົ້ນຄວ້າວຽກງານ ໂລຈິດສະຕິກ (Logistics) ຄຸນໝິງ ແຫ່ງ ສປ ຈີນ ພ້ອມດ້ວຍຄະນະ, ຈຸດປະສົງການເຂົ້າຢ້ຽມຂໍ່ານັບຄັ້ງນີ້ ເພື່ອປຶກສາຫາລືກ່ຽວກັບວຽກງານການຮ່ວມມື ແລະ ການພັດທະນາວຽກງານການຄ້າ, ການດືງດູດການລົງທຶນ ແລະ ການພັດທະນາອຸດສາຫະກຳຕາແລວທາງລົດໄຟ ລາວ-ຈີນ ລະຫວ່າງ ສປ ຈີນ ແລະ ສປປ ລາວ ໃນໄລຍະຜ່ານມາ ແລະ ການຮ່ວມມືໃນອະນາຄົດ, ມີຜູ້ຕາງໜ້າຈາກທັງສອງຝ່າຍເຂົ້າຮ່ວມ ຈໍານວນ 18 ທ່ານ.
ໃນໂອກາດພົບປະຄັ້ງນີ້ ທ່ານລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ກ່າວວ່າ: ໃນໄລຍະການແຜ່ລະບາດຂອງພະຍາດ ໂຄວິດ-19 ຈົນເຖິງປະຈຸບັນນີ້ ເຫັນວ່າການຂົນສົ່ງສິນຄ້າແມ່ນພົບຄວາມຫຍຸ້ງຍາກ ແລະ ເກີດຄວາມລ້າຊ້າເປັນຕົ້ນແມ່ນ ການສົ່ງສິນຄ້າກະສິກຳຂອງ ລາວ ຜ່ານດ່ານສາກົນ ແລະ ບັນດາດ່ານທ້ອງຖິ່ນຂອງບັນດາແຂວງທີ່ມີຊາຍແດນຕິດກັບ ສປ ຈີນ ເວົ້າລວມ, ເວົ້າສະເພາະແຂວງ ຢູນນານ, ດ້ວຍເຫດນີ້ ຈິ່ງສະເໜີມາຍັງສະຖາບັນຄົ້ນຄວ້າວຽກງານ Logistics ຄຸນໝິງ (Kunming South Asia-Southeast Asia International Logistics Research institute) ເພື່ອຊ່ວຍສຶກສາ ແລະ ຄົ້ນຄວ້າຫາວິທີແກ້ໄຂທີ່ເໝາະສົມເພື່ອຊຸກຍູ້ ແລະ ສົ່ງເສີມການຄ້າສອງຝ່າຍ ລາວ-ຈີນ ໃຫ້ເຕີບໃຫຍ່ເຂັ້ມແຂງຂື້ນເລື້ອຍໆ. ເຖິງຢ່າງໃດກໍ່ດີນັບແຕ່ລົດໄຟ ລາວ-ຈີນ ໄດ້ເປີດໃຫ້ບໍ່ລິການເຫັນວ່າມີຄວາມສະດວກຫລາຍດ້ານ ບໍ່ວ່າຈະເປັນການຂົນສົ່ງຜູ້ໂດຍສານພາຍໃນປະເທດ ແລະ ຂົນສົ່ງສິນຄ້າ ລະຫວ່າງ ລາວ-ຈີນ, ການຂົນສົ່ງສິນຄ້າໂດຍສະເພາະສິນຄ້າປະເພດກະສິກຳຜ່ານທາງລົດໄຟ ລາວ-ຈີນ ແມ່ນຍັງພົບກັບຄວາມຫຍຸ້ງຍາກຍ້ອນການສ້າງສູນກັກກັນພືດຢູ່ເບື້ອງ ຈີນ ຍັງບໍ່ທັນສຳເລັດ. ດ້ວຍເຫດນີ້ ຈິ່ງເຫັນຄວນມີການສຶກສາຮ່ວມກັນ ກ່ຽວກັບຄວາມເປັນໄປໄດ້ ແລະ ກາລະໂອກາດ ຂອງຜູ້ປະກອບການຜະລິດ ແລະ ປຸງແຕ່ງສິນຄ້າກະສິກຳທີ່ມີທ່າແຮງຂອງສອງປະເທດ ເຊິ່ງກະຊວງອຸດສາຫະກຳ ແລະ ການຄ້າ ຂອງ ລາວ ກໍ່ມີສະຖາບັນຄົ້ນຄວ້າອຸດສາຫະກຳ ແລະ ການຄ້າ ທີ່ເຮັດໜ້າທີ ເປັນເສນາທິການໃຫ້ກະຊວງ ຄົ້ນຄວ້າ ແລະ ວິໄຈ ບັນຫາຕ່າງໆທີ່ກ່ຽວຂ້ອງກັບອຸດສາຫະກຳ ແລະ ການຄ້າ.
ປະທານສະຖາບັນຄົ້ນຄວ້າວຽກງານ ໂລຈິດສະຕິກ (Logistics) ຄຸນໝິງ ແຫ່ງ ສປ ຈີນ ໄດ້ກ່າວວ່າ: ຈະນໍາເອົາຂໍ້ສະເໜີເພື່ອໄປປຶກສາຫາລືຫາວິທີທາງເພື່ອຊ່ວຍໃຫ້ການສົ່ງອອກສິນຄ້າ ຂອງ ສປປ ລາວ ແລະ ສປ ຈີນ ໃຫ້ມີຄວາມສະດວກ ຫລາຍຂື້ນກວ່າເກົ່າ.
ພາຍຫຼັງສອງຝ່າຍໄດ້ປຶກສາຫາລື ແລະ ເປັນເອກະພາບກັນວ່າ ເພື່ອເປັນການຍົກສູງ, ພັດທະນາການຮ່ວມມືດ້ານການຄ້າ ແລະ ການລົງທຶນໃຫ້ຫລາຍຂື້ນ ແລະ ຖືໂອກາດການເຊື່ອມຕໍ່ການຂົນສົ່ງສິນຄ້າຜ່ານລົດໄຟ ລາວ-ຈີນ , ກໍ່ເຫັນດີໃຫ້ເປີດເປັນຂະບວນລົດໄຟຂົນສົ່ງສິນຄ້າຂະບວນພິເສດ ເພື່ອເປັນການເຊື່ອມຕໍ່, ດຶງດູດການລົງທຶນຈາກ ສປ ຈີນ ແລະ ບັນດາປະເທດຕ່າງໆ ໃຫ້ຫລາຍຂື້ນໃນອະນາຄົດ, ໃຫ້ມີການຈັດກິດຈະກຳສຳມະນາ ຫລື ເວທີພົບປະໃດໜຶ່ງລະຫວ່າງ ສະຖາບັນຄົ້ນຄວ້າວຽກງານ Logistics ຄຸນໝິງ ແລະ ສະຖາບັນອຸດສາຫະກຳ ແລະ ການຄ້າ ແລະ ກົມກ່ຽວຂ້ອງ ຂອງກະຊວງອຸດສາຫະກໍາ ແລະ ການຄ້າ ເພື່ອເປັນເວທີ ແລະ ຊ່ອງທາງໃນການເຜີຍແຜ່ຜົນຂອງການສຶກສາ ແລະ ຄົ້ນຄວ້າ ທີ່ກ່ຽວຂ້ອງກັບການສົ່ງເສີມການຄ້າ ແລະ ການລົງທຶນ, ການອຳນວຍຄວາມສະດວກທາງດ້ານການຄ້າ ແລະ ການລົງທຶນ, ການສ້າງຕ່ອງໂສ້ມູນຄ່າເພີ້ມໃນລະດັບພາກພື້ນ ແລະ ສາກົນ, ການສົ່ງເສີມການຄ້າເອເລັກໂຕຣນິກ ແລະ ອື່ນໆ.
ຕອນທ້າຍນີ້ ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ສະແດງຄວາມຍິນດີຕ້ອນຮັບຕໍ່ທ່ານ LIU JINXIN (ຫລິວ ຈິນຊິນ) ປະທານສະຖາບັນຄົ້ນຄວ້າວຽກງານ Logistics ຄຸນໝິງພ້ອມຄະນະ ແລະ ທ່ານ LIU JINXIN (ຫລິວ ຈິນຊິນ) ເອງກໍ່ສະແດງຄວາມຂອບໃຈ ມາຍັງທ່ານລັດຖະມົນຕີ ກະຊວງອຸດສາຫະກໍາ ແລະ ການຄ້າ ທີ່ໃຫ້ການຕ້ອນຮັບຢ່າງອົບອຸ່ນ ແລະ ດ້ວຍໄມຕີຈິດມິດຕະພາບ.
ຂ່າວ ແລະ ພາບ: ໄພວັນ ໂຄດວັນທາ
